YOBU 8 - BIBILLYA Mareiyo Meele a Iruva

¹ Bildadi, Mshuhi, karouwa Yobu:

² Mmbo kuseeraa mbony yeto kufike indii? Kumandi indii marero afo avaa a ruu sha uraato?

³ Nkyo mmbo kukusarye Iruva mmbo aimmbwaa usumanu? Ao ndesa Iruva muni finya mmbo aimmbwaa udede?

⁴ Kwa kooya vana vafo valerenngya Iruva, we mmbo alevataiya kiiyani na uravi lwawo.

⁵ Kwakooya kuruuya Iruva kwamolokkya we Iruva muni finya,

⁶ Kwakooya yewe kukee mwaa na mwoorotu ngoony yafo, ndede Iruva mmbo ashekweekkyaa, na ikuwonisya ando akusumani.

⁷ Ra na elyi kwepooka ikaa na ufwafwa, muu wafo ushaa usheva wa usuri mmwaasi.

⁸ Kuloshe dwa kwa yewo valekusongoya, lattya nnu filya vamiku yewo valesonngwa imanya

⁹ Yese n vandu va ishoisho nsi, nta kindo luishi-fo; mikonu yeeru ulaninyy n kirishe kishiiraa veru.

¹⁰ Indi wo vakuloshaa na ikuvia, mbony vekooya yuuta efo urangony lwaawo:

¹¹ Makongye nyamyaa ando kulatiri mura fo, nta nyakooywaa ando kulaiyo mbora fo.

¹² Naakwa avaa na kulaore avevaa, akantura mura mmbo anaa mbee ya mare engyi.

¹³ Ni indo vakee woose varekywaa Iruva. Ivika nsia lya valakusirye na Iruva lyisherekaa.

¹⁴ Kikusiryo kyao kyifikafikaa, ivika nsia lyawo ni ruu lwa mbuu-mbuu.

¹⁵ Mmbo vakee kuinamire mmba yawo indi nnyisalalaa fo, vakaitiryau indi nnyikau fo.

¹⁶ Mwi ukavaa we mmbo amyaa nisha; mirarii yakwe ikaishwa nndeny m wakwe.

¹⁷ Mirarii yakwe ikakoososa maweny nawe keenda ilola efo nnang'ani ya mwaamba.

¹⁸ Indi kammamitwa yuuka ando akwe, llyo mmbo amminaa ambye, “N shilenkoya ikulolya-fo.”

¹⁹ Lola, eto nto ufishyiony lwa ifura lya nndu yeto, na ando awo mmbo vamayaau vwengyi.

²⁰ “Lola, Iruva nnyalemaa nndu nalatiri ulyamari-fo, nta yeekkya varavi.

²¹ Indi mmbo ashiishuraa kana kyafo seko, na firomu fyafo unyanga lwa ifura.

²² Valya vakusuuye vashevoywaa ni sony, ando a varavi mmbo ashesamaa deny.”