YOBU 24 - BIBILLYA Mareiyo Meele a Iruva

¹ Ni inda Iruva muni finya alavikaa kyeeri kisumani kya irummbwa mwaandu; Ao n kyikyi yewo vamwiishi valaishi mikonu yeyo yakwe?

² Vandu veuta isaale lya minyanu ya marema, Na vengyi mmbo vaivaa findo fya ivikkya na ifivikkya.

³ Vakasoka vana va ngwera mishungu yaawo, Neereka ng'umbe ya nka wa dingu.

⁴ Mmbo vakunnyaa ngwera mbai ya shia; Ngwera va ulana mmbo vaovyaa mbee yaawo.

⁵ Kwa yekyo sha nshungu wa ngoroshony Ngwera nnyiruyaa shoonga kasa, Vaonise kyoose kya iniinga vana vawo.

⁶ Ngwera mmbo kivee nkuti varorwe misaaro ta fimu reminy, Vakarorwa reminy ta misabibu ya varavi

⁷ Kio tararaa mmbo valala mbereto valatiri soori, Kyeeri kya mbeo mbatiri kya ikusikkya fo.

⁸ Vakakapwaa ni mbwa ya fidoorony, Vakaovya masimambeny naambo valapwee.

⁹ Veefo vengyi vatakwaa vana va ngwera mbafuny ta va maye. Vengyi vakareka vana va ngwera.

¹⁰ Vana yewo mmbo varewaa vaende mbereto valaree soori, Vevyaa nganu na kunu vatirwa nshaa.

¹¹ Vasongosyaa varavi mafura awo, Ao ikama mfinyu kulaore nta vakeushosha.

¹² Uka miriny kyiiyo kya yewo vekeeffwa nkikeitiwa, Na yewo vakevaviswa mmbo varosaa unyanga veterevaa weekyi; Indi Iruva nnyakearannya ttwa kiterewo kyawo-fo.

¹³ Kwiifo vengyi varavi valakundye sa, valaishi shia ya sa, Na valakundye itira shia ta vayo.

¹⁴ Mwiwaa mmbo akupoo ngama nraasi, Naambo nandewaa ngwera na vaturi, Kio kikamfika ishora lyakwe ni iiva.

¹⁵ Ntuusi nawe mmbo averaa ireema lishe; Eambaa, “Nkwiifo nndu ashilolyaa fo.” Nalyo kasuruma kisangu kyakwe na soori.

¹⁶ Kio manyinyi llyo afishaa mmba, Indi nsanyiny mmbo akurayaa mmba; nta mmbeeshi deny sa n kyokyi fo.

¹⁷ Kwavo woose ireema ni sa ya ngama, Wo ni mbuya va fyereso na ireema iniini.

¹⁸ Indo mmbo mukeeamba: “Varavi mmbo vaipowaa uviny elyi mura usokaa, Ando awo ekaa akawuya iva nnda ndenge; Nkwiifo nndu eendaa reminy tawo ta misabibu fo.”

¹⁹ Sheelyi laura isheekaa kyeeri kya nrikye Ni indo kwa vafu kukeetafura varavi.

²⁰ Mashika ndeye na mae mmbo varekkywa vandu vawo, Nkwiifo umwi vankummbwa lyingyi fo, Ni indi uravi lufikaa sha nri.

²¹ “Varavi mmbo valamyaa vaka valatiri vana, Nta mmbatanya vaka va dingu nisha-fo.

²² Iruva, mmbo amamitaa vaafinya na finya takwe, Mmbo vakuboo vakafwa nrima wa ikaa na muu.

²³ Mmbo vakee varavi vakakulolya vakee na unapwe, Indi miso akwe mmbo allaa myeengye yaawo.

²⁴ Varavi mmbo vavesyoo kirambo da, numa vakasarumya, Vakanaa na isisya sha ire, Vakamannywa kwaasha mare moomu a nganu.

²⁵ Kwakooya kulaore ni indo, mmbi yeto ashiidimaa Yaamba sheelyi mmbo nkeamba wongo neshoora Sheelyi yekyo nkeamba nkwiiyo kindo-fo”