YOBU 10 - BIBILLYA Mareiyo Meele a Iruva

Marero aifurumya a Yobu

¹ Mmbo shisuuye muu wakwa! Mavavio akwa mmbo shishoongwaa kulefo kyindo kyishiimaa. Shiambaa kya ivawo n ngoo yakwa.

² Mmbo shivia Iruva: kulashiutye uvingo. Shimanyisya kimaruma kya iwakyana.

³ A, ni usumanu yewe ishiwonnya, iinyala mashora a maako afo na ikundya miallye ya varavi?

⁴ Ndesa mmbo kutiri miso a vakkye a nndu wa vandu? Mmbo kulolaa shaasa nndu wa vandu allaa?

⁵ A mikonu yafo ivakkye ya nndu wa vandu, ao myaaka yafo ivakkye ya nndu wa vandu?

⁶ Kutani kwa sununda irekwa lyakwa na iruuya ulyamari lwakwa?

⁷ Yewe kwiishi sheelyi n kwiifo kindo shilyamarye fo, na nkwiifo wa ishiauwa maakony afo-fo.

⁸ Maako afo mmbo eshiombomba na ishiumba, indi ulaalu mmbo kukeinnduka kushimamite.

⁹ Kummbwa sheelyi mmbo kweshiumba na uteri. A ndesa mmbo kushiviirase kilulyiny?

¹⁰ Ndesa nshi yewe kweshileta sha malela, na ishivirisa sha mafura a malela?

¹¹ Mmbo kweumba mwiili wakwa na maffwa na mirarii, kwasikkya mmaffwa akwa na nyama na shonyi.

¹² Kwashilyimya muu na ulyilyi, waarya lwafo lukakira muu wakwa.

¹³ Naakwa n indo mbony yeto kwatisuruma ngoony. Indi shiishi ni indo kwelangye.

¹⁴ Mmbo kwekeevereya shilyamare, naambo kulemi ishisarya ulyamari lwakwa.

¹⁵ Kwakooya shikee nravi, oshiny lwakwa! Kwa kooya shikee nsaari nta nshishiidimaa irumanafo; mashika mmbo shiishywe uravi, shalola mavavio akwa.

¹⁶ Shaipoo nrwe nsi mmbo kukeeshiisa sha miiso na ishikoninda lyingyi na ngyende tafo.

¹⁷ Wo kyeeri mmbo kutiri nkureekyi uwe yakwa; kwaengera unyafi lwafo uwe yakwa; kwashiengye vakiduva vaiya vashiwoye.

¹⁸ “Woi Iruva a n kyikyi kweshiuta nsangen wa ma? Nkyeni shefwaa kulaore vandu vanshilollya.

¹⁹ Mmbo nsheerawaa na kifuny lyimwi, shive sha nndu kulaore alenkaa na muu.

²⁰ A mikonu ya muu wakwa n shi myaangu? Shira shivoni iviiryo muu kinnyo,

²¹ kulaore shammeenda efo kulaore shiwuyaa, efo kutiri uruka lwa tingwa na ireema iroo;

²² Uruka lwa ngusana, efo sa ya vayo ivakkye ireema.”