YOBU 34 - BIBILLYA Mareiyo Meele a Iruva

¹ Naasa Elihu kaengera irera:

² “Arannyiny marero akwa eni mutiri urango usha, shilootyeny maarwi any eni mutiri umanyo.

³ Kuri mmbo kyeesaa marero sheelyi ulumi lushoshaa shoonga.

⁴ Naasa lusauwe likee lya usumanu, lurummbwe nnang'ani yeeru yekyo kyikee usumanu.”

⁵ Naasa Yobu ammaamba, “Yen Yobu nshitiri mbese-fo, Iruva mmbo ashuuta usumanu lwakwa.

⁶ Ra na elyi shilatiri kindo shilyamarye mmbo shikee lollywa sha nndu wa wongo; kyaasha kyakwa nkikeshya-fo ra neelyi shilatiri mbese.”

⁷ Mmbi akee sha Yobu we kwakwe umbafu nsha ina mura?

⁸ Mmbo asangaa na vandu vetana maravi mmbo arrwaa na vandu varavi.

⁹ Mashika mmbo akee yaamba, “Nndu nnawonaa mbusha shoose, ikwaatara isennya Iruva-fo.”

¹⁰ Kwayekyo shaarannyiny yeni mutiri umanyo. Iruva n nashiidimaa itana uravi ttwa-fo; Iruva muni finya nnamanyaa irenga-fo.

¹¹ Iruva mmbo ataa wo nndu kiinani na mashora akwe, mmbo antaiya kiinani na meengye yakwe.

¹² Ni dede deny: Iruva nnatanaa uravi-fo; Iruva muni finya naretaa usumanu ttwa-fo.

¹³ A mmbo kwiifo alenrambikkya ushilyi lwa ulana? Widimi lwakwe uwe ya ulana ni lwakwe we muni.

¹⁴ Kukooye Iruva mmbo akukusaria we muni nsi, aute mumuyo wakwe wa muu ulaniny,

¹⁵ fyuumbe fyoose mmbo femamikaa deny, na nndu wa vandu navuye uteeriny.

¹⁶ Kwa kooya kutiri urango arannya; arannya kindo shikekuvia.

¹⁷ Ndesa mwiitorya ulana na mavavaso akwe nasswe usumanu? A, ekaraa iutya nsaari na atiri finya uvingo?

¹⁸ Yeto aviaa mangyi, “Yewe ni mbulula!” Na vandu vasuri, “Yeni ni varavi!”

¹⁹ We nyakunndyaa vaniini, nta isara masimba ngota ngwera-fo, mashika yewo woose m mashora a maako akwe.

²⁰ Ikafya na illa woose wameefwa; m mbaring'iswaa kio na ikumba muu; nawo vatiri finya mmbo vaaiyywa kwaasha kulaore kwiifo finya ta nndu.

²¹ Miso a Iruva mmbo eesaa miengye ya vandu; we alollye ngyayo tafo toose.

²² Nkwiifo wuu nta ireema iroo kundo vetana maravi vashiidimaa ikusuruma fo.

²³ Iruva n naitikkywaa imanyissya nndu kyeeri kya imweende ikwaanuny lyakwe fo.

²⁴ Mmbo amamitaa vatiri finya kulaore avasuma, na ivika vengyi ando awo.

²⁵ Kimmba eeshi mirundye yawo myoose, mmbo avavunndwaa kio vakamamika.

²⁶ Mmbo avasaara mbee ya vandu kimaruma kya uravi lwawo.

²⁷ Kimaruma valara valanlatya we, vakamina shia takwe toose.

²⁸ Kutani vateveta kiiyo kya ngwera kifikkye Iruva Iruva kaarannya kiiyo kya yewo veliswa ukiva.

²⁹ Kwakooya Iruva amalallya, mmbi ashiidimaa insakira? Kasuruma kisangu kyakwe mmbi alollyaa,

³⁰ lyive ni isanga ao nndu umwi umwi? Natanaa indo naambo nndu nravi alashillye, ao valya vaengyee vandu ngusana.

³¹ Lwaambe nndu ammivya Iruva, “Shanlyamara, nshitanaase ulyamari-fo.

³² Shoora sye shilashiidimaa itilollya, kwa kooya shantana makasha n shivuiyaa-se-fo.”

³³ A ndesa n kuti Iruva nankape shaasa kwalollya yewe? Nyewe kurumbwaa nshi yeny-fo. Naasa, amba yekyo kukusarye.

³⁴ Nndu mwoose atiri urango, na wo atiri urango usha akee shaarannya ashaamba:

³⁵ Yobu mmbo akerera kya urango lwakwe marero akwe nnatiri mbusha-fo.

³⁶ Nkyeni Yobu eesheswaa na nshushwa fika ufishyony, mashika mmbo akerouwa sha vandu varavi.

³⁷ Kaengera ukasha uwe ya ngyulyamari takwe; kaengera nyinyira nnang'ani yeeru, na yeengera marero akwe kilasha kya Iruva.