YOBU 36 - BIBILLYA Mareiyo Meele a Iruva

¹ Llyo Elihu kaengera irera:

² Shisisirya kinnyo, shikooraa kindo; Mashika shitiri kya irera ando a Iruva.

³ Mmbo shisheendee urango lwakwa usha uka kwaasha deny, na iyoora sheelyi Muumbi wakwa ni nsaari.

⁴ Ni dede marero akwa nshi a wongo-fo; Mwiitira kiloshyo kya dede mmbo akee yaa amwi neewe.

⁵ Arannya Iruva ni muni finya nta n nelaa nndu moose-fo; wiidimi lwa urango lwakwe ni uniini nnu!

⁶ Nnyaree varavi vaengere ikaa na muu-fo; kya indi mmbo aniinga velammyo usumanu lwawo.

⁷ N naree naleringa vandu vasaari-fo; mmbo avavikaa fitiminy fya ushilyi, vakashillya na iva na usuri.

⁸ Indi kwakooya vandu vakee vafinge mise; vakavarwa fyooveny fya ilyiswa ukiva,

⁹ Iruva mmbo avaoraa mashora awo maravi, na sheelyi wo ni vandu vatiri ngoo shuu.

¹⁰ Kavarrwa maarwi vaite ngyufundo, na ivavavasa vawu-ye vare uravi lwawo.

¹¹ Wakaindya Iruva na inrundya, mmbo vavesyoo mikonu yawo myoose, myaaka yawo myoose ikava ya ifura.

¹² Indi vakara valamwiirikya, mmbo avamamita na usu, na ifwa kya itura urango.

¹³ Valakunndye iindya Iruva mmbo vakundaa isswa, mmbamfuuyaa veeruyaa ngaya kyeeri avafotaa-fo.

¹⁴ Mmbo vafwee vekee vana vakoo, muu wawo ukasia sha wa vatuusi.

¹⁵ Indi Iruva mmbo akiraa vafwafwa kwa ufwafwa lwawo kya ufwafwa lwavo kavatarambwa miso.

¹⁶ Iruva mmbo ekoommwa kakuuta ukiveny, kakuvika ando kutiri mwaanya kulatiri ukiva, na meseny afo kakuvikyau findo fivandye.

¹⁷ Indi ulaalu kwanrumbuywa sha nravi, mirumbuye ya usumanu yankuwoya.

¹⁸ Kwiise iroywa n ngoo ilasheekuteva kuing'ashe, ao uniini lwa masaa a iwouwa lukurete.

¹⁹ A, kiiyo kyafo kivaa ikuuta ukiveny, ao finya tafo shoose tikwekkyaa?

²⁰ Kulalange kio kishe, yelyo vandu vautwaa yoo vekai.

²¹ Kwiise! Kulalatye uravi mashika mmbo kulewonisyo ukiva kukkye uravi.

²² Kummbwa uniini na wiidimi lwa Iruva mmbi alemmidima ikulosha kindo?

²³ Mmbiny ashiidimaa insawuya shia yakwe, ao ashiidimaa imbya, “Kwa nrenga?”

²⁴ Kularekkyo irumisha mashora akwe; yoo vandu valeakappya kyorongye.

²⁵ Vandu woose mmbo valelollya findo Iruva aletana; nndu wa vandu kaalollya uka kwaasha.

²⁶ Iruva ni nniini nnu nta llushiidimaa immanya-fo; fyeeri fya muu wakwe filavaa isavaiya.

²⁷ We mmbo aomuyaa mura wa yeeve na kwakwe, na efo ituuny katana marony a mmbwa.

²⁸ Kaallwa mafishi aende mmbwa, ikanisa mamwiingyi va vandu.

²⁹ Mmbi eshi ngata mafishi akwaalaa, ao ukova na iruruma uwe ya ngina?

³⁰ We mmbo akee-yaala ngesa yakwe nginii-u, na isikkya uroo lwa Yeeve.

³¹ Kwa mmbwa mmbo aniinga vandu na ivaniinga shoonga kwa wiingyi.

³² Mmbo atiri fimwii na maako akwe, kwa numa kalekeya iruruma

³³ Ukova mmbo luambaa isha lya Iruva, naakwaa mmafishi mmbo amanyaa sheelyi akeesha.