Yohane 2 - BIBILLYA Mareiyo Meele a Iruva

Walyi lwa kulya Kana ya Galilaya

¹ Nalyo elyi lya nrondo kukaalyikwa walyi kulya Kana ya Galilaya. Na maye wa Yesu kasha nafo.

² Na Yesu kavevaangwa-fo ando amwi na vakiloshyony kyakwe.

³ Naasa mfinyo ukafikya. Maye wa Yesu kammbia, “Mmbakitiri-se mfinyo-fo.”

⁴ Yesu kammbia, “Nkyiki kyeru lu vavii nka? Kyeeri kyakwa nkindefika-fo.”

⁵ Maye kavia vasero vefurukannya-fo, “Kindo amuvia na kikava-ki kevekitaniny tupu.”

⁶ Nafo kweiyo nungu irindaru ta mawe tikee shisimbite-u kisumani na mbuka ya Vayuda yeesamba. Nato wo imwi itiri sha lita iyana indi.

⁷ Naasa Yesu kavavia, “Endeishureny nungu yeti mura!” Vakaishura shapu.

⁸ Kawuya kavavia, “Ulaalu raany-fo kinnywa mundekirwaaya nkara yeto wa shoonga.”

⁹ Naasa elyi nkara ulya wa shoonga afika ishosha mura ulya nato wammaluka mfinyo nalamanyi kundo wauka. Vandu vaishi ni valya venfurukanya-u valya varaa mura ulya. Kyasia nkara ulya wa shoonga kavaanga muni walyi.

¹⁰ Kammbia, “Wo nndu apooka yaava mfinnyo yeto nsha. Vandu vakammbuura llyo ashavaa-ny yeto mfwafwa. Ate yewe mmbo kwasuruma mfinyo yeto nsha fika ulaalu.”

¹¹ Nkyo kindo kyeeora wende kya mbee Yesu aletana kulya Kana ya Galilaya, kaora usuri lwakwe paa na valya vakiloshyony kyakwe vakautau ikusirya nawe.

¹² Naasa kyeeri kilya kyaiduva kandesoka na kulya Kapernaumu we muni na maye na vanavamaye na vandu vakiloshyony kyakwe. Nafo vakakaa-fo mikonu myaangu.

Yesu mmba ya mwiindye

¹³ Nalyo nkonu ulya nniini wa Vayuda, ulya wa Pasaka, ukee kufii Yesu kanderwa na kulya Yerusalemu.

¹⁴ Nafo efo mmba ya Iruva kakooya-fo valya veekumba ng'umbe na maanri na mbeta na valya vealasha fesa vakee-fo rembo.

¹⁵ Nawe kasongosia kyeelashwa aoka na fyoove. Kavaumbuta efo mmba ya Iruva ando amwi na maanri na ng'umbe tilya tawo. Na fesa ta valya vealasha katipusuya si, na ifullwa mesa tawo.

¹⁶ Kavia na valya veekumba mbeta, “Ipoony-fo findo efi muute yaa! Nta mulaallwe mmba ya Iruva ive mmba yekapya mbusha!”

¹⁷ Na valya vakiloshyony kyakwe vakakummbwa kilya kyikee kirere kyeyaamba, “Mmbo shavavyo nriminy kimaruma kya mmba yafo.”

¹⁸ Naasa Vayuda vakaallwa vakammbia, “A ni wende-ki kwiifo kulwoora elyi kwakara itana indo?”

¹⁹ Yesu karouwa kavavia, “Fisheny mmba yei ya Iruva, neeny shiiseleese lyingyi ando a mikonu iraru shimaa piny.”

²⁰ Naasa Vayuda vakaamba, “A elyi kwammiira-u myaaka makumi aana na irindaru mmba yei ya Iruva ikatana yasia, na yewe kwiiseleese lyingyi ando a mikonu iraru kumaa?”

²¹ Indi we mmbo alerera kya mwiili wakwe ukee mmba ya Iruva.

²² Naasa llya meendi aleruka auka kwa vafu llyo valya vakiloshyony vakwe valekummbwa kilya aleamba. Nalyo vakakooya ikusirya na efyo fikee fireiye na kirero kilya Yesu alevavia.

Yesu avaishi shore woose

²³ Naasa kyeeri kilya ekee kulya Yerusalemu nkonu ulya nniini wa Pasaka, veengyi vakapooka ikusirya na irina lyakwe valollye filya fya wende atana.

²⁴ Indi Yesu we muni nalakunde ikoora kwawo, kimmba avaishi shore woose,

²⁵ Nalatiri kisunundyo na nndu kyeemanya mbony ta vandu-fo, mashika we muni eeshi efyo fikee nnang'ani ya nndu.