Yohane 3 - BIBILLYA Mareiyo Meele a Iruva

Yesu na Nikodemu

¹ Nalyo kweefo nndu Mfarisayo eevangwaa Nikodemu akee nndu wa nrwe wa Vayuda.

² Nawe kansheya elyi kio kammbia, “Llori lwiishi mmbo kukee llori kuukye kwa Iruva muni, mashika kulaiyo nndu ashiidimaa itana efyo fya wende kwatana yewe kwakooya kulaore Iruva akee nawe.”

³ Yesu kanndouwa kaamba, “Ni dede kya dede shakuvia, kwakooya kulaore nndu ammiirwa lya kavii, nnashewonaa umangi lwa Iruva-fo.”

⁴ Nikodemu kammbia, “A niinda nndu ashiirwaa akee mmiku? A ndesa ashiidimaa iwuya efo nsangeny wa maye naveiirwa lyingi?”

⁵ Yesu karouwa, “Ni dede kya dede shakuvia, kwakooya kulaore nndu amiirwa auka na mura na Mumuyo nnyashiidimaa yaanga efo umanginy lwa Iruva-fo.

⁶ Kindo kyamiirwa kyuuka na mwiili mmbo kyaveva mwiili tupu, na kindo kyamiirwa kyuuka na Mumuyo mmbo kyaveva kya ngata ya Mumuyo.”

⁷ Nta kulatambwa elyi shakuvia, Kuti mwiirwa lya kavii.

⁸ Uraato mmbo luvivitaa ando lwakukunndya, na unyanga lwa vayo kwavelwiita, kya indi kulaishi kundo lwauka nafo, nta kundo lusheendaa nafo. Naasa, na wo nndu amiirwa auka na Mumuyo akee indo-da.

⁹ Nikodemu karouwa kammbia, “A kindo ekyo kyautika inda?”

¹⁰ Yesu karouwa kammbia, “Yewe kukee llosha wa kunu Israeli nta kulaishi mbony yeto?”

¹¹ Ni dede kya dede shakuvia, “Kindo lwammanya nkyo lwaamba-u paa, na kindo lwallollya nkyo lwakivikya ukureeki. Na ukureeki yelo lweru nta mulaluwarye.

¹² Kwakooya kulaore mwairikya elyi shimuviaa fya urukeny, a ni inda mushiirikyaa shimuviaa fya iruveeu?

¹³ Nta nkwiiyo nndu alenrwa na efo iruveeu-fo, kulaore ni ulya aleoloka auka iruveeu, mmbwe Mwana yeto wa nndu.

¹⁴ Na shaasa Mose alerosa shoka ilya kulya kasa, na kya Mwana yeto wa Nndu mmbo kikee kirummbwe naveroswa indo-da,

¹⁵ na wo Nndu akusirye nawe nakooye iwarya muu wa llung'anu.”

¹⁶ Iruva mmbo eekunndye ulana karuma Mwana wakwe wa ngitany naambo wo nndu akusirye nawe nalakooye ireka kyeendi nawoni muu wa llung'anu.

¹⁷ Sha mashika kimaruma Iruva karuma mwana wakwe nashe na kunu ulaniny, nshi anruma nashe yuutya ulana yelu uvingo-fo. Nndu kalema ikusirya nawe, we ammaa iwona uvingo kimmba anra nalakusirya na irina lya mwana wa Iruva wa ngitany.

¹⁸ Nndu akusirye nawe nnasheonaa uvingo-fo. Nndu kalema ikusirya nawe, we ammaa iwona uvingo, kimmba anra nalakusirya na irina lya Mwana wa Iruva wa ngitany.

¹⁹ Na iwona uvingo lyikava indi, ni sa ilesha ulaniny, vandu vakakunda ireema ngota sa. Mashika filya vatanyi mmbo fyekee fikasha.

²⁰ Mashika wo nndu atannyi fya uravi mmbo asuuye sa nta nnashaa na seny-fo, naambo filya atannyi filakooye iparwa paa.

²¹ Indi wo nndu atanyi fya dede mmbo asha na seny, naambo filya atannyi fimanyike paa, mmbo fyatanwa akutiri na Iruva.

Yesu na Yohane Mmbatisi

²² Naasa Yesu kaenda kulya urukeny lwa Yudaya aryani na valya vakiloshony kyakwe. Kasinda-fo nawo. Kava mwiibatisa vandu.

²³ Na Yohane nawe-da eefo eebatisaa vandu kulya Ainoni kufii na Salimu, kimmba kweefo mura mwiingi. Vandu vakasha nafo ishebatiswa.

²⁴ Mashika Yohane nalandeerwa kifingyony-fo.

²⁵ Nalyo kukakwiipoo ulai lwa vakiloshyony kya Yohane na nndu Myuda kimaruma kya mbony ta isamba.

²⁶ Vakasha na kulya Yohane akai, vakammbia, “Ulya ekee neewe kulya kwa kulya ya Yordan ulya kulemmbikya ukureeki, akakato ee-fo abatisaa na vandu woose vakamweengya.”

²⁷ Na Yohane kaallwa kaamba, “Nkwiifo nndu ashiidima itira kindo kulaore ankiniingwa kyuuka efo iruveeu-fo.

²⁸ Neeni muveni mukavaany vakureeki mwiitye kilya shileamba, yeny nshiwe Kristo-fo, mmbo shikee nrumi shive nsongoru wakwe.

²⁹ Yeto arie nka mwaalikwa mmbwe muni walyi. Indi mbuya yeyo ya muni walyi, yeto akee nawe mmbo afuraa ashiita unyanga lwakwe. Naasa nto nsia wakwa ushitiri, nato wamiishwa shapu.

³⁰ We kuti neende ang'anaa neeny kuti sheende shiinnyaa.”

Yeto asheeye auka uwe

³¹ Yeto asheye auka uwe mmbwe akee uwe ya woose. Na yeto aparikye kunu ulaniny kaveva wa kunu ulana, kaverera fya kyuulana. Na yeto asheye auka efo iruveeu, mmbwe akee uwe ya woose.

³² Nawe mbony yeto alollye na itiita nto ativikya ukureeki, na ukureki lwakwe kulakae-fo nndu alwiirikya.

³³ Yeto amiirikya ukureeki lwakwe mmbwe avikya Iruva ukureeki sheelyi mmbo akee wa dede.

³⁴ Mashika yeto alerumwa ni Iruva mmbo areraa marero a Iruva. Mashika Iruva nnyaniingyaa Mumuyo esheesyaa-fo.

³⁵ Nawe Nde mmbo akunndye Mwana, nawe mmbo anrambikye findo fyoose efo maakony akwe.

³⁶ Na nndu akusirye na Mwana yeto, mmbwe awarya muu wa llung'anu. Na nndu anra nalairikya mwana yeto nnyasheonaa muu-fo, we ni unyafi lwa Iruva lunkaye.