YEREMIA 13 - BIBILLYA Mareiyo Meele a Iruva

Soori ya kisiny shimamiri

¹ Nndumi Iruva kashivia, “Enda kwandoora soori shimamiri ya kisiny, kundeifinga kisiny nta kulasheisangya-fo.”

² Naasa shoora soori ya kisiny, shaasa Nndumi Iruva aleshivavasya; shafinga kisiny,

³ Naasa irero lya Nndumi Iruva lyikashisheya-se.

⁴ Kashivia, “Ipoo soori ilya kufingyeny kisiny kweenda fika Efrate kundeisuruma efo mmbangany ya iwe.”

⁵ Neeny shakwiipo shandeisuruma kulya efrate ndesa Nndumi Iruva aleshivavasya.

⁶ Yiikyira mikonu miingyi, Nndumi Iruva kashivia “Kwiipo kweenda Efrate kundeepoo-fo soori ilya shekuvia endasuruma-fo.”

⁷ Neeny sheenda Efrate, shandelukwa ando alya shesuruma soori ilya. Ate soori ilya mmbo yemma ilyamarika.

⁸ Naasa irero lya Nndumi Iruva lyikashisheya,

⁹ lyikaamba: “Naakwa nnyendo, mmbo shilyamaraa ukushobi lwa Yuda na ukushobi yelo uniini lwa Yerusalemu, ni Nndumi Iruva aamba.

¹⁰ Vandu yeva valyamari, valakundye yaarannya marero akwa vandu mbafu valatya efyo fya makusaro awo meni vakalatya yiinndya maruva engyi, mmbo vashevaa kyimwi sha soori ilya ya ifinga kisiny, ilya ilemma ilyamarika.

¹¹ Ngata soori ikwiinivaa efo kisiny kya nndu, niindo shetannya vandu woose va mmba ya Israeli na vandu woose va mmba ya Yuda vashikoosorye yeny Nndumi Iruva, naambo vakooye iva vandu vakwa, irina lyakwa, lyirumishwa na itumbe lyakwa lyo vakalema yaaranya.”

Kyikombe kya mfinyu

¹² “Mmbo kuvavia marero yaa: Nndumi Iruva, Iruva wa Israeli mmbo aamba, ‘Wo kyikombe mmbo kishiishurwa mfinyu.’ Nawo mmbo vakuvia, ‘Ni kya dede mmbo luleeshi sheelyi wo kyikombe ni kuti kyiishurwa mfinyu?’

¹³ Naasa mmbo kuvavia, ‘Nndumi Iruva mmbo aamba: Lola, Nshiveishuraa unangwa vandu woose va uruka elu, vamangyi yewo vakaaye kitima kya umangyi lwa Davidi, vakoani, vakisuku na vandu woose va Yerusalemu.

¹⁴ Mmbo nshevakapanisa wo nndu na ungyi, vandeye vakapani na vana ni Nndumi Iruva aamba. Nshivalyillya nta ivafwaaya-fo ni kuti shivanyamare.’”

Wiikyimbi lwa Yeremia

¹⁵ Looteny maarwi mukaaraanya, mukara ukushobi, mashika ni Nndumi aamba.

¹⁶ Itumbe ni lya Nndumi Iruva, Iruva wafo, kulaore ammeende ireema, nta kulare kwankapa urende, lwafo ifumbu lyitiri ireema, na kyeeri kusheruuya sa yaluuke ireema, ireema lya makimima.

¹⁷ Indi kulammirikya, nrima wakwa mmbo usokywa mfyoova kyimaruma kya ukushobi lwafo. Na miso akwa mmbo ashepusuka misoru kyimaruma kya ivavywo nnu. Kyimaruma elyi ironda lya Nndumi Iruva lyankurikwa mifungwa.

¹⁸ Enda kwaviva mangyi na maaye: “Valekeye kitima kya umangyi lwambwa, mashika utore lweeke nrweny mmbo wafo lwammbwa-si.”

¹⁹ Miri ya Negebu yaaraywa, kuleefo nndu asherrwa, Uyuda shoose yankamarwa mifungwa, shoose deny yankarrwa ushingeny,

²⁰ “Inuya miso afo kwalla uwe, valya vakesha wooka taari ya ndoo. Nkwi lyikai ironda llya kuleniingywa, ironda lyafo isha?

²¹ Mmbo kushaamba-kyi kyeeri mbuya vashekushillya yewe kumuni, yewo kwevelosha kumuni iva vambuya vafo A ndesa, nkushevavywa-se, sha nka akeelyiwa ni usu lwa mwana?

²² Nakwakooya kaamba efo nriminy wafo, ‘Nkyikyi elyi mbony eti tashikooya yeny?’ Ni kyimaruma kya uravi lwafo uniini, kwaambuwa soori kwarewa mbereto, na mavavyo ngyayony tafo.

²³ A ndesa Mwiisopia ashidimaa yaalasha fwana yakwe, ao nyamandu mavara-vara a vayo? Kweekyo mmbo kushiidima itana mesha kwankooya kwiishivye itana makasha.

²⁴ Mmbo shinyanyataa sha kiluulyi kyivivitwa ni uraato efo kasa koomu.

²⁵ Elu llo weesi lwafo, llo waavi lwafo lukwaani na yewe, ni Nndumi Iruva aamba, kyimaruma kuleshirekywa yeny kwalisirya yewo veamba wongo.

²⁶ Yeny shimuni mmbo shikwaammbwa soori fika nrrweny, na usutu lwafo lulollywa.

²⁷ Shilollya ulyamari lwafo, utuusilwafo, na makasha engyi moose efo mafumbuu na mareminy. Woshiny llwafo, yewe Yerusalemu! Mmbo kufika indii kutani kwasheilyiswa?”