YEREMIA 34 - BIBILLYA Mareiyo Meele a Iruva

Nrumi kwa Sedekia

¹ Naasa Nndumi karera neeny kyeeri mangyi Nebukadnesa wa Babilony na vasikari vakwe veshekywaa ni maronda a vasikari va ngyuruka tilya tekee si yakwe, valesha ikapa Yerusalemu na miri ikee kufii nato.

² Nalyo nndumi Iruva wa Israeli kashivia sheende shinderera na mangyi Sedekia wa Yuda, shimmbie indi, “Yeny Nndumi Iruva mmbo nsherammbikyaa muri yeu kwa mangyi ya Babilony, nawe naukore.

³ Nkukwiisaa-fo, mmbo kushetirwaa kuvikwa maakony akwe. Mmbo kushekwanannyaa nawe kurere nawe, kurawany Babilony.

⁴ Sedekia, arannya ekyi shiifo nkuviaa. Fira nnyikuwaa-fo.

⁵ Mmbo kushefwaa kyeeri kya ufoo, na shaasa vandu vakoraa ubani kyeeri varikaa vandu vawo, valya vekee vamangyi mbee yafo, niindo-da vashekoraa ubani kwafo. Mmbo vashekuiyaa vaambe, ‘Mangyi yeeru amfwa!’ Ni yeny Nndumi Iruva shaamba.”

⁶ Naasa sharwaaya mangyi Sedekia nrumi yei kulya Yerusalemu.

⁷ Kyeeri vasikari va Babilony vekeanga Yerusalemu. Nawo mmbo vekekapa Lakishi na Aseka, na nnyo miri yensaau ya Yuda yetiri turuve.

Ikaa na mashinga

⁸ Mangyi Sedekia na vandu va Yerusalemu mmbo vemmiirikyana valekeye

⁹ mashinga awo a Kiebrenia, va kyuumi na va kyika, nambo kulashekaa-fo nndu Mwisraeli atiri ishinga uroye.

¹⁰ Vandu woose vakeerikyana ilekeya mashinga awo, vare valevawuiya lyingyi. Vakavalekeya woose.

¹¹ Lyo numa vakaalasha makusaro, vakavaviira, vakavaitikya iva-se mashinga.

¹² Nndumi Iruva aleamba,

¹³ Iruva wa Israeli mmbo aleshivia shivie vandu, “Mmbo shevika kyaasa na vasongoru vafo kyeeri shilevauta ushungeny kulya Misri mmbo shevavia

¹⁴ wo myaaka mfungare nkuti valekeye mashinga a Kiebrania elyi varunndya myaaka irindaru. Lyo vamiku vany valairikye nta ikunda itana kilya shilevavia.

¹⁵ Mikonu myaangu-da mmbo mulealasha makusaro any mukatana ekyo kishisennyi. Moose mmbo muleirikya ilekeya mashinga wooroye vany, mukavika kyaasa mbee yakwa, kulya mmba yakwa kundo musheshindya.

¹⁶ Lyo mukashilema elyi mulealasha makusaro any, neeni moose mukaviira-se mashinga alya mwemirikya ivalekeya.

¹⁷ Nkyo ulaalu, yeny Nndumi Iruva, mmbo shaamba mwashimina mmwakunnda ilekeya woroye vany-fo. Kyasiany-te, neeny shamuniinga uleke, uleke lweefwa fireny, ndwari na shaa. Wo vandu ulaniny mmbo vasheawutwaa nnyekyo nshemutannyaa.

¹⁸ Vasongoru va Yuda na va Yerusalemu ando amwi, neewo va mmba ya mangyi vakohani na vasongoru woose, mmbo valevika kyasa neeny veshiraa yoo nnang'ani kavii ya shau venyaava kavii.

¹⁹ Lyo vakafisha kyaasa ekyo valakikilatye. Nkyo ulaalu kilya vandu yeva valetannya shau ilya nkyo neeny nshevatannya,

²⁰ Mmbo nshevarambikyaa vakiduva vawo, vavawaa, na miili yaawo ilyiwa ndeye na mafisi.

²¹ Mmbo nsherambikya mangyi Sedekia va Yuda na vasongoru vakwe kwa yewo vakunndye ivawaa. Mmbo shivarambikyaa kwa vasikari va Babilony, yewo vemmaa ira imukapa,

²² Mmbo nshevavasyaa vawuye kunu mriny. Vaukape, vautire, vaukore moose. Miri ya Yuda mmbo nsheyallwa ive kasa koomu kulaifo nndu, Ni yeny Nndumi Iruva shaamba.”