YEREMIA 18 - BIBILLYA Mareiyo Meele a Iruva

Yeremia kwa muumba nungu

¹ Irero lya Nnndmi Iruva lyikasheya Yeremia:

² “Kwiipoo, oloka fika mmba ya mwuumba-nungu, yoo nng'u shishekureryaa marero akwa.”

³ Llyoony, shooloka shafika mmba ya muumbi wa nungu, shankooya eerunda na ngalyi.

⁴ Kyindo kilya eekee-uumba kya uteri lwa sena kyikawunduka etiri maakony akwe, keepo uteri lulya lwawunduka kaumba-fo kyindo kyingyi shaasa elollya kyevaa nisha.

⁵ Llyoony irero lya Nndumi Iruva lyikashisheya:

⁶ “Yewe mmba ya Israeli, a shishiidima-se itana sha mwuumbi-yeu-wa-nungu? Ni Nndumi Iruva avesa. Lola sha uteri lukee wokony lwa mwiuumba-nungu ni indo mukee wokony lwakwa yeni mmba ya Israeli.

⁷ Kwakooya, nkonu moose sharummbwa kya isanga ao umangyi sheelyi shilukurwaa tushu na ilimamita,

⁸ lyo isanga elyo shalyirumbuya lyikuryaa, nshishaalashaa kya ngapo yeyo shenkusara iveengye.

⁹ Na nkonu moose sharumbuya isanga ao umangyi sheelyi shilutumarisaa na iluvaaya,

¹⁰ lukashiipala na itana uravi nshishaalashaa kya mesha shellukusarya.

¹¹ Kweekyo ulaalu, rera na vandu va Yuda na veekaa va Yerusalemu, ‘Nndumi Iruva aamba, lola nshikeeveyya makasha na yaala ngapo kyany. Kuriyeny, wo umwi uka uraviny lwa shia takwe, mukaalashika shieny na mitannyi yaany.’”

¹² Lyo vakaamba, “Yekyo ni ruu-da! Llulatya makusaro eru luveni, na wo umwi natane umbafu lwa nrima wakwe.”

Vandu valakana na Nndumi

¹³ “Nndumi Iruva aamba, kweekyo: veseny nnang'ani ya masanga, mmbi alemmitya ekyi? Mwana wa kyeny Israeli antana kyindo kya tangalu.

¹⁴ A kyaamwi kya Lebanoni nkiree mawe a ngyina? A mura va mafumbuu umyaa, mifongo irelelaa iisokaa?

¹⁵ Llyo vandu vakwa mmbaleshirekkywa, vakakorya ubani maruva a wongo; vakatula shieny tawo, shieny tawo ta kasha, vakalatya miko vakara shia ikwaani,

¹⁶ vakaallwa uruka lwawo kyido kya yeerese nnu. kyindo kya ipalwa llung'anu. wo nndu ashiiraa kufii nyakesaukwa kaining'ina nrwe.

¹⁷ Nshivanyanyataa sha uraato lwa taari ya ngama mbee ya vakyiduva vawo. Shivakape mungo ando a iwoora kisangu kyakwa, nkonu wa iwoywa lyawo.”

Yeremia avikyo ikwaanu kirika

¹⁸ Llyo vaamba, “Oshony lulye kyama kya Yeremia, mashika llusheuwaa nkoani wa ilulosha-fo, nta nndu nrango, nta nkisuku wa irero-fo. Oshony llukape na ngyulumi nta lulakwise kya marero akwe-fo.”

¹⁹ Naasa yeny shatereva; “Woi Nndumi Iruva shaarannya, irikkya yooshora lyakwa.

²⁰ A uravi llutaiyyaa mesha? Naakwa ni indo mmbashisumya irina. Kummbwa shaasa shesalala mbee yafo ivaterevya mesha, ipaaya nyashi yafo ilavawoye.

²¹ Kweekyo rambikya vana vawo vafwe shaa, vare vamamitwa ni finya ya usu, vaka vawo vawe fyuumba na yaaluka vaka va ding'u. Womi vawo vawaawa ni ndwari sheeresi, vasero vawo vawaawa ni usu fireny.

²² Kyiiyyo kyiitiwa mmbeny tawo, elyi kuvarikkya itorito lya fira lyivawoye tiny! Mashika mmbaleshisumya irina na mbaleshivikkya nreiyo utire marende akwa.

²³ Naakwa ni indo woi Nndumi Iruva, kwiishi kyama kyawo kya ishiwaa. Kulasarye uravi lwawo nta yuuta ulyamari lwawo misony afo-fo. Ra veerwa-si mbee yafo; kuvakabe kyeeri kya nyashi yafo.”