YOBU 20 - BIBILLYA Mareiyo Meele a Iruva

Nrerye wa Karaaru wa Sofari

¹ Llyo Sofari Mnaamathi karouwa:

² Makusaro akwa akeshaalwa shikurouwe, Nta nshishiidimaa ikusiika se fo.

³ Shiitye mavavaso shilaidimaa isisirya, Indi urango lwakwa llukeeshikuna shikurouwe.

⁴ Yewe kyikee sheelyi mmbo kwanrekkywa mbony yei: Sheelyi ukya kasha Iruva mmbo eumba nndu ulaniny,

⁵ Nravi mmbo akushele kya uvisho lwake kyeeri kyaangu-da. Yeto nalashiinndya Iruva ifura lyakwe llya kyeeri kyaangu-da!

⁶ Naakwa alollya wiidimi lwakwe lwang'ana fika ng'iniu, Na nrwe wakwe ukandefika mafishiny.

⁷ Indi mmbo asheerwaa kwaasha sha kirishe. Valya vemwiishi vakuwese “Nkwi akai?”

⁸ Ammaya sha yoorya, are nalalollywa lyingyi, Avivike sha moorya a nkyo.

⁹ Yeto alelollya nnakaa alollye lyingyi fo. Nta alya ekaa nkukyimanyikaa se fo.

¹⁰ We muni kuti naviire masaa akwe moose, Vana vakwe vaterevaa ilyilywa ni ngwera.

¹¹ Ra neelyi ekwiitye iishwa finya ta ukoo, Indi shoose tilakaa nawe kiluulyi.

¹² Kaniny kakwe uravi llurolaa sha sukari, Mmbo alusurummyi si ya ulumi lwakwe.

¹³ N nakundye ilulotora ttwa fo, Indi kalutirya kaniny kyakwe.

¹⁴ Indi kyeeri lufikaa ndewuny lukava kivawo, Kivavaa ngota uroi lwa shoka.

¹⁵ Nravi n nyamiraa masaa a ulembi na iraaka; Iruva mmbo autaa efo ndewuny yakwe.

¹⁶ Kindo vanndu va ravi vamiraa mmbo kyikee sha urowi; Mmbo kivarumataa uviny sheelyi vamaarwa nshoka shinnyaasi.

¹⁷ Nnyakaa na Muu nallye iviiri lyisokaa-fo, Nta mifongo ya iwonisywa umasi fo.

¹⁸ Ndunda ta nrikye wakwe ashelotoraa, Nnyashiidimaa iva na wiidimi lwa ishosha-fo, Nnyaonaa mbusha ya nrike wakwe-fo,

¹⁹ kimaruma alemamita ngwera na ivara, Karaakkwa mmba kulaore alentana.

²⁰ Kimmba waafu lwakwe lulatiri umando, Nnyashiidimaa ikira nta kyimwi kitiri mbusha kwakwe-fo.

²¹ Numa ya ilya nnalera nta kiraambu-fo, Kwa yekyo iviiri lyakwe n lyikaa fo.

²² Ufishyony lwa ivesyo ukiva llumuwoyaa, Renga ntimuwoyaa na finya shoose.

²³ Eetaulyaa iwurisa ndeu, Iruva amweengyee unyafi lwakwe, Mmbwa impusukkye sha shoonga yakwe.

²⁴ Kungyi ashiidimaa ikkya upanga lwa minya, Lyo ashevawaa wa arera.

²⁵ Mfye ushomowaa uuka nyaminy takwe; Nrwe wa vayo ushomowaa mungony vakwe wimikaa, Weresi lwa ufu lumuwoyaa.

²⁶ Mbeshe takwe ntilyamarwaa, Muro wa wende ummamitaa; Yekyo kiseeri kyeny kwakwe kimamitwa.

²⁷ Ngina mmbo ishesukkwaa uravi lwakwe, Ulana lushensakiraa.

²⁸ Masaa akwe mmbo asokwaa Mikonuny ya unyafi lwa Iruva.

²⁹ Yekyo nkyo aniingwaa nndu nravi kyuuka kwa Iruva, Nkyo nndu nravi akee mvaalye ni Iruva.