YEREMIA 52 - BIBILLYA Mareiyo Meele a Iruva

Iwa lya Yerusalemu

¹ Sedekia mmbo etiri myaaka makumi avii na umwi kyeeri eva mangyi; nawe kashillya Yerusalemu ando a myaaka ikumi na umwi. Irina lya maaye evaangwa Hamutali, mfu wa Yeremia wa Libna.

² Mitannyi yakwe ikava mikasha mbee ya usangu lwa Nndumi Iruva, ngata ilya sheni ya Yehoyakimu.

³ Kya dede, ngata Nndumi Iruva itirwa ni nyashi ing'ani kyimaruma kya Yuda na Yerusalemu, mmbo ewoombutya kwaasha na usangu lwakwe. Nawe Sedekia kava kyilasha na mangyi ya Babilony.

⁴ Kwikee nkonu ikumi, mwiiri va ikumi, mwaaka wa kyeenda wa ushilyi lwakwe, Nebukadnesa mangyi ya Babilony kasha we kyimwi na itorito lyakwe lya fira ishekabana, katira muri wa Yerusalemu kauringyitya riti.

⁵ Nalyo muri ukava nringyitye indo fika mwaaka wa ikumi na lyimwi wa ushilyi lwa Sedekia

⁶ Kwikee nkonu wa kyeenda mwiiri wa kaana vandu woose wa muri vakatirwa nshaa niini mashika shoonga yewiika urukyeny.

⁷ Naasa isimamba lya muri lyikawunduwa na vasikari va fira woose veifo vakasumuka poo ya muri elyi kkyio valelatya shia ya mwaango nniini ukee nnang'ani ya masimamba avii kufii na nnda wa mangyi vakeenda taari ta Arabia. Lla neelyi itorito lya Vakaldayo veeringitye muri moose.

⁸ Indi itorito lya Vakaldayo lyikalatya mangyi Sedekia numa kutani vandentirya waambeu lwa Yeriko; na itorito lyakwe woose vakanyanyaka.

⁹ Sedekia ekitirwa karawa kwa mangyi Nebukadnesa kyeeri ekee muriny wakwe wa Ribla taari ya Hamati, na alya kweni Nebukadnesa kanrumbuya mwandu wakwe.

¹⁰ Yoo kweni Nebukadnesa kawaa vana va Sedekia eelollye, na vasongoru va Yuda kiwo.

¹¹ Numa kavavasya Sedekia nailuwa miso, kavikwa minyororo karawa Babilony. Sedekia mmbo alekaa kifingyony kulya Babilony kutani afiyya-fo.

Urumato lwa mmba ya Iruva

¹² Kwikee nkonu wa ikumi wa mwiiri wa karaanu wa mwaaka wa ikumi na kyeenda wa ushilyii lwa Nebukadnesa, nngari niini ya mangyi we Nebukadnesa akee nniini wa vasikari, kaanga Yerusalemu.

¹³ Kakora mmba ya Iruva na efo kwa mangyi, na mmba toose ta vandu vasongoru va Yerusalemu,

¹⁴ na vasikari vakwe nawo vakawunndwa isimamba lyoose lya muri wa Yerusalemu.

¹⁵ Naasa Nebukadnesa kakamara vandu woose valya vensaa kulya Yersalemu na mafundi valya vensaa-fo na valya venkulunga na Vababeli.

¹⁶ Lyo vandu valya vakiva deny kavara efo Yuda, vandu kulore veetiri nta kindo, kavavika varemi misabibu na marema engyi.

¹⁷ Na ngo ta minya idodorye ta mmba ya Nndumi Iruva, na firembo fya iruva lya minya fyekee efyo mmba ya Nndumi Iruva. Vashivya vefifisha-fisha fyoose vakeepoo minya tavayo toose vakarwaa Babilony.

¹⁸ Na sufuria toose, na makumbi na mikasi, na fideeva finiini, na miriko, na fiiya fyoose fya minya idodorye, vakafikamara fyoose.

¹⁹ Na fikombe, na miriko ilya ya yuuta ifu, na bakuri na sufuria, na miriko na fiiya fya saabu sanda na filya fya minya shaa, vasikari yewo vakafiipoo fyoose.

²⁰ Ngo ivii, na iruva, nato ng'umbe ikumi na ivita minya idodorye tekee shireiye firembony fyavayo, nafyo mmbo fyesongosyo ni mangyi Solomon. Minya yeyo idodorye yesongosye findo efyo nnyemaa yeeswa shaasa yekee shiingyi-fo.

²¹ Nato ngo yeto mmbo teetiri meta ikumi na nyanya, na uruu lwa mita ikumi na ivii, na kiringitya kyavayo mita ivii, efo nnang'ani kukatira mooro.

²² Tikatira kirembo kya minya, na waasha lwa vayo ni mita isaanu, na kiringitya kikatira mita ikumi na ivii, tikavikwa tikakusorya. Nato toose nta minya idodorye,

²³ Neefo si mmbo kweefo kurumanga, makumi kyeenda na irindaru na fivaro fikalollyo yoo uvariny.

Vandu va Yuda vakamarwa na Babilony

²⁴ Na kingyi, Nebukadnesa, we nniini wa vasikari, kakamara mfungwa Nkohani nniini Seraia, na nkohani Sefania yeto allatye, na vasongoru veengyi-da va efo mmba ya Iruva.

²⁵ Neefo muriny katira-fo kirongosi yeto wa vasikari va fira, na ngyama mfungare ta mangyi yewo vensaa efo muriny, kasanda na nsongoru yeto wa vasikari mwiikallya meekyeena moose, ando amwi na vasongoru vengyi makumi arindaru.

²⁶ Nebusaradan kandevafita kwa Nebukadnesa mangyi, ekee muriny wakwe wa Ribla,

²⁷ ukee kulya Hamati, yoo ng'u mangyi ya Israeli alewoyyo. Naasany-te, niindo kileenda, vandu va Yuda vakakamarwa ushingeny.

²⁸ Elyi llyo yeekyena lya vandu Nebukadnesa alekamara ushingeny, wikee mwaaka wa mfungare wa ushilyi lwakwe, ni vandu fiku firaru na makumi avii na vararu.

²⁹ Wikee mwaaka wa ikumi na nyanya kakamara vandu mayana nyanya makumi araru na vavii, awoota Yerusalemu.

³⁰ Na wikee mwaaka wa makumi avii na kararu vandu mayana mfungare makumi aana na varaanu valekurikwa ni Nebusaradan. Kwasanda woose valekamarwa ni vandu fiku fiina na mayana arindaru.

³¹ Mwaaka ulya Evilmerodaki aleva mangyi ya Babilony, koora nrima wa ilyillya kwa mangyi Yehoyakini wa Yuda, kamuuta kifingyony. Eki kyikawutika nkonu makumi avii na karaanu wa mwiiri wa ikumi na kavii wa mwaaka wa makumi araru na mfungare uka elyo Yehoyakimu enkamarwa mfungwa.

³² Evilmerodaki kantannya mesha neemmbika kisongoru ngota vamangyi vengyi woose valya vekee ushingeny ando amwi nawe yefo Babilony.

³³ Kive indo Yehoyakini mmbo aleniingwa muumu va yuuta-fo soori ta vafungwa, karaa nisha, kava na mwiilya shoonga na mangyi kyeeri kyoose kya muu wakwe.

³⁴ Kyeeri ekyi kyoose alekaa-u na muu aleva aningwaa wo kindo nrima wakwe ulelanga.