YOBU 15 - BIBILLYA Mareiyo Meele a Iruva

Kirouwo kya Kavii Marero a Elifasi

¹ Naasa Elifasi Mtemani kaverouwa:

² A ndesa nndu wa urango usha mmbo arouwaa marero a urung'ani? A, ndesa yeto mmbo eeshwe marero a ruu?

³ A ndesa nndu wa urango usha mmbo akureekkyaa marero alavaa ao kwa marero alatiri mbusha?

⁴ Indi yewe mmbo kukeeila wereesi lwa Iruva; na ilema iitumuso mbee ya Iruva.

⁵ Uravi lwafo llo lukee losha kana kyafo, neewe kwa sauwa irera sha nlembi.

⁶ Mmarero afo kumuni akekuuttya uvingo n shi yeny fo; mirerye yafo yakukureekkya kumuni.

⁷ A ndesa nnyewe nndu wa kipooka iwonika? Mmbo kuwonikkye kulaore mafumbu a mmbikwa?

⁸ Kwammiita marero yoo a kirika auka kwa ruva? Ao nnyewe kumuni kutiri urango usha?

⁹ Nkyokyi kwiishi kulaore yese lwiishi? Nkyokyi kwaidima imanya, yese lulamanyi?

¹⁰ Nnang'ani yeeru mmbeefo vamiku vatiri urango usha, vatiri myaaka miingyi ngota ndoo.

¹¹ A ndesa iviiryo muu ni Iruva n kindo kyaangu deny? Ao ndesa irero lyakwe lya ufoo kwafo nshi kindo?

¹² Nyindo ngoo ikekukuna iroywa nngoo na ing'atwa miso a unyafi?

¹³ Kutani kwa rengya Iruva na irera marero maravi indo?

¹⁴ Nndu nkyokyi kutani aidima iva nsaari? Ao yeto akeemwiire ni nndu nka kutani aidima iva nsaari?

¹⁵ Kwa kooya Iruva nalairikye nta veele vakwe, nta ngina ntikee shaa mbee yakwe-fo,

¹⁶ nng'a nndu wa vandu akee kiraa na nreti nndu atanaa uravi sha ina mura.

¹⁷ Ulaalu shiarannya shikoore, shikuvie filya shilenllolya,

¹⁸ ufundo lwa vandu vatiri urango usha mbony tilya vamiku vao kulaore vetisuruma,

¹⁹ valya Iruva evaniinga uruka wo weni, nta nkwiifo nndu eira nnang'ani yao fo.

²⁰ Nravi nnyalyaa ukiva lwa mavavio wo nkonu, myaaka myoose vavikkyo variiti

²¹ Ngyunyanga ta weeresi tikapaa kyorongye maarwiny awo, kyeeri vakusarye ufoo vasoki mbavavoyaa.

²² Nravi nnatiri nsia wa yuuka ireminy fo; ufishyony lwakwe ni ifwa na upanga.

²³ Nnaraaraa eruyaa shoonga, eambaa “Nkwi ikai?” Eshi sheelyi nkonu wa ireema uke kufii.

²⁴ Ngatara na mavavio fikemwerese; f1ikansheya sha kilung'ati kya mangyi ngapanuny.

²⁵ Kimaruma aleorwa woko lwakwe amini Iruva, kakara imina Iruva muni finya;

²⁶ karisha kwa umbafu nakapani nawe, kunu arie ngao itiri matibo ang'ani.

²⁷ Kisangu kyakwe kikapollya mafura, na kisi kyakwe kiishwe mafura.

²⁸ Nnakaa urukeny lwa nrapu mmbeny tikee sama, mmba tesenyi tive irina lya urumato.

²⁹ Nndu yeto nnavaa isimba ttwa fo; nta umasi lwakwe llukaa urukeny fo,

³⁰ nnashiiyamaa ireema lya ufu-fo. Vipala-pala fya muro fishumisaa maa takwe, vivaro fya vayo fivivitwaa ni uraato,

³¹ ngoma nndu nalavikaa nsia findo fya urung'ani na ikulemba, mashika urung'ani llo luvaa utore lwakwe.

³² Atawaa kya usumanu kulaore amfwa, na ngyeeri yakwe nnyikaa urukeny-fo!

³³ Nnyavaa sha nsabibu ushaangarisaa ndunda mbisi, sha nseituni ushaangarisaa fivaro fya vayo,

³⁴ woose valashiindyaa Iruva mbaonisa vana fo, muro ushemamitaa matengo a veelya mbaria.

³⁵ Wekurika ulembi na iwona uravi, mirima yawo ialyaa ulembi.