YOBU 39 - BIBILLYA Mareiyo Meele a Iruva

¹ A, kwiishi mburu ta mafumbuu ni indii tifyaa, ao kulenlollya kinamburi kiifyaa?

² A, kwiishi mmbo kiipoo urio kyeeri kifye inda, ao nkonu muni wa ifyaa kuwiishi?

³ Kwiishi kyeeri va kuinyikaa vakafyaa, kyeeri kya ifyaa vana va vayo?

⁴ Vana va vayo mmbo vawonaa finya, vakang'annya efo kweni kasa, numa vakara va maye vakaenda kyawo.

⁵ Mmbi ereya itiko ulekye? Mmbi alevalotora?

⁶ Yeny mmbo sheaniinga kasa koomu kave ando avayo ekaa, kasa katiri mmbala kave ando a vayo ekaa

⁷ Mmbo akaa kwaasha na fyoorongye fya miri, nyeetaa kyorongye kya imwitika fo.

⁸ Mmbo arwarwa fidoorony iruya-fo mare, na kindo ekyo kyoose kivisi.

⁹ A, mboo ishiirikkyaa ikurundya? Ao ndesa, ishirikkya ilale muriny wafo?

¹⁰ A, kushiidimaa iavika mboo na kyoove iremi nnda ao iomwi ikumbi lyerema?

¹¹ A, kuvikaa nsia kimmba itiri finya shiingyi narunde mashora afo moomu?

¹² A, mmbo kuvikkye nsia mboo ikwilulye fimu fyafo, na yeende ando a ikappya?

¹³ Nyaa mmbo ikakapaa maaru a vayo na ukushobi, indi nnyishiidimaa irumbuka sha imutony fo.

¹⁴ Nyaa nyiree mabore a vayo uteriny naambo awonise ngumyyo nsangeny;

¹⁵ kya indi nyiishi sheelyi ashiidimaa ivarywa, ao iparwa ni ifisi lya ngoroshony-fo.

¹⁶ Nyaa mmbo itannyaa vana va vayo u riiti sheelyi nshi va vayo fo; naakwa ishora lya vayo likalyamarika nnyisaraa fo;

¹⁷ Mashika mmbo sheyaalua irekkywa urango lwa vayo nta nshiininga kyenga kyoose kya urango fo.

¹⁸ Indi ikampooka irisha, mmbo isekaa frasi na mwisaama frasi.

¹⁹ A, Yobu nnyewe kuniingye frasi finya? Kwativika mafwaa maasha singony?

²⁰ A, nyewe kwaalwa frasi ikillye sha nre? Unyanga lwa vayo n lwa wende!

²¹ Nyitukulaatukula sumbai kwa waafu; nyirishaa ngapanu na finya ta vayo shoose.

²² Frasi mmbo isekaa werei, na nnyereswaa fo; nta usu lluiviraa numa fo.

²³ Fisha vesaama veepoo, mmbo fikukakapaa fikaona na ivarama mwiny.

²⁴ Frasi tikaengera yenda na mbee, tiireremaa na unyaasi; tarumbeta iranda lyikakapwa yo nnyisalalaa-fo.

²⁵ Vo kyeeri wombe lukapwaa yo nyuutaa unyanga; mmbo iitaa kyoona kya fira uka kwaasha, veutaa mavavaso lwa unyanga uniini.

²⁶ A, uwiri mmbo lukuloshye kwafo irumbuka, na iorwa maru a vayo na taari ya sinde?

²⁷ A, ngoru mmbo irumbukaa uwe na ivavaso lyafo, na ivika kifuri kya vayo uwe ya kidooro?

²⁸ Ngoru mmbo ivikaa ando a vayo ekaa masimambeny maasha, na mirwe myaasha ya masimamba nnyo mbanga ya vayo.

²⁹ Kuuka yefo ikalaaya shoonga teelya, miso a vayo akalollya ekee kwaasha.

³⁰ Maana a vayo akaonga samu, ando n nying'a ukai mmbu ngoru ikai.