Yohane 14 - BIBILLYA Mareiyo Meele a Iruva

Yesu ni shia ya yeenda kwa Nde

¹ “Nta mulasavee efo nriminy, kusiryeny na Iruva, muvekusirya neeny.

² Efo mmba kwa Nde mmbo kwiifo marembo meengyi deny. Kwee kulaore ni indo kikai, mmbo shemuviaa. Nsheendaa ndemudeesya-u ando.

³ Kwakooya shameenda indemudeesya ando mmbo mmbuya lyingyi shishemoonndwa na efo kwakwa, neeny ando shikai neeni muvekooya ikaa-fo.

⁴ Na kundo yeny nsheendaa, shia yeyo mwammeeimanya.”

⁵ Toma kammbia, “Nndumi kundo kusheendaa llwiishi nta-fo-te a ni inda lushemanyaa shia yeyo?”

⁶ Yesu kammbia, “Yeny ni shia na dede na muu. Nta nkwiifo nndu afika kwa Nde kulaore aroswa ni yeny-fo.

⁷ Kwakooya mmbo mwanshimanya yeny, mmbo mumanyaa na Nde-da. Na lulaalu indi-da mwammanya na ilollya mwallollya.”

⁸ Filipo kammbia, “Nndumi kelwoore Nde, nakyo kilukumayaany!”

⁹ Yesu kammbia, “Fyeeri efi fifye indo shankaa neeni, neewe kulandeshimanya Filipo? Yeto ashilollye yeny, mmbwe alollye Nde. A kyavaany inda elyi yewe kwaamba, ‘Lwoore Nde!’

¹⁰ A mmbo kulakusirye-u sheelyi yeny mmbo nsangyi na Nde, na Nde kasanga neeny? Na marero yoo shaamba nta nshaarera auka kwakwa shimuni-fo. Ni Nde akaa asangyi neeny mmbwe ava mwirunndya-u mashora akwe.

¹¹ Kusiryeny na yeny-te mumanyi yeny mmbo shisangyi na Nde na Nde kasanga neeny. Kilave kimaruma kya indo, manyiny kimaruma kya mashora yoo akwa meni amuniinga ikusirya-u.

¹² Ni dede kya dede shamuvia, nndu kakusirya neeny, mashora shatana, nawe-da ashaatanaa na maniini ngota yoo, kimmba yeny ni efo kwa Nde shiifo nkweengyaa.

¹³ Na wo kindo mwankitereva efo kwakwe kikee kya irina lyakwa mmbo akitanaa, na Nde nakooye ing'aniswa kiryani na Mwana.

¹⁴ Na kwakooya mwatereva kindo kikee kya irina lyakwa na yeny nshekitanaa.”

Mumuyo Mweele

¹⁵ “Kwakooya mwashikundo mmbo musheringaa mavavaso yoo akwa.

¹⁶ Neeny nsheterevaa Nde, nawe ashemuniingaa Mweekyi ungi, nakae neeni nafike llung'anu.

¹⁷ Ni Mumuyo yeto asheendee mbony ta dede, yeto ulana lulashiidimaa immbwarya kimmba lulatiri miso eellollya nta lulamwiishi. Yeni mmbo mwammanya kimmba asindi neeni kamukaya efo nriminy.”

¹⁸ “Nta nshemuraa muve vangwera-fo, mmbo nshaa na kwany.

¹⁹ Kusaa-u kyeeri kidu ulana yelu lulakishilollyaa-se-fo. Neeni mmbo mushilollyaa kimmba shakaa-fo na muu, neeni mushekaa-fo na muu-da.

²⁰ Na nkonu yeto mweni, mushemanyaa yeny mmbo shikee llunge na Nde, neeni mmbo mukee valunge neeny, neeny shikee llunge neeni.

²¹ Nndu antira mavavaso akwa kaaringa mmbwe nndu ashikunndye na nndu ashikunda mmbwe ashekundwaa ni Nde-yaakwa, neeny nshevenkundaa na ikoora nawe paa.”

²² Naasa Yuda nshi ulya Iskariote-fo, kaamba, “A kyavaany inda elyi kurie ikoora paa na yese-da, kulakoora na ulana yelu?”

²³ Yesu kaallwa kammbia, “Nndu kashikunda ni ndera yeyo yakwa asheiringaa, na Nde-yaakwa ashevenkundaa, neese mmbo lusheshaa na kwakwe, lwaallwe-fo kuve kweru kweekaa.

²⁴ Na nndu kara nalashikunda, nta marero akwa nnaaringaa-fo. Na ndera yeyo mwiitye nshi yakwa shimuni-fo, ni ya Nde, mmbwe aleshiruma.”

²⁵ “Yaa nng'u marero akwa sharera neeni, kyeeri yeki nsindi neeni, shamaa-ny.

²⁶ Kyaindi yeto Mweekyi, we Mumuyo Mweele, yeto Nde anshenrumaa kikee kya irina lyakwa, mmbwe ashemufundaa findo fyoose navemukumbura fyoose shilemuvia.

²⁷ Ni ufoo shamureeya, ni ufoo lwakwa shamusimba. Na nsimmbye wakwa nshi ukee sha nsimmbye wa ulana-fo. Nta mulasavae efo ngoony, nta mulatirwa mmbweerei.

²⁸ Mmbo mwiitye shivuviaa shiifo nkweenngyaa mmbewuyaa na kwany. Kwee mweeshikunndye mmbo mweefuraa elyi shakweenngya kwa Nde. Mashika Nde akee nniini ngota yeny.

²⁹ Na ulaalu shamuvia elyi kilandeva indo, na yeni elyi kyammeeva indo naambo muute-u ikusirya-u.

³⁰ Nshikireraa-se neeni marero meengi-fo, mashika yeto nniini wa ulana yelu eefo ashaa. Nawe nta nalatiri kindo kwakwa-fo.

³¹ Kyaindi ulana yelu nkuti lumanyi mmbo shikunndye Nde, na shaasa Nde aleshivavasya ni indo ntanaa. Naasa ndifony luuke ya lweende.”