YEREMIA 9 - BIBILLYA Mareiyo Meele a Iruva

¹ A nkyema nrwe wakwa vekee ni kyirori na miso akwa ekee usoka lwa misoru, shikabe kyiyyo nsanyiny na kyio, kya ishishwa lya vandu vakwa.

² Kukooye shetiri ando ekaa yefo nng'alo, na shilakani na vandu vakwa deny sheende kwaasha nawo! Mashika mmbakee vatuusi, ni ironda lya variingyi.

³ Mmbannwaa ngyulumi tawo, itemeena na wongo nfilevanga urukeny; mashika mbaleengyere uravi uwe ya uravi, nta mbashiishi-fo, ni Nndumi Iruva aamba.

⁴ Kwiiseny wo nndu na amrasa wakwe, nta nndu nalavike mwanamaye nsia-fo, mashika wo nndu mmbo akee nkunang'ari, na wo amrasa nyeenda efo neefo sha nriingyi.

⁵ Wo nndu mmbo akeereta yeto ungyi, kuleefo nndu mwiamba dede. Vakalosha ngyulumi tawo yaamba wongo; mmbatanaa uravi nta valakunnde ikurya.

⁶ Vakoombya yaafinya uwe ya yaafinya, na ulembi lukasora ulembi, vakalema ishimanya yeny, ni Nndumi Iruva aamba.

⁷ Kweekyo, Nndumi Iruva muni matorito aamba indi: “Lola, mmbo shiveesaa sheelyi mfuru eetaa minya murony, a ndesa nkyi kyingyi shitanaany kwa vandu vakwa?

⁸ Ngyulumi tawo mmbo tivakye mife ya uroi; ntireraa ulembi; wo umwi kaniny mmbo areraa na ungyi nisha, lyo ate nriminy mmbwakwe nnyakeala immboya.

⁹ A shiraa shilavakapa kya findo efyi? Ni Nndumi Iruva avesa; a shitaiyyaa-se kyiduva isanga lya ngata yei?”

Fyeeri fya iyya na ifuuya

¹⁰ “Kwiipo kapeny kyiyyo na yoongora kya mafumbu, na iffwa kya ngorosho ta nng'alo, mashika mmbo fikee imamika nta nndu ashiiraa-fo, nta yaana lya findo llyiitiwa-fo; ndeye ta nginii-u na mafisi a ngoroshony nfyanrisha na imaya.

¹¹ Nshishaallwa Yerusalemu mbillya ya sama, nndeshe wa maparwe; shisheallwa miri ya Yuda ive nrapu, kulaifo vandu.”

¹² A mmbi akee nrango indo naidimi imanya ekyi? Yeto kana kya Nndumi Iruva kyilenreria, naambo navambise? A nkyikyi uruka lukee sama sha kasa koomu, kuleefo nndu ashiira-fo?

¹³ Nawe Nndumi Iruva kashivia, “Kyimaruma kya irekwa ivavaso lyakwa shilevaniinga, nta kulare valeindya unyanga lwakwa, nta itana kyikwaani nalo,

¹⁴ indi kya umbafu vakalatya makusaro awo veni na ilatya Mabaali, shaasa veloshwa ni vande vawo.

¹⁵ Kweekyo Nndumi Iruva wa matorito, Iruva wa Israeli: Lola, Nshishaaka vandu yeva ndoko, na ivaniinga mura utiri kireeyo.

¹⁶ Shishevanyanyata masangeny kulore nta vamiku vawo veeshi; shisheruma usu luvalatye, fika luvamamite.”

Vandu va Yerusalemu vafuuya ngaarami

¹⁷ Nndumi Iruva wa matorito aamba: “Angusieny, vaangeny vaka vaffwe; ruuyeny valya veeshi nnu ikapa kyiyyo;

¹⁸ veeluye na vapooke yoongora kyeru, naambo miso eru naiyye misoru na yuuta mura.

¹⁹ Naambo kyiyyo kyiitiwa yefo Sioni, ‘A ni inda lwamamitwa! Lwansukkywa deny, kya elyi lwarisha uruka, elyi valewundwa mmba teeru.’

²⁰ Yeni vaka arannyiny irero lya Nndumi Iruva, looteny kuri kany mwiite irero lya kana kyakwe; losheny vana vany va kika ikapa kyiyyo, na vaamrasa fiimbo fya ufu.

²¹ Mashika ufu lwallusheya lwaanga na matiriisheny, lukaanga na mmba ta usuri, lukarumatya vana efo shieny ta muri na vasoro efo makwaanuny.”

²² Rera kwaamba, “Nndumi Iruva aamba, ‘Minying'a mmbo inanakkye efo mbateny sha kyirashi, myuumbira sha ya fimu, nta kulaifo mwiiyumbya.’”

²³ Nndumi Iruva aamba: “Nndu nrango alashekushopya urango lwakwe-fo, nta atiri finya nalakushopye finya yakwe-fo, nta nndu atiri umasi nalakushopye umasi-fo;

²⁴ indi lyo yeto mwikoshopa nakushopye ishimanya na ashiishi yeny, sheelyi yeny ni Nndumi Iruva, shitiraa ikunda lya dede, uvingo lwa dede na usumanu urukeny; Efi mfyo fishisennyi. Ni yeny Nndumi Iruva shaamba indo.”

²⁵ “Lola, mikonu ikeesha, Nndumi Iruva aamba, elyi nshekapaa yewo varine nyameny nsi

²⁶ Misri, Yuda, Edomu, vandu va Amon, Moabu, neewo woose va kasa koomu, yewo vafiisa fii tawo; mashika masanga yaa moose mmbakee varini-fo, na mmba shoose ya Israeli nnyirinnyo mirima-fo.”