YOBU 11 - BIBILLYA Mareiyo Meele a Iruva

Kirouwo kya Sofari

¹ Naasa Sofari, Mnaamathi karouwa Yobu:

² A, nsemu yeu moose wa marero kure kulaifo nndu akurouwa? A ndesa nndu wa marero meengyi mmbo aora sheelyi n natiri mbese?

³ Ndesa irera ree lyafo mmbo kumalalisaa vandu? Na kwa kooya kwa inyala, a ndesa kwiifo nndu akusutaa?

⁴ Yewe mmbo kukeamba, “Ekyo sharera nkya dede, n shitiri mbese mbee ya Iruva-fo.”

⁵ A nkyema Iruva etarammbwaa kana kyakwe aute unyanga lwakwe akurouwe!

⁶ Mmbo eekuvia kirika kya urango usha, mashika we atiri urango wiingyi. Manya sheelyi Iruva mmbo akweekennya siye tafo toose.

⁷ Ndesa kushiidimaa iitumuso kirika kya Iruva na imanya ufishyony lwakwe we Iruva muni finya?

⁸ Uniini lwakwe lwiiriye iruveeu, yewe kushiidimaa kyi?

⁹ Waasha lwa vayo lwiirye waasha lwa ulana, lukairya ivari lya yeeve.

¹⁰ Kwa kooya Iruva aira, kafinga nndu na imuutya uvingo, a mmbi ashiidimaa illemya?

¹¹ Iruva mmbo eeshi vandu valavaa; kallolya uravi we mmbo akyeemya.

¹² Nrung'ani nnashiidimaa iva na urango-fo, Kyoongo kya ngoroshony n kyoongo da

¹³ Yobu kwaalwa ngoo yafo shorotu, mmbo kuinwaa maako afo kutereve Iruva!

¹⁴ Kwa kooya kutiri ukasha kulwerye kwaasha. Kulairikye ukasha lukae mmba kwafo-fo.

¹⁵ Yoo llyo kusomukyaa mbee ya vandu kulatiri mbese, kutiri finya kulakee na weerei.

¹⁶ Mmbo kurekywaa ngatara tafo shoose; mmbo kutikumbwa a n-si sha iruruma lileira.

¹⁷ Muu wafo ushevaa mwaa pyai ngota mwi kyeeri kya nsanyiny, ireema lya vayo lyishaalashikaa live sha imika lya ngama elyi kukeekya,

¹⁸ kushevaa na ukaari mashika kutiri kindo kuvikkye nsia, kuringwaa na kuimuye kippwa.

¹⁹ Kushelala kulaifo yereswa ni nndu; vandu vengyi vashekuterevaa weekyi.

²⁰ Indi varavi miso awo asherekaa; shya shoose ta irishya tisherekaa; ivika nsia lyawo lya mafurumyony ni inutuka.