YOBU 30 - BIBILLYA Mareiyo Meele a Iruva

¹ Kya indi ulaalu vandu mmbo vakeshiinyala; Lyingyi vandu vadu vakwa, Vandu yewo shelollyaa va ndeye vawo Mmbavaafo nta ilola fite fyakwa fyeringa moonri.

² M mbusha kyi shewona maakony awo, Vandu finya tawo tembasiiya?

³ Uturiny na shaany shiniini, Vakaruyaruya kya irafuna kasa koomu Kundo kwa ruu kulatiri shoonga.

⁴ Mmbo veyaya myooro kasa na mare ngoroshony wakalya, Vakalya naakwa mirari ya miri.

⁵ Vakaantywa kwaasha na vandu, Vandu vakavakapya kyoorongye sha manyinyi.

⁶ Kyikava nkuti varuuye ikkya mbangeny, Efyo marininy na miambeny.

⁷ Efyo ngoroshony vakaiya sha mafisi, Vakakusangirya amwi si ya rafi.

⁸ Mmbo vekee varung'ani na masembo Yewo kyeva kuti vaumbutwa urukeny na mbiiri.

⁹ Na ulaalu mmbo vakeeshiimbya fiimbo fya ishiinyala, Shammba kindo kya iipala kwawo.

¹⁰ Mmbo vakeeshiswa na ishiiyama; Vakashilollya vakashiesellye minyiiri.

¹¹ Kimmba Iruva ashinyiisa na ishisuta Mmbo vammba valeke ishitannya wo kindo vakunda.

¹² Kitung'ati kya vandu kikakupoo ishikumba, Veeruuya ishituula na ishireiya. Vakashiwoya naambo shimamike.

¹³ Vandu yewo vakamannya shia yakwa Vakaitika shiwoni renga, Nta kwiifo nndu wa ivakyeemya-fo.

¹⁴ Vakasha sha ando atiri yaanga iniini, Vakammaa ishiwoya vakarisha na mbee.

¹⁵ Shawoywa n werei uniini Usuri lwakwa lukamaya sha uraato, Na ivesyo lyakwa sha ifishi.

¹⁶ Ulaalu n shitiri nta finya muuny wakwa-fo; Mikonu ya ukiva yanshiwoya.

¹⁷ Kio maffwa akwa moose mmbo avavaa, Mavavyo akashirafuna nta nnyakefwaa-fo!

¹⁸ Iruva anshitummwa na soori takwa, Kashitira tabu sha ukova lwa soori takwa.

¹⁹ Iruva kasheera ipwashiny; Shava sha ifu na kiluulyi.

²⁰ Shakufuuya, nta nkukeshyarannya-fo, Shasalala itereva nta nkuke shaarannya-fo.

²¹ Kwammaluka iva nriiti kwakwa, Kwashilisa ukiva na woko lwafo lwa finya,

²² kwasheera uraatony na ishivivita; Kwasheerera kunu na kunu matunduluny manyaasi.

²³ Yee, shiishi kushirwaa ufuny dwa, Ando woose vakee na muu vashekwaananyaa.

²⁴ A nndu kammboywa ngatara ta umamiti ashoorrwaa se maako? A, nndu ekee ukiveny aterevaa se weekyi?

²⁵ A n shilevaiiya valya vekee ukiveny? A n shilevavio mmuu kya ngwera?

²⁶ Indi kyeeri shekevereya mesha, makasha akashikooya, Shevereya sa, ireema likasha.

²⁷ Ngoo yakwa ikesavaa nta nyikee malalya ttwa-fo; Mikonu ya iliswa ukiva yanshikulumba.

²⁸ Mmbo shikeiraira shiifwa, kwakwa nkwiifo mwi fo. Shike salala mbateny shiterevaa weekyi.

²⁹ Kwekyo shammba mwana maye wa iparwe Yeny na nyaa nkwiifo kilasha-fo.

³⁰ Shonyi yakwa yambaluka Maffwa akwa mmbo akeyaaka muro ni nrike nniini.

³¹ Kinanda kyakwa kyamba kya ukiva Iranda lyakwa likava lya kiiyo.