YOBU 19 - BIBILLYA Mareiyo Meele a Iruva

Kirouwo kya Yobu

¹ Naasa Yobu karouwa:

² Mmbo mushengeraa ishilisa ukiva fika indii; Na ishifisha-fisha na marero?

³ Matorito yaa moose ikumi mwanshisakyira. Nta mmulollye sony ishitannya fikasha?

⁴ Naakwa sherengye dede, Irenga lyakwa nlyeshikoye yeny shimuni.

⁵ Mmbo mukeshiinyala naambo mukurose; Mukaashiutya uvingo kya inyiiswa lyakwa.

⁶ Manyiny sheelyi Iruva anshitannya fikasha, Na ishiwara na nreiyo wakwe.

⁷ Lola shikekapa kyorongye “Mbaria!” Indi shikee rouwa fo. Shavaanga na unyanga waasha, Indi nshikeewona usumanu lwakwa-fo.

⁸ Shia yakwa annyiringitya na isimamba naambo shilaire, Kavika shia takwa ireema.

⁹ Kashaambwa utore lwakwa; Kashuuta ureto lwakwa nrweny.

¹⁰ Anshifisha taari shoose, shansya; Ivika nsia lyakwa kalyiillwa sha nri.

¹¹ Kashaatya unyafi lwakwe uwe yakwa; Kashaalwa sha nkiduva wakwe.

¹² Matorito akwe akashisheya ando amwi; Akasongosya shia ya isha kwakwa, Vakareya meema vakashiringitya.

¹³ Iruva kavika vana va ma-kwaasha; Mbuya vakwa vaniini vakashoovya deny.

¹⁴ Va mmba yakwa na mbuya takwa mbakeekisheekya lyingyi-fo, Valya vashiishi vakavikwa kwaasha.

¹⁵ Veni kyeny kwakwa vanshirekkywa; Mashinga akwa a kyika vakashilollya sha muny. Yen shava kwawo sha nndu valamwiishi.

¹⁶ Shavaanga kishinga kyakwa indi n nakee irika fo, Kyikava n kuti shinlelembe deny na marero.

¹⁷ Shammba kiraa kwa nka wakwa; Kisuya kwa vana va ma vakwa shimuni.

¹⁸ Naakwa ni vana vadu mmbo vakeeshiinyala, Wo kyeeri shikesomukkya vakashiteenda.

¹⁹ Mbuya takwa vaniini vakashisswa, Valya shevakundye vakashikapa mungo.

²⁰ Mwiili wakwa wansaa-u iffwa na shonyi, Shakiiya mbaa numa ya ireta fyoose.

²¹ Shillyillyeny, Shillyillyeny yeny mbuya takwa; Mashika woko lwa Iruva lwanshivenya.

²² Nkyikyi mukee ishisora sha Iruva? Nyinda mulakee ifura na mwiili wakwa?

²³ Nkyeni marero akwa ereiywaa! Nkyeni ereiywaa kyitabuny!

²⁴ Nkyeni ereywa na minya na mborro Uwe ya iwe naambo akee-u llung'anu!

²⁵ Shiishi nanshushwa mwiikira wakwa eefo na muu, Ufishyony we mmbo ashiniingaa usumanu lwakwa yaa kweni ulaniny.

²⁶ Numa ya shonyi yakwa ilyamarwa indi, Shishelollyaa Iruva na miso akwa shimuni.

²⁷ Yeny shimuni shikwaanannyaa nawe; Yeny shimuni nta nshi ungyi-fo shinlollya na miso akwa. Nrima wakwa

²⁸ “Yeni mushiidimaa ikurerya: Llunsoria ngata kyi? Na mbony toose nkwakwe tikai.

²⁹ Ereya mashora a usu, Mashika nyashi mmbo yeende ngapo ya usu, Naambo kwiidimi imanya sheelyi kwiifo mwileta mwaandu.”