YEREMIA 49 - BIBILLYA Mareiyo Meele a Iruva

Nndumi Iruva autya Amon uvingo

¹ Kya Vaamoni, Nndumi Iruva mmbo aamba indi; “A mmbo Israeli alatiri vana? Mmbo alatiri muya ding'u? A kimaruma nkyeeki iruva yelyi milkomu lyilamye Gadi na vandu vakwe iindesamya miriny yakwe?

² Arannya, yeny Nndumi Iruva, shaamba, mmbo mikonu ikeesha kusheitiwa kyiiyo kya fira, ikabe Raba, muri wa Vaamoni; mmbo ushemamitwaa na muro fyuungo fyawo fyoose. Llyo Israeli vashelammya valya vevalammya.

³ Woshiny ni lwany yewe Heshboni, mashika muri wa Ai wammamitwa! Kaba kyiiyo yewe mfu wa Raba! Mukaraa soori ta makunnya fisiny fyany; kabeny kyiiyo mwiirisha efo neefo, Mashika Milkony mmbo avawaa usamirony amwi na vakisuku vakwe na vasongoru vakwe.

⁴ Nkyi elyi mukekutuula na marema any eni vefu mulatiri yiirikyo? Ao ni yewo vakusirye umasi, lwawo veshaamba, ‘Mmbi yeto ashekaryaa ikabana na yeny?’

⁵ Lolaany, mmbo shishemweengye weeresi, ni Nndumi Iruva wa matorito aamba; kuuka efo mukwaani nawo taari toose. mushaantwa wo nndu na shia yakwe; kuleefo nndu mwiisangirya ya mwiirishiswa.

⁶ “Indi numa shisheummbyaa Vaamoni ni Nndumi Iruva aamba.”

Nndumi Iruva autya Edomu uvingo

⁷ Kya Edomu, Nndumi Iruva wa matorito mmbo aamba, “A mmbo kulakyiifo nndu atiri urango efo Temani? A yewo veererya vengyi mmbo valemalallya? Mmbo urango lwawo lulemmisya?

⁸ Indukeny mukarisha mukandekusuruma eni vandu va Dedan! Mashika mmbo shimweenngye urumato eni vana va Esau Elyi kyeeri kyeenrikya ngapo kyifikaa.

⁹ Kyeeri ewo veeyaya sabibu vasha kwany, mmbo vashekureeya-fo nta umwi? Elyi manyinyi asha kwafo kio, nshi valyamara na ikurika wo kindo ngata vashiidimaa?

¹⁰ Esau shammura mbereto, shansammbwa-sammbwa kulya kundo kwakwe kweekusuruma, alakyiidima ikusuruma lyingyi vana vakwe, vana va maaye na vamurasa vakwe vammamitwa mmbakyiiyo-fo.

¹¹ Shireeyeny vana valatiri vandeye, neeny nshevalela, kimwi na vaka va ding'u.”

¹² Mashika Nndumi Iruva mmbo aamba, “Naakwa ni valya valakwaani ina kikombe ekyo ni kuti vani, yewo mmbo kushaashuka kulawona ngapo eyo? Oode ni kuti kuni upata yeto.

¹³ Mmbo shaamba kya dede, yeny Nndumi Iruva muri wa Besra mmbo ushevaa weeresi na kasa koomu, usheva kidengo na ilyamarwa, miri yaawo myoose mmbo ishevaa marama llung'anu.”

¹⁴ Mmbo shammiita mbony yuuka kwa Nndumi Iruva, na nrumi anrumwa andevia masanga, “Kuummbyeny amwi mundekabana fira, mundekaba Edomu.”

¹⁵ Shakuvia mmbo shikwallwa n-du nnang'ani a masanga, kwiinyalwa kwiilannyi,

¹⁶ Umbafu na irumana lyafo fyankulemba, na ukushobi kutiri kwandekaa mbangeny ta mawe uwe ifumbuu. Naakwa kwandevika kifuri kyafo alya uve sha ngoru, mmbo nshekoolotaa yaa sumbai, ni Nndumi Iruva aamba.

¹⁷ “Edomu mmbo ishevaa weeresi kwa wo nndu eto ashevaa kufii nawe. Mmbo ashefulukkyoo kyimaruma kya ngapo ashewonisaa.

¹⁸ Ngata Sodoma na Gomora yekapwa amwi na miri ifiitani nawo, nkwiifo nndu ashekaa efo nta inderunndya-fo mashora-fo ni Nndumi Iruva aamba.

¹⁹ Arannya ni sha miiso yakillya irondeny lya moonri yuuka nsitony wa ordan. Niindo shishanta Vaedomu varishe wooka urukeny lwawo. Neeny shishevika-fo nsongoru ungyi moose shankunda. Mmbovi ashivakye? Mmbovi ashivesaa? Ni mwiisi akaryaa ishivesaa?

