YOBU 21 - BIBILLYA Mareiyo Meele a Iruva

Kirouwo kya Yobu

¹ Llyo Yobu karouwa:

² Aranyiny na nshusshwa marero akwa; Na kive nkyo kindo kya imuviirya muu.

³ Shisisiryeny shirere, Na shammaa irera engereny ishiinyala.

⁴ Ndesa yeny nshikefuuya nndu va vandu? Nkyekiny shiture usisiryo?

⁵ Shiloleny mutingwa, Sikkyeny kana na woko.

⁶ Shakusara yekyo kileshikooya mmbo shikeesavaa Mwiilyi ukeenda saafu kwa werei.

⁷ A nkikiny varavi vakeengera ikaa na muu? Niinda finya tawo tikeengereka fika ukuuny?

⁸ Mmbo valollyaa vana vawo vevesywaa; Na ngyeeri tawo vewonaa finya.

⁹ Kwawo wo kindo kikee ufoony na kuleefo weresi; Nta mbiiri ya Iruva nkyikee vakooya-fo.

¹⁰ Yee, ng'umbe tawo toose tikeengereka, Tikafyaa kulefo ukiva loose.

¹¹ Vana vawo vadu vakarrwa sha ironda; Nawo vakee fina mbasa;

¹² Mbafinaa mbasa na maranda Na ifurya unyanga lwa fivale.

¹³ Mmbo vakaa na muu vevesywaa Numa vakafwa na ufoo.

¹⁴ Mmbo vaviyyaa Iruva kulalulyise ukiva-fo! Llukundye imanya shia tafo-fo.

¹⁵ Iruva muni finya nkyokyi kutani llunrundye? Llukee wona mbusha kyi lukantereva?

¹⁶ Ivesyo lyawo nshi llyikee maakony awo, Ra neelyi vavikkye Iruva kwaasha na fyama fyawo?

¹⁷ Nkeenga kulellollya sa ya nravi irumywa, Vakakooya iwoywa n renga? Ao Iruva alenkooya ivamamita na unyafi lwakwe?

¹⁸ Naakwaa ni indo vawiwitwa sha mare moomu, vave sha muulu wa ipowa ni kitita si!

¹⁹ “Yeni mmbo mukeamba, Iruva mmbo areeye vana vawo ngapo ya vandu yewo varawi. Nkyikyi are alavataiya wo weni vakooye imanya!

²⁰ Valollye wo veni vemamikaa; valollye wo veni unyafi lwa Iruva muni finya.

²¹ Mashika vakamfwa vatinywa kyi vana vawo, kyeeri mikonu yawo ifika ufishyony.”

²² A nndu wa vandu ashiidimaa ilosha Iruva umanyo, Iruva muutya vekaa uwe iruveu uvingo?

²³ Nndu nyafwee ufishyony lwa ivessyo lyakwe, akee ifureny deny na ufoony;

²⁴ Eishywe masima shapu mwilyiny wakwe, na mafua akwe eetiri finya.

²⁵ Ungyi mmbo afwee na tingwa nini ngoony, kulaore alenshosha kindo kyoose kisha.

²⁶ Naakwa ni indo woose mmbo vafwee na irikwa, woose mmbo vasikkywa n fusa.

²⁷ Aranyiny! Yeny shiishi makusaro any moose, na miallye yaany ya ishiinyala,

²⁸ Vai mukee vesa, “Nkwi mmba ya n niini ikai? Nkwi ikai mmba ekaa nndu nravi?”

²⁹ A mmbo kulaore mulemmbesa veira shya, mukairikyana na yekyi valemuvia?

³⁰ Nravi mmbo aturunywaa nkonu wa renga kakirwa nkonu wa unyafi!

³¹ Mmbi asakiraa nndu nravi? Ao antaa kya efyo fyoose atannyi?

³² Kyeeri ashiipowaa kifuny, kifu kyakwe n kivikywaa varingyi.

³³ Vandu veengyi mmbo valatyaa numa na vengyi veengyi deny vakaira mbee yakwe. Kyeeri akeerikwa, uteeri lukaolotwa waarya.

³⁴ Mmbo mushiidimaa indaany ishiviirya muu na marero a ruu? Firouwo fyany fyoose mfitiri kindo kuuta wongo-fo.