YOBU 22 - BIBILLYA Mareiyo Meele a Iruva

Kirouwo Kya Kararu Marero a Elifasi

¹ Llyo Elifasi Mtemi, karouwa Yobu:

² Ndesa nndu wa vandu avaa kyi kwa Iruva? Kya dede nndu atiri urango usha mmbo akuviiya mbusha yakwe muni nsi.

³ A mmbo kukusarye nkufurisaa Iruva kwa worotu lwafo? Ao kuwonaa mbusha kyi kwa kooya kulatiri mbese?

⁴ Mmbo kukusarye nyakee kusakira na ikuutya uvingo kimaruma yewe kumwiindyaa

⁵ Oode! Uravi lwafo ni uniini nnu! Ukasha lwafo llutiri umando fo!

⁶ Yewe nkulesoka mwana mau soori ya nreke; kwaipoo soori yeyo imwi nsi eitiri.

⁷ Kwa vaima mura valya vearaye; kwa vaima kyeelya valya vetirwa nnshaa.

⁸ Kwalekeya nndu atiri finya keepoo uteeri loose; kwara yeto akekundywa akaa fo.

⁹ Kwara vaka va ding'u vakweengye na maako aruu; kwaima vana vangwera wiidimi lwawo.

¹⁰ Kwa yekyo misoori mmbo ikurungukkye taari toose, weresi lwa tiny lwankuwoya.

¹¹ Ireema lyankuwoya kulalollye kindo; mura mwiingyi wankufindikira.

¹² Lwiishi Iruva akee efo uwe iruveeu, lola nyinyiri ta uwe deny shaasa tikee kwaasha!

¹³ Indi yewe mmbo kukeamba, “Iruva nkyi eeshi? Ndesa ashiidimaa irorova mafishi autye uvingo?

¹⁴ Mafishi maroo mmbo anrungukkye alakooye ilollya we mmbo arwarwa uwe ya ngina ya ulana!”

¹⁵ A-mmbo kukunde ilatya shia ta kasha yeto vandu varavi veetilatya?

¹⁶ Yewo mmbo veaiywa kulaore kyeeri kyawo kyansia, uvasha lwawo lukafwallywa kwaasha ni mura.

¹⁷ Yewo mmbo vevia Iruva, “Lakana neese! Na Yewe Iruva muni finya nkyi kushiidima uwe yeeru?”

¹⁸ Indi Iruva mmbwe aleishura mmba tawo ivesyo, kya indivakammbika kwaasha na mialye yaawo.

¹⁹ Woorotu mmbo valollyaa vakafura, vandu valatiri mbese vakavaseka na ivaila,

²⁰ wakeamba yee dede vakiduva veeru vammamitwa, na kilya valesarisau kyammamitwa m muro.

²¹ Ulaalu Yobu irikkyana na Iruva kuwoni unapwe, Llyo mesha akusheyaa.

²² Warya ufundo luukkye kwakwe; na kuvike marero akwe nriminy wafo.

²³ Kwa wuiya Iruva na ikunyiisa, kwanta uravi lukee kwaasha neewe.

²⁴ Kwa erya masaa afo sakeny, kwa era saabu ya Ofiri waambeny lwa mura.

²⁵ Iruva muni finya kava mmbwe saabu yafo, na fesa yafo ya uuru;

²⁶ naasa llyo kushiidimaa ifurya Iruva muni finya na illola na nsia;

²⁷ Nkunterevaa nawe akuarannyi, neewe kushiinutyaa fyaasa fyafo.

²⁸ Yekyo kyoose kurummbwaa nkishiinukkyaa nisha, na sa imikkyaa shia tafo.

²⁹ Kimmba Iruva atuula veekurosa, indi kakira vekunyiisa.

³⁰ We mmbo akiraa nndu alatiri mbese; yewe mmbo kukirwaa kwa mitannyi yafo misha.