YOBU 29 - BIBILLYA Mareiyo Meele a Iruva

Marero a Yobu a Ifurummya

¹ Naasa Yobu keengera irera kaamba:

² Ankyema shekee sha llya kasha, Kyeeri kilya Iruva eeshiringaa;

³ Kyeeri taa yakwa yeshimikyaa nrweny, Na kwa sa yeyo yakwe sheenda ireminy.

⁴ Kyeeri yekyo nshefikkya ukuuny lwakwa, Kyeeri umbuya lwa Iruva lwekee kyeny kwakwa.

⁵ Iruva muni finya ekee ando amwi Na vana vakwa veshiringitye.

⁶ Kyeeri yekyo nshekyeleya ummasiny, Myaamba yesheritya ngyusoka ta mafura!

⁷ Llyo shekwanannyaa na vamiku mwangony wa muri Na ikaa ando akwa ikwaanuuny.

⁸ Vakoo mmbo veshilollyaa vakasalala mbai, Na vamiku vakaoroka shumu kwa wiindi.

⁹ Vanini veeshilollyaa vakamalallya Vakavika maako awo kaniny naambo vandu vamalalye sau.

¹⁰ Ngyunyanga ta vasuri ntemalalyiswaa, Na kana fyawo fikaraywa.

¹¹ Wo nndu eitaa mbony takwa kashikundya mbora Na kanshilolya, kairikya mbony yeto sheelyi n-ta dede;

¹² Nshekiraa vaturi veshiiyaa ukiva, Na vana va ngwera valatiri nndu wa ivatarama.

¹³ Yewo veekekufii na imamika mmbo veshikunndyaa mbora, Mmbo shealwa vaka va dingu vakaiimba kwa ifura miriminy yaawo.

¹⁴ Usumanu llo lwekee isara lyakwa; Itana usumanu mfyo fyekee isara lyakwa.

¹⁵ Kwa vafu miso shawa miso a ivoora shia; Kwa fitongororo shava marende awo.

¹⁶ Kwa ngwera shava ndeye awo, Shakuitika ikureekkya usumanu lwa vandu shilaveishi.

¹⁷ Shefisha finya ta vandu varavi, Shavateva vaotore mifungwa vembakamara.

¹⁸ Lyo shakusara mmbo shifiiyaa kifuriny kyakwa shimalallyi; Mikonu ya muu wakwa mmbo ushiingifwaa sha nsanga.

¹⁹ Yeny sha nri utambarye mirari ya vayo mureny, Laura ya kyo ikafurisa maramba a vayo.

²⁰ Shawona usuri uiya wo nkonu, Na finya takwa tikava sha mfe na ura.

²¹ Kyeeri yekyo vandu mmbo veshiveraa na ishaarannya, Vakamalallya sau vaarannyi kindo shivaviaa.

²² Elyi shemaa irera mbewona kya yengerau fo, Marero akwa akavanong'ovia sha marony a mmbwa.

²³ Vandu mmbo veshiveraa sheelyi vaveraa mmbwa, Vakava sha vandu vaveraa kyeeri kya mateeri.

²⁴ Kyeeri veutapa mmbo shevaoraa kisangu kya ifura, Ikyela lya kisangu kyakwa vakakunanavia nakyo.

²⁵ Sheiraa mbee shavasongoya shavaora shia; Shava kwawo sha mangyi nnang'ani ya matorito; Sha nndu aviiryaa muu sha vandu vefiiywa.