YEREMIA 28 - BIBILLYA Mareiyo Meele a Iruva

Yeremia na Nkisuku Hanania

¹ Naasany mwaaka ulya mweni, wikee wa karaanu wa mwaaka wa kaana llya Sedekia aleva mangyi, Hanania mwana wa Asuri ekee nkisuku ookye muriny wa Gibeoni, karera neeny kulya mmba ya Iruva. Nawe mmbo alerera neeny mbee ya vakisuku na vandu woose,

² kashivia Nndumi Iruva wa Israeli mmbo aleamba, “shamfisha finya ya umangyi lwa Babilony.

³ Ando a myaaka ivii mmbo shiviiraa usimba loose llwa mmba ya Iruva Nebukadnesa alerwaa Babilony.

⁴ Shiviire na mangyi ya Yuda we Yehoiakim. Ando amwi nawe ni vandu woose va Yuda valerawa ushingeny Babilony. Yee deny, mbee ushefishaa umangyi lwa Babilony. Ni yeny Nndumi Iruva shaamba indo.”

⁵ Naasa neeny yoo mbee ya vakisuku na vandu yewo shavia Hanania,

⁶ “Oo ekyo nkisha nnu deny, naasa kiinukye na Nndumi Iruva ashetana indo. Nasheinutya ukisuku lwafo naviire oota Babilony usimba loose lwa mmba ya Iruva na vandu woose valekamarwaa ushingeny.

⁷ Lyo aranya shirere neewe na vandu yeva yaa,

⁸ vakisuku valya verera kasha veshisongoye yeny neewe, mmbo valeauuya sheelyi fira, shaa na ndwari mmbo fisheyaa masanga meengyi sanda na ngyumangyi titiri finya.

⁹ Lyo nkisuku moose yeto aawuya ufoo nnkuti nkisuku ulya Nndumi Iruva anruma dede neekyo aamba kive.”

¹⁰ Naasa Hanania kawara nguvanu ilya sheree singony kaifishafisha,

¹¹ kaamba indi yoo mbee ya vandu woose. Nndumi Iruva mmbo aamba ni indo shishetannyaa ushinga yelo mangyi Nebukadnesa avikye vandu va masanga moose. Eki mmbo ashekiinutyaa ando a myaaka ivii tupu. Naasa yeny shooka-u sheenda.

¹² Hanania akimaa ifisha yoki singony-ya nkisuku Yeremia, numa yavayo Nndumi Iruva kashivia,

¹³ “enda via Hanania, Nndumi Iruva mmbo akuvia kushiidimaa ifisha mitaato ya kiri, lyo mmbo asheviiraa-u ya minya.

¹⁴ Nndumi Iruva muni matorito wa Iruva wa Israeli mmbo aamba we mmbo ashevikaa vandu va masanga ewo woose mitaato ya minya efo singony varunndye Nebukadnesa.”

¹⁵ Shiikivia Hanania indo, sheengera yaamba, “Arannya Hanania. Nta Nndumi Iruva nnyalekuruma-fo, lyo mmbo kwakunda vandu veerikye wongo.

¹⁶ Kweekyo Nndummi Iruva kaamba mmbo ashekuutaa-u we muni. Mwaaka yeu mmbusiaa kulore kwafwa-fo, kimmba kuleeveta vandu vakalema Nndumi Iruva.”

¹⁷ Nawe Hanania kafwa dede mwiiri wa mfungare wa mwaaka ulya mweni.