YEREMIA 6 - BIBILLYA Mareiyo Meele a Iruva

Yerusalemu washingillyo ni vakiduva

¹ Risheny mmukyire muu yeni vandu va Benyaminy, ukeny kunu Yerusalemu! Kapeny iranda kulya Tekoa, mwaate na muro wa wiikimbi kulya Beti-akeeremu; mashika ngapo nnyikeeyaamayya yuuka taari ya ndoo na urumato uniini.

² Mbeu shiiyya na shimamiri nshisheilyamaraa, ni mfu va Sioni.

³ Veesi na maronda awo a moonri mmbashemmbinngyaa; mmbashemmanyaa ulale na meema awo, vasheesa findo wo umwi ando akwe.

⁴ Kudeesye inkapa; kutakureny, nndeny lummboye nsanyiny kyere! “Woshiny llweru, mashika nkonu wankyikyina, mashika firishe fya nkwaany nfikeilyaa.

⁵ ‘Kutakureny, nndeny luukabe elyi kio, lulyamare mmba takwe ta usuri.’

⁶ Mashika Nndumi Iruva wa matorito aamba indi, ‘Arambweny miri yakwe songoseny mitaato iringitya Yerusalemu. Yeu ni muri ukee kuti ukapwo, nkwiifo kyindo kuuta ni ilyilyiswa-fo.

⁷ Shaasa kyirori kyiruta mura nsha, ni indo nawe aruta uravi; kyituuru na ulyamaro nfikee nnang'ani yakwa, ndwari na fishavere nfike mbee yakwa mikonu myoose.

⁸ Kwiise, yewe Yerusalemu; nrima wakwa ulasheelakana neewe, shikwaallwe sama uruka lulakaywaa ni vandu.’”

Umbafu lwa Israeli

⁹ Nndumi Iruva muni matorito aamba ule, “Sangyireny sasari ta Israeli sheelyi musangyirya sasari ta nsabibu; sha mwiisangyirya sasari ta nsabibu, iita woko lwaffo lyingyi yefo firambeny.”

¹⁰ “A nshirera navi, shinrike wiikyimbi wamwaaranyi? Lola mmbafinikkye maarwi, mmbakeyaarannya-fo; irero lya Nndumi Iruva kwawo ni kyindo kya tangalu, mmbalyifuryaa-fo.

¹¹ Kweekyo nshiishwe unyafi lwa Nndumi Iruva, nshammayaara ilusiika. ‘Lettya vana vakwe yefo shia na makwaanuny a vana vakoo, mmi na nka veepowa amwi, vamiku na vakuu deny,’

¹² “Mmba tawo Ntiningywa vengyi, marema na vaka vawo amwi, Mashika mmbo shishooroya woko lwakwa vandu va uruka. Ni Nndumi Iruva aamba.

¹³ Mashika nka n-ndu fika nniini waawo, wo umwi atiri lango ta ilyima na uka nkisuku fika nkohani, wo umwi akee llembi.

¹⁴ Mmbo vakeevavara fyaasha fya vandu vakwa uwe-uwe, veeshaamba unapwe, unapwe nta kuleefo unapwe.

¹⁵ A vesukkywa llya velyang'aa? Ode, mmbesukkywa tusu-fo; mmbemanya itirwa sony-fo. Kweekyo mmbawoo sha yewo wawee; shishevakapaa llyo vatuulwaa,” ni Nndumi Iruva aamba.

Israeli alakana na uramba lwa Iruva

¹⁶ Nndumi Iruva aamba, “Salaleny mbai ya shia, mulole, muvese myeengye ya kasha, kundo iriko isha lyikai; mulyilatye muwonise kyiimuyo kya mirima yaany. Indi vakaamba, ‘Llushiirafo-fo.’

¹⁷ Shakuvikkya varingyi, shaamba, ‘Itumuso unyanga lwa iranda!’ Indi mmbakeeyamba, ‘Llushitumuso-fo.’”

¹⁸ Kweekyo aranyiny, yeni masanga, mumanyi yeni ikwaanu, yekyo kyivakooya.

¹⁹ Arannya yewe uruka; Lola, shikeyeenge renga vandu yeva, ndunda ta mitannyi yaawo, mashika mmbaleitumuso marero akwa-fo; shaasa kyikwaani na ivavaso lyakwa mmbalelyilema.

²⁰ A nkyimaruma-kyi sheengywa ubani luuka Sheba, ao findo fifwaama fyuuka uruka lwa kwaasha, firaso fyaany fyeekora na muro fisumani-fo nta firaso fyaany fya muu nfishisennyi-fo.

²¹ Kweekyo Nndumi Iruva nnyaamba, “Lola, nshishevareiyya iwe lya itumbullwa na lyivatumbullwe, vande na vasero amwi, vaamurasa na vambuya vamamike.”

Isanga lyooka na ndoo

²² Nndumi Iruva aamba indi, “lola, isanga lyikeesha lyuuka na ndoo, isanga iniini llyikeituta lyuuka uruka lwa kwaasha deny.

²³ Mmbariye ura na ifumu ni vambafu, nta mmballyillyaa-fo, na irig'inda lyawo sha lya yeeve; mmbasaamye frasi mmbaree sha ndu asheenda fireny kyilasha kyafo yewe mfu wa Sioni.”

²⁴ Lwammiita rumi ya wayo; maako eru akava mareeree, lyammboywa ni fyoova; usu sha lwa nka ashiiraa mwana.

²⁵ Muleende mareminy, nta muleere shia; mashika nkiishi arie usu, usau llukee taari toose.

²⁶ Yewe mfu va vandu vakwa, raa makunnya, kwalale mafwiny; kapa kyiiyo sha kya mwana va ngitany, kyiiyyo kya uvawisi lwiilannyi mashika mwiilyamara nnyalusheyaa tiny.

²⁷ Nshakuvika kuve mfuru na mwiesa nnang'ani ya vandu vakwa naambo kumanye na yeesa shia tawo.

²⁸ Woose mmbo vakee valyang'a vakailannya, varingyi; mmbakee arera na minya, woose deny mmbalamyaa.

²⁹ Mariko a yeeta minya nnyakeyaaka kyuumu, risasi nnyikeemamitwa ni muro; muro ni waruu-da, mashika veesi mmbakeiyuuka-fo.

³⁰ Mmbavaangwa mbulula, mashika Nndumi Iruva ammbalema.