YEREMIA 11 - BIBILLYA Mareiyo Meele a Iruva

Yeremia na kyaasa kya Iruva

¹ Irero elyi llyo lyesheya Yerema lyuuka kwa Nndumi Iruva:

² “Aranya marero a mma yei, kwarera na vandu va Yuda na veekaa va Yerusalemu.

³ Kushevavya Nndumi Iruva wa Israeli aamba mmbo akeen-denge nndu moose amina marero a mma yei.

⁴ Mmbo sheniinga vamiku vany llya shewoota urukeny lwa Misri, uka nunguny ya iikara, shaamba arannyiny unyanga lwakwa na itana shaasa shilemuvavasa. Ni indo mushevaa vandu vakwa neeny shive Iruva waany,

⁵ naambo shiidimi ifita kyaasa kyakwa na vamiku vany ivaniinga uruka lusheeka malela na ukyi sha nkonu wa inu.” Llyo sharouwany, “Kyive indo, Nndumi Iruva.”

⁶ Nndumi Iruva kashivia, “Vambisa marero yaa moose miriny va Yuda shieny ta Yerusalemu: Arannyiny marero a mma yei na muyainndye.

⁷ Mashika nsheikyimba vamiku vany kya dede deny llya shewoota urukeny lwa Misri shivakangaya nnu fika inu shiishaamba, indyeny unyanga lwakwa.

⁸ Indi lyo mbaleinndya nta iloota kuri-fo, wo umwi kalatya makusaro a nrima wakwe wa umbafu. Kweekyo, shaveengye marero moose a mma yei, yoo shevavavasa vatane, valatane.”

⁹ Nndumi Iruva kashivia uravi lyingyi, “Kwiifo uringyi nnang'ani ya vandu va Yuda na veekaa Yerusalemu.

¹⁰ Mmbawuyya uravi lwa vamiku vawo, yewo velema yaaranya marero akwa; mmbalelatya maruva engyi na iyainndya; mmba ya Israeli na mmba ya Yuda mmbalekyillya mma yakwa na vamiku vawo

¹¹ Kweekyo Nndumi Iruva aamba, Lola, nshikeende ngapo valashiidima ikkya; naakwa vashoshoora, nshivaarannya-fo.

¹² Llyo miri ya Yuda na veekaa va Yerusalemu vasheendaa vandeoshora maruva yoo vaakorya ubani, lyo nyashiidima ivakyira sa ya ngatara tawo-fo.

¹³ Mashika maruva any nnyammiingyiki sha yeekyena lya miri yaany yeni Yuda; na sha wiingyi lwa shia ta Yerusalemu ni indo sony ya wiingyi lwa fitara fya irasya muletana, fyeerasya Baali.

¹⁴ Kweekyo, kulatereve nta iyooshora kya vandu yeva-fo, mashika nsheveeta elyi vaffwaa sa ya ngapo-fo.”

¹⁵ A nkunde wakwa nnyatiri usumanu-kyi kwakwa kutani atana upalolo? A mma ya nyama ta irasa tishuuta urumato? Fikuniingaa ifura?

¹⁶ Nndumi Iruva nnyalekuvaanga, “Nri nsha va seituni, kutiri ndunda niini shisha; indi nnyawaata muro wa nyashi na maramba a vayo narumato.

¹⁷ Nndumi Iruva wa matorito, yeto emuvaaya, ammanya ngapo yaany, mashika ya uravi yelo mmba ya Israeli na mmba ya Yuda valetana, shirosya ngoo kya ikorya Baali ubani.”

Yeremia ariingyo awaawe

¹⁸ Nndumi Iruva eshimanyisya shamanya: naakwa ni ishora mitannyi yaawo miravi,

¹⁹ lyo mmbo sheekee sha yoonri lyifoo sau lyindeshishwaa. Nshemanya sheelyi nnyeny sheekeyookywa ntambo-fo veeshaambaa, “lumamite nri na ndunda ta wayo, luukurwe deny uka muri va vandu, irina lyakwe lyilakyikumbuwa lyingyi.”

²⁰ Lyo, nndumi Iruva wa matorito, arumbuyaa kya usumanu, yeto eesaa nrima na makusaro, ra shilolye kyiduva kyafo kwawo, mashika nshakurambikkya kumanye kyakwa.

²¹ Kweekyo Nndumi Iruva kya Anatoti yeto akeruuya muu wafo, aamba ule, “Kulaawuye fisuku na irina lya Nndumi Iruva ao lukutumwe na maako eru luveni.”

²² Kweekyo Nndumi Iruva wa matorito aamba ule: “Lola, nshishevakapaa; vasero vawo mmbashevawaa na usu; vana va vomi na va kyika mmbashefwaa shaa;

²³ nta umwi aturunnya-fo. Mashika nshisheengye ngapo vandu va Anatoti, mwaaka wa ikapwa lyawo.”