²⁰ Kweekyo arannya uramba elo Nndumi Iruva alluvika kya Edomu na kimaruma ekyo akunndye itannya vandu va Temani. Naakwa ni vana vadu, mmbo vasherishiswaa-fo. Mmbo kushevaa-fo weeresi na yaawukwa nnu.

²¹ Ntiri wa iwa lyawo mmbo uruka lushererema na unyanga lwa kyiiyo kyawo mmbo lusheitiwaa fika yeeve lya Shamu.

²² Arannya, nkonu yeto mmbo nkiduva asherumbukaa eere uwe sha ngoru oorrwwe maaru akwe uwe ya uruka lwa Bosra, nkonu yeto mmbo ushevaa nkonu usheerese matorito a Edomu neesavaa sha nka alyiwa ni usu lwa mwana.”

Nndumi autya Damasko uvingo

²³ Kya efo Damasko mmbo kyaambawa, “Hamati na Arpadi mmbo vatirwa ni usau kimaruma kya mmbony shikasha, tisheerese mmbo vakeereya na yaalaluka sha yeeve eyo ilashiidima imalallya.

²⁴ Damasko mmbo yammereya ikannya, ikakunda irisha, mmbo yamfulukkywa na ivavywa sha nka alyiwa ni usu lwa mwana.

²⁵ Ni kindo kya yeerese, muri wa Damasko irewa nrapu, muri weetiri ifura lying'ani.

²⁶ Damasko Kweekyo vasero wakwe woose mmbo vashewaa ulale lwakwe, na vasikari vakwe mmbo vasheatwaa nkonu yeto, ni Nndumi Iruva wa matorito aamba.

²⁷ Nalyo shisheataa muro isimambeny lya Damasko, nato usherumata Ben-ha-dadi.”

Uvingo lwa Kedari na muri va Hasori

²⁸ Kikwaani na Kedari amwi na ngyumangyi ta Hasori tilya Nebukadnesa mangyi ya Babilony entilyamara. Nawe Nndumi Iruva, kaamba, “Kwiipo kwandekabana na Kedari! Kwamamita vandu va ngama!

²⁹ Meema awo sanda na findo fyawo fya mmba fishekamaewaa, fitambaa fyawo fya matirisha na findo fyawo fyeevika umasi lwawo loose, na ngamula tawo mmbo tishekurikwaa, kyiiyo mmbo kisheitiwaa na weeresi luuka taari toose!”

³⁰ Risheny yeni vandu va Hasori mukandekusuruma kwaasha mindesheny! Ni Nndumi Iruva aamba. Mashika Nebukadnessa mangyi ya Babilony ammbaanga shila ya ikudeesya ishemurumata.

³¹ “Kwiipony indekabana na isanga llya lyitiri unapwe vandu vatiri uringyi ni Nndumi Iruva aamba, ngiri yaawo ilatiri myaango ya minya, nta ilakee miraye.

³² Ngamula tawo mmbo tishetirwaa, findo fyawo fyeevikya mmbo fishekurikwaa mifungwa, nshevanyanyata kundo koose valya woota fisunsu mirwe yaawo, shisheveenngye yuuka wo taari, ni Nndumi Iruva aamba.

³³ Hasori mmbo kushevaa kundo kwekaa maparwe, kusheva kasa koomu llung'anu kulashevaa-fo nndu akaa-fo nta isanga-fo.”

Nndumi Iruva autya Elamu uvingo

³⁴ Irero lya Nndumi Iruva llya lyesheya nkisuku Yeremia kya Elamu, mapookyony a ushilyi lwa Sedekia mangyi ya Yuda.

³⁵ Nndumi Iruva wa matorito mmbo aamba, “Arannya mmbo nshewunndwa finya ya Elamu, efo kundo vavikye nsia.

³⁶ Shisheengye Elamu, uraato luuka taari toose yiinya ta nginii-u, lushevanyanyata isangeny koose wooka Elamu.

³⁷ Mmbo nsaveesa vandu va Elamu mbee ya vakiduva vawo, valya vakunndye ivamamita, mmbo shiveengye ngapo uwe yaawo kimaruma kya nyashi yakwa shinyaasi, ni Nndumi Iruva aamba. Mmbo shiveipoyo usu shivalatye wo ando kutani shavamamita woose.

³⁸ Mmbo nshevikaa kitima kyakwa kya umangyi kunu Elamu, nshemamita mangyi na vasongoru woose va Elamu, ni Nndumi Iruva aamba.

³⁹ Indi fyeeri fisheshaa numa shisheviiryaa Elamu umasi lwawo, ni Nndumi Iruva aamba.”