YOBU 35 - BIBILLYA Mareiyo Meele a Iruva

¹ Llyo Elihu kaengera irera:

² “A Yobu mmbo kulollye mbony yei ni usumanu na ikusara kilasha na Iruva

³ kwavesa: ‘Mbusha kyi shambona kwakooya kulaore shiletana ulyamari? Shawona iviiri mmwasi ya elyi kulaore shetanaa ulyamari?’

⁴ Yeny shikurouwaa yewe, na mbuya tafo da.

⁵ A nkye lola iruvee-u! Lola mafishi akee uwe ngota yewe!

⁶ Andesa kwatana ulyamari, Iruva mmbwe kukemuuta usuro? Na kwa engera irenga nkukusarye nkukeimbavisa?

⁷ A kwakooya kukee nsaari, a nkukeniinga mbusha ao we nkyoki akeewonisa kwafo?

⁸ Uravi lwafo mmbo lwataraa vandu vengyi sheewe, usha lwafo mmbo lusheekya nndu urooye wafo.”

⁹ Kimaruma kya ilamya yiingyi vandu mmbo vaiyaa, vakatereva ngaya kimaruma kya ngapo ta vaafinya.

¹⁰ Indi nkwiifo mwiamba, “Nkwi Iruva akai, muumbi wakwa, mwishaalua shive ntakusu kyio,

¹¹ Akee luniinga urango ngota mafisi, na ilualwa luve na urango usha ngota ndeye!”

¹² Vandu yewo mmbo vaterevaa ngaya indi Iruva n navarouwa fo, kimaruma kya ukushobi lwa vandu varavi.

¹³ N dede Iruva nnarannyaa kiiyo kya ruu fo; Iruva muni finya nnasaraa kiiyo yekyo fo.

¹⁴ Mmbo akurouwa inda neewe nkwambaa nkunlollye-fo na mwaandu wafo mmbo ukee mbee yakwe neewe mmbo kukee mmbereya!

¹⁵ Ulaalu, kimmba Iruva akesiika unyafi lwakwe, nta kulaore akusara irenga lya vandu,

¹⁶ Yobu mmbo kukeetarammbwa kana irera marero a ruu, Nkukee yengera marero kuleefo urango.