YEREMIA 1 - BIBILLYA Mareiyo Meele a Iruva

Yeremia

¹ Yeti ni mbony ta Yeremia mwana wa Hilikia ulya ekee umwi wa vakohani va muri wa Anatoti wa uruka lwa Benyaminy.

² Na Nndumi Iruva mmbo alerera na Yeremia mwaaka wikee wa ikumi na kararu wa ushilyi lwa mangyi ya Yuda Yosia mwana wa Amon.

³ Nawe Nndumi Iruva karera lyingyi na Yeremia kyeeri Yosia mwana wa Yehoyakimu ekee mangyi ya Yuda. Yeremia keengerase ivariya marero auka kwa Nndumi Iruva, fika masiyyony a mwaaka wa ikumi na lyimwi wa ushilyi lwa mangyi Sedekia mwana wa Yosia. Mwaaka yeto-da mwiiri wa karaanu llyo vandu va Yerusalemu valekamarwa ushingeny.

Uvaango lwa Yeremia

⁴ Nndumi Iruva mmbo eshivia Irero lyakwe ule,

⁵ “Kulaore kwenraamiswa mmbo sheekwishi, kulaore kwemmbonika mmbo shekusauwa, nshilekuvaanga kuve nkisuku masangeny.”

⁶ Sharouwa shaambaa, “Woi Nndumi Iruva, nshiishi irera-fo, mashika mmbo shikee n-du.”

⁷ Kyeendi Nndumi Iruva kashivia, “Kulasheamba, nshikee n-du-fo, nkuti kweende kwa vandu nkurumaa kwawo, kuvavie wo kindo nkuvyaa.

⁸ Yewe kulaereye vandu yevo-fo, kimmba mmbo shikee neewe nkuringe. Ni yeny Nndumi Iruva shaamba indo!”

⁹ Nalyo Nndumi Iruva kaorrwa woko lwakwe kapaana kana kyakwa, kashiivya, “Lola mmbo shavika marero akwa kaniny kyafo.

¹⁰ Inu mmbo shakuningaa wiidimi uwe ya vandu na vamangyi, kuwe na wiidimi lwa iillwa, isambwa, ilyamara na imamita deny, wiidimi lwa itana na ivaaya.”

Filya Yeremia Aleorwa

¹¹ Irero lya Nndumi Iruva lyikashisheya, “Nkyoki kulollye Yeremia?” Neeny shammbya, “Nshilollye urungo lwa nlosi.”

¹² Nndumi Iruva kashivia, “kwanlollya songosiny, yeny mmbo shikudeesye isalallya irero lyakwa lyiinukye.”

¹³ Irero lya Nndumi Iruva lyikarera neeny lya kavii lyikaamba, “A nkyokyi kulollye?” Neeny shammbya, “Mmbo shilollye nungu ikeerura nayo mmbo ikwiinyikkye na kunu shikai yuuka na kwandoo.”

¹⁴ Nndumi Iruva kashivia, “Urumato mmbo lupooka luuka taari ya ndoo lusheye vandu woose va uruka yelu.

¹⁵ Mashika mmbo nkevaanga ngyumangyi toose tishe. Vamangyi vawo mmbo vashereiyaa fitima fyawo yoo mwangony wa Yerusalemu vaveuringitya riti, sanda na miri ingyi myoose ya Yuda ishingillywa.

¹⁶ Na yeny mmbo nshevautyaa uvingo kimaruma kya utefusu lwavo lwa ishikashikapa mungo, vakarasya maruva a wongo, vakaindya mafwanu valesongosya veni.

¹⁷ Indi ulaalu, yewe Yeremia kudeesye kwipoo kwandevavia wo kindo shakuruma. Nta kulavaireye-fo shilasheekwallwa irosho mbee yawo.

¹⁸ Na Yeny, lola, Yeny mmbo shakwaallwa kuvake muri ukee mwiikare na ngo ta minya na isimamba lya arera kyilasha kya vamangyi va Yuda, vasongoru va vayo, vakohani va vayo na vandu woose urukeny.

¹⁹ Mmbo washekapanaa neewe, kya indi mmbakuvingaafo, mashika mmbo shikee neewe shikukire, Ni yeny Nndumi Iruva shaamba indo.”