YOBU 38 - BIBILLYA Mareiyo Meele a Iruva

Iruva Arouwa Yobu

¹ Llo Nndumi Iruva karouwa Yobu kuuka iruve-u:

² “Mmbi yewe kuketatala makusaro akwa na marero alatiri urango?

³ Kufinge sha nndumi, shikuvesaa na yewe kushirouwe.”

⁴ Nkwi kwekai llya shevika nsuka wa ulana? Shivya kwakooya kutiri urango.

⁵ Mmbi evika fyeeso fya vayo, kwiishi ndesa! Ao mmbi eara kyoove uwe ya vayo iyeesa?

⁶ A, ngo ta ulana ntikeeshisalese uwe yeekyi, ao mmbi evika iwe lya uvasha,

⁷ nyinyiri ta ngama kyeeri tekeimba ando amwi, na vana va Iruva vakarosa ngyunyanga ta ifura?

⁸ Mmbi efinga matundulu a yeeve kyeeri eomuka na yoona uroony lwa yeeve?

⁹ Nnyeny shesikkya yeeve na mafishi na ilyiringitya na ireema iniini.

¹⁰ Shavikkya yeeve nnyanu, shaisiika na misirya na myoongo,

¹¹ shaivia, “Nnyanu wafo nnyaa, n shi mmwasi fo! Matundulu afo afinya nnyamandaa yaa!”

¹² Yobu, uka kuonika kulembavasya kukye? Na itana ikya limanye ando avayo,

¹³ naambo lyiidimi itira ulana mbembe ta vayo na iumbutya varavi neefo kwaasha?

¹⁴ Ulana mmbo luinduka na iwonisa fwana sha soori; sha uteeri lwa yuumba shaasa lushaaluva ni muuri.

¹⁵ Indi varavi mmbo vashiimwaa sa yaawo, woko lushorowaa ikapa vandu mmbo lufishwaa.

¹⁶ A, ndesa kulenfika sokeny ta yeeve? Ao iruarua ndilliny ya yeeveny?

¹⁷ A, kulenkoya irrwa myoongo ya ufu; ao ilollya maboo a kyeny kya ireema iniini?

¹⁸ A, kwiishi uniini lwa ulana? Shivia kwakooya kwiishi yefyo fyoose.

¹⁹ A, kyeny kya sa nkwi kyikai? Poo kwa ireema nkwi,

²⁰ naambo kwiidimi ilirwaa kyeny kwa vayo, na imanya shia yeenda efo kwa vayo.

²¹ Yewe nkusumani imanya yewe kulemmaa ikaa na muu myaaka miingyi!

²² A, kulemmaanga mbesheny ta laura ya kyaamwi, ao ilollya mbeshe ta mbwa ya masaawe

²³ yefyo shisurumyi kimaruma kwa mikonu ya mbwaanu, mashika a mikonu ya ngapanu ya fira?

²⁴ Ni ingai shia ya yeenda ando sa iavyoo, ao efo kuukaa uraato kwa taari ya ngama lukararatwa ulani?

²⁵ Mmbi edesya iruveu shia ya mmbwa? Mmbi eora ukova shia ya vayo mafishiny

²⁶ ikateveta mmbwa ikapwa si kundo kulakaa vandu na kasa koomu kalaafo nndu,

²⁷ naambo iviirye uruka uumu muu na iekkya iore myooro?

²⁸ A, mmbwa itiri ndeeye? Ao mmbi eira marony a laura?

²⁹ A masaawe mmbo aukye ndewuny ya vi? Mmbi eira laura ya kyaamwi?

³⁰ Masaawe mmbo aalukaa akava moomu pony sha iwe, na kisangu kya yeeve kyikoomaa.

³¹ Lola matorito a nyinyiri: A, kushiidimaa iavika Kilemya na nse, ao ielelesa fifingo fya Orioni?

³² A, kushiidimaa ishillya nyinyiri kyeeri kya vayo, ao ishillya dubu inyaasi amwi na vana va vayo?

³³ A, kwiishi ngyuramba tishillyaa iruveu; a, kushiidima itivikkya uramba lwa vayo ulaniny?

³⁴ A, kushiidimaa irosa unyanga na ivavasa mafishi nakusikkye na ipusukkywa ni mmbwa?

³⁵ A yewe kwa vavasa kyimwi kya ngova kikusheyaa lumike kwaambe, “Shikee yaa?”

³⁶ Mmbi aviaa nansha iishwa lya mura wa Naili ao alevia woro ya nguku sheelyi mmbwa ikeesha?

³⁷ Mmbi atiri urango lwa yeekyena mafishi, ao iinyika ndiwi ta mura efo iruveu?

³⁸ Naambo kiluulyi ulaniny kikutire na uteeri lukutire luve ibwashi?

³⁹ A, kushiidimaa itirya miiso kyeelya ao iwurisa vana va miiso;

⁴⁰ kyeeri vaovyaa mbangeny ta vayo ao ilala yoovyeny velaayaa?

⁴¹ Mmbi aniingaa makukuru shoonga ya vayo, maana a vayo elyi fikeeshifiirya yeny Iruva, na irumbuka efo na efo kimaruma kya shaa.