YEREMIA 46 - BIBILLYA Mareiyo Meele a Iruva

Misri yavinga alya Karkemish

¹ Irero lya Nndumi Iruva, elye lyesheya nkisuku Yeremia lyikwaani na mbony ta masanga.

² Mbony yeto ta Misri tikwaani na itorito lya Farao Neko mangyi ya Misri, lyeeke kufii na mura Efrate kulya Karkemish, kyeeri Nebukadnessa mangyi ya Babilony ellyivinga kwiikee mwaaka wa kaana wa ushilyi lwa Yohoiyakimu mwana wa Yosia mangyi ya Yuda kavavia:

³ “Deesyeny ngao na fisha fyany, mweende na mbee ikabana fira!

⁴ Deesyeny frasi tany, na vesaama frasi, nueeny mafumu mukaraa masara any a fira na kofia tany ta minya,

⁵ A mmbo kyava inda? Vammereya vakalemwa, neewuya numa, vasikari vawo mmbo vankapwa vakavingwa vakarisha neerisha-deny nta mmbakelola numa-fo mmbakeesaukwa taari toose! Ni Nndumi Iruva aamba.

⁶ Valya veeshi irisha mmbakekyiidima-fo, nta veekabana mmbaturunyaa-fo, ewo vakee taari ya ndoo kufii na mura Efrate mmbo vantumbuluka vakawa-si.

⁷ “Mbovi yeu akeekurosa sha mura wa Naili, sha mura ukeeyeera iwala?

⁸ Misri mmbo ikeekurosa sha mura wa Naili, mira ikeyeeta iwala Kaamba mmbo shikurosaa shisikye uruka. Shishelyamara miri ya vandu vawo.

⁹ Naasa iluyeny eni veerishisa frasi, na makari any a fira! Reny vasikari veende na mbee, vandu va Esopia na Puti valya veeshi yoomwa ngyura.

¹⁰ Nkonu yeto ni nkonu wa Nndumi Iruva wa matorito, nkonu wa itaiya kiduva nkonu wa ngapo kwa vakiduva vakwe. Usu lwakwe mmbo lushemamitaa, na samu shiingyi mmbo ishepusukaa Mashika llyo Nndumi Iruva ashoota kiraso, efo urukeny lwa taari ya ndoo, kufii na mura Efrate.

¹¹ Kwiipo kwafika Giliardi, kwanderuuya-fo nri, Yee, yewe mwana wa kyeny wa Misri! Fyoose ni maariso kya mbavaro kukeeruuya nkushekaa kushye-fo.

¹² Masanga ammiita kya usutu lwafo, na uruka mmbo lwiisshwe kyiiyo kyafo; mashika wo asikari mmbo aketuula asikari urooye nawo woose vakawa-si marama.”

Isha lya Nebukadnessa

¹³ Eyo nnyo nrumi ilooka kwa Nndumi Iruva ikasheya nkisuku Yeremia, kya Nebukadnassa mangyi ya Babilony ishekapa uruka lwa misri.

¹⁴ Kapeny wombe kulya Misri na kulya Migdol; mundaamba kulya Menfisi na Topanesi, kwaambe, “Salaleny kyuumi neekudeesya mashika usu mmbo lukeeshemamita fyoose efyo mutiri.

¹⁵ Nkyiki elyi Apisi alerisha? A kyeema masiingo ewo vafo valesalala? Ni Nndumi Iruva alevatuula.

¹⁶ Vandu vafo veengyi mmbo valetumbuluka vakawa, vakaviana veni kwa veni, ‘Lukwiipo, ndifony luwuye kyeny kwa vandu veru veni; Urukeny lweru kundo usu lwa vandu eva vakeluwonnya.’

¹⁷ Mfishyeny Farao irina mangyi ya Misri mukammbya, ‘Alya marero afikaa nshi-ng'u nkonu wafika-fo.’

¹⁸ Shaasa yeny mangyi shiifo na muu, we Nndumi Iruva wa matorito, ni dede sha Tabori, efo mafumbuu na karimeli, efo kufii na yeeve ni indo asheshaa.

¹⁹ Kudeesyeny muveni yeenda ushingeny yeni vandu va Misri! Mashika Menfisi mmbo ishemamitwaa, isheva ukyiva kundo kulatiri vandu.

²⁰ Misri ni ngashe shisha ya malla, indi yallyamarwa ulyamaro luuka na taari ya ndoo.

²¹ Naakwa ni valya veterewa weekyi nnang'ani yaawo, mmbo valevaka ngashe tivanndye, yee mmbo valeenduka woose vakarisha kimwi mmbalesalala-fo mashika kyeeri kya ngatara na ngapo yaawo yemmesha;

²² ‘Unyanga lwawo lukavaka lwa shoka ikeerisha; vakiduva vawo vakavasheya na finya ing'ani, vakavasheya veerye fyaara sha nndu akeendetuula miri.

²³ Mmbo vashemanya misito yaawo ni Nndumi Iruva aamba. Lla neelyi kulavaa idoshya urende, mashika mmbo vakee veengyi vakailannya nrre tilavaa yeekyenwa.

²⁴ Mfu wa Misri mmbo ashesutwaa, mmbo vasherambikywaa maakony a vandu va taari ya ndoo.’”

²⁵ Nndumi Iruva wa matorito, Iruva wa Israeli kaamba, “Arannya, mmbo shikeeyeende ngapo ya Amoni wa Tebesi, na Farao, na Misri na maruva akwe na vamangyi vakwe uwe ya Farao, na valya woose vammbikye nsia.

²⁶ Mmbo nshevarambikyaa wooka efo maakony a valya veeke ruuya muu wawo; efo maakony a Nebukadnassa mangyi ya Babilony, na vasongoru vakwe. Nayo Misri ishesamywa ni vandu sha mikonu ilya ya kasha, ni Nndumi Iruva aamba.”

Nndumi Iruva ashekiraa vandu vakwe

²⁷ “Indi kulaereye-fo, Yee Yakobo ishinga lyakwa, nta yeereswaa-fo Israeli; mashika lola mmbo shishekutarama kuuka kwaasha efo urukeny, kundo kweeke ntire mifungwa, Yakobo mmbo ashewuyaa kyeny kundo kutiri unapwe, nta kulashekaa-fo nndu wa imweerese.

²⁸ Kulaereye-fo yewe Yakobo ishinga lyakwa, ni Nndumi Iruva aamba, mashika mmbo shikee neewe. Mmbo shimamitaa masanga moose kundo kulenkamarwa mifungwa, indi yewe nshikumamitaa-fo, mmbo shikusaaraa mbiiri-nsi, ndesa kyikwaani neewe, lyo nshiraa shilakusaara mbiiri-fo.”