YOBU 41 - BIBILLYA Mareiyo Meele a Iruva

¹ A, kushiidimaa iwara ikindo lyilya Lewiyathani na nduvanu ao ifinga ulumi lwa vayo na kyoove?

² A, kushiidimaa ilyaaka kyoove mmbweeny ya vayo ao ilyidosha yuundu na kulabu?

³ A, mmbo kukusarye lyikuoshoraa kulyiotore? A, lyirera neewe kwa ufoo.

⁴ A, mmbo liruuyaa umbuya neewe, kulyialwe nrundi wafo llung'anu?

⁵ A, kutavanaa nalyo sha ndeye, ao kulyifinge kyoove lyitavane na varundi vafo?

⁶ Mmbo kukusarye vereiya makunga vakapaannya yuura? A, vandu va mbusha vakara ililyimamanya na ikwaavya?

⁷ A, kushiidimaa idosha shonyi ya vayo na ifumu, ao nrwe wa vayo na ifumu lya itira makunga?

⁸ Kara kwalyipaana nsi, kulollye kya nkuka; Nkukaa kuvuiye itana se indo ttwa fo!

⁹ Kilya kuvikye nsia mmbo kivaa ruu, mashika mmbo ashewaa si kyeeri ashelyilollyaa.

¹⁰ Nkwiifo nndu moose nkaari akaraa ilyimattwa-fo. Mmbiiny akara isalala mbee yakwa?

¹¹ Mmbi alenshiniinga kyindo, naambo kyive n kuti immbirya? Kindo kyoose kyikee si ya ngina ni kyakwa.

¹² Nshiraa shilakuvya kya ikindo yelyo-fo ao uwe ya finya ta vayo na yuumba lya vayo isha.

¹³ Mmbi ashiidimaa ilyiambwa shonyi ya vayo ya uwe? Mmbi ashiidimaa idosha kindo kya isiika mbafuny liree?

¹⁴ Mmbi ashiidimaa iruwa kana kyavayo? Mayoo avayo taari toose ni kindo kya yeerese!

¹⁵ Mungo wa vayo mmbo ukeentani ni mabala a ngao tikutiri amwi sha muuri.

¹⁶ Wo imwi mmbo ikutiri na ingyi, nta mumuyo mmbushiidimaa iira nnang'ani ya vayo fo.

¹⁷ Mmbo akee masande amwi, nta nkivaa iyaava fo.

¹⁸ Likawara mmbwa sa mmbo imikaa, miso a vayo akamika-mika sha elyi mwi ukee vaa.

¹⁹ Kaniny ka vayo kukakafo fimwii fishaakaa sise ta muro tikyilyaa poo.

²⁰ Mmbweny ta vayo kukaukafo nsu, sheelyi nungu ikerora; sheelyi usaka luyaa.

²¹ Mumuyo wa vayo ukaata makaa; kipalapala kya muro nkyuukaa kaniny kya vayo.

²² Singo ya vayo mmbo itiri finya wende, likafumya andu vandu mmbo vairyaa.

²³ Nyama ta mwiili wakwe tinangye, tapu sha minya nta nntiring'inaafo.

²⁴ Ngoo ya vayo nyikee shuumu pony sha iwe shuumu sha iwe lya iseya.

²⁵ Lyikakwiipoo vandu vakaari mmbo vatirwaa mmbwerei, kwa ikapwa lyimwi mmbo vaumaa.

²⁶ Nkwiifo usu lushiidimaa ilivika kyaasha fo, nta ifumu nta mfe fo.

²⁷ Kwa vayo minya nsha ire, na minya ya arera sha umbiiri lupoye.

²⁸ Mfe m mbashiidimaa ilyirishisafo; likaerywa mawe a ngova mmbo lilollyaa nsha mbala.

²⁹ Kwakwe rungu nsha kinaana-da, mmbo lyisekaa likaerywa mafumu meengyi.

³⁰ Ndewu ya vayo mmbo ivakkye sheelyi ikeshisikkye na ngyoyo shuumu; mmbo ikurrwaa na ilanndwa uteri sha isewe lya isa,

³¹ yeeve mmbo likiswakiswaa sha mura ukeetokota, likakwaalwa liute ifuuru sha shupa ya mafura.

³² Kyeeri lyiiraa mmbo lyiree numa ya vayo ngyayo timikamikaa; ifuuru lyaa mmbo lilollywa yeeveny.

³³ Ulaniny nkwiifo kindo kilivakkye fo, nkyuumbe yekyi kilatiri werei.

³⁴ Mmbo kyilollya woose vatiri ngoo shuu nshi kyindo fo; yekyo ni mangyi ya mafisi moose manyaasi.