YEREMIA 10 - BIBILLYA Mareiyo Meele a Iruva

Maruva a wongo na irero lya dede

¹ Nndumi Iruva mmbo akeemuvia; yeni va mmba ya Israeli.

² Nndumi Iruva mmbo aamba indi; “Kulalatye shia ta vandu va masanga-fo nta mulasheesongololo kya ngyende iruvee-u, mashika masanga mmbo akeesongololo kimaruma kya ngyende yeto.

³ Mashika mikaaye ya vandu yewo nnya wongo, nri mmbo ukeentuule-si ni mashora a nndu atiri kyaara.

⁴ Nndu mmbo aushopa na arera na saabu; neewiikara na misumari na kyiria ulashesi-ngasinga.

⁵ Maruwa awo mmbo avakye mitende ikeemivaaye nndeny kwi nstare; nayo ilashiidima irera mashika nnyishiidima yeenda-fo; Kweekyo kulayeereye-fo mashika nnyitiri wiidimi lwa itana makasha-fo nta itana mesha-fo.”

⁶ Yewe Nndumi Iruva, nkwiifo ungyi akuvakye-fo, uniini ni lwafo irina lyafo llyilyimmbye.

⁷ A mmbi alakweereyye yewe mangyi ya masanga? Mashika yewe mmbo kukwaani yiinndywa nnyelyi kuleefo ungyi nrango sha yewe nnang'ani ya masanga moose, naakwa ni yefo ngyumangyiny tawo kuleefo nta umwi akuvakye.

⁸ Woose mmbo vakee matondo na varung'ani, fyoose ni maruva a wongo eepasha.

⁹ Arera shipashe mmbo yuukye Tarshishi, na saabu ikooka Efasi. Yoo ni mashora a nndu mfuru, a maako a yeeta saabu; na masara awo ni fwana ya Samawi na Urujuani, yoo moose ni mashora a nndu mfuru.

¹⁰ Indi Nndumi Iruva, ni Iruva wa dede, Iruva wa llung'anu eefo na muu na umangyi lwakwe ni lwa llung'anu fidina-si na masanga mfishiidima isiika nyashi yakwe-fo.

¹¹ Mmbo kushevavia indi, “Maruva yoo alashiidimaa itana nginiiu na ulana, mmbo ashemamitwa yaa ulaniny na irekyeka kunu-si ya ngina.”

Kyiimbo kyeerrumisha Iruva

¹² Mmbwe aleumba ulana na finya takwe, mmbwe asongosya uruka na urango lwakwe, kwa umanyo lwakwe kaala ngina.

¹³ Kyeeri oota unyanga lwakwe, mmbo kwava-fo yoona lya mura ngiini-u, na ifishi lyikasaama lyuuka mafurumyony a uruka, kaata fimwii fya mmbwa na yeende uraato lwa finya luuka kwakwe.

¹⁴ Wo nndu mmbo akee itondo alatiri umanyo; wo nndu mwiyeeta saabu mmbo asutoo mmaruva akwe muni, mashika mafwanu akwe ni a ulembi, mashika nnyatir mumuyo nnang'ani avayo-fo.

¹⁵ Mashika nnyatiri mbusha-fo, ni mashora a ulembi, kyeeri kya mwaandu mmbo ashemamitwa.

¹⁶ Nkwiifo sha yeu aukye mmba ya Yakobo-fo, mashika we mmbwe aumbe findo fyoose, na Israeli mmbwe muyading'u yakwe.

Ushinga lukeesha

¹⁷ Ummbya shashu yafo, yee, yeni mukee varingitye!

¹⁸ Mashika mmbo Nndumi Iruva aamba: “Yeny, shiveerya kwaasha na iwe lya nkoveny, vandu va uruka lwa kyeeri ekyi, shisheveengye ukiva valakaa varekywa.”

¹⁹ Woshiny lwakwa kimaruma kya kyaasha kyakwa! Ngapo yakwa mmbo ikeeshivavya indi shaamba, “Ni kya dede nkimaruma kya mavavywo ni kuti shisisirye.”

²⁰ Yeema lyakwa mmbo lyallyamarwa, na isimamba mmbo tamfishwa; vana vakwa vanshirisha mmbakiiyo-fo, nkukyiiyo nndu weereiya-se yeema lyakwa-fo, nta wa yoorrwa fitambaa fya matirisha akwa-fo.

²¹ Mashika veesi mmbarung'ani mmbakeeruuya weeki kwa Nndumi Iruva-fo, kweekyo mmbakeevesywa-fo, na moonri moose mmbo ammeenyanyaka.

²² Aranya, shammiita miiso, ikeesha yuuka taari ya ndoo isheallwa miri ya Yuda ive ukiva na kundo kweeka maparwe.

²³ Yee Nndumi Iruva mmbo shiishi sheelyi nndu nnyatiri wiidimi-fo, we muni nnyashiidima itetera muu wakwe-fo.

²⁴ Sheekya woi Nndumi Iruva kwa ilyillya lyafo; kulanyafukwa kyakwa-fo, shilyillya yeny shikee mfwafwa.

²⁵ Vapusuye nyashi yafo masanga yoo alakwiishi, na uwe ya vandu yeva valashiinndya irina lyafo; mashika mmbo vallya Yakobo, yee, mmbo vammulya neemmamita deny nayaallwa ukyiva kundo kwakwe kwekaa.