Varome 7 - BIBILLYA Mareiyo Meele a Iruva

Kyaaso kisha kya veni mmba

¹ Nyira vanavama vakwa, a mmbo mulaishi (yaa mmbo sharera neewo vaishi mavavaso) sheelyi mavavaso mmbo ashillyaa nndu kyeeri akee na muu?

² Nsha elyi nka akee na mmi akee nshillye ni ivavaso kwa muni ulya kyeeri aiyo na muu, kyaindi mmi ulya kashefwa, we mmbo allekwa ivavasony lya mmi yeto.

³ Indi kyeeri mmi wakwe aiyo na muu, kwakooya atira mmi ungyi mmbo avangwaa ntuusi. Lyo mmi kamfwa mmbo ammba lleke, nnyakyikee-si ya ivavaso elyo-fo, nta nnyakyikee ntuusi naakwa oorwa ni mmi ungyi-fo.

⁴ Naakiwony-da vanavama, yeni mmbo mulefiiya mavavaso na shia ilya ya mwiili wa Kristo, naambo muve masaa a ungyi, we yeto aleruka auka kwa vafu naambo lwidimi ivikya Iruva ndunda.

⁵ Mashika llya lweekee na ngata ya mwiili, lango ta ulyamari yeto tilelollyo kyimaruma kya uvavaso, mmbo tilerunda mashora efo malungony any kutani taonisya ufu kimu,

⁶ Kyaindi ulaalu yese mmbo lwamboromuwa efo uvavasony, lwamfiiya ngata ilya yeekee ilulamya naambo lwiidimi irunndya ngata shiiya ya nriminy, shi ilya ya kasha-fo, nnyo ilya ya mareiyo.

Ulyamari na mavavaso

⁷ A lukaambany inda? Uvavaso ni ulyamari? Oode! Lyo nshemanyaa ulyamari kulaiyo uvavaso-fo. Mashika nsheemanyaa ilanga, kukooye kulore uvavaso lulaamba, “Kulalange-fo.”

⁸ Nkyo uvavaso mmbo luleniingya ulyamari mwaanya, lukavika kunu nnang'ani yakwa ngata shoose ya lango. Mashika ulyamari kulaiyo ivavaso mmbo lufiiye.

⁹ Neeny mmbo shekee na muu alya mapookyony kuleefo uvavaso, lyo kyeeri ivavaso lyilesha, ulyamari lukakwiipoo, neeny lyo shafwa.

¹⁰ Shalollyany sheelyi ivavaso llya lyishendee muu yeny mmbo lyilesheengye ufu.

¹¹ Mashika ulyamari kimmba lulewonisa mwaanya efo uvavasony, mmbo shilelembikya-u shafwa.

¹² Naasany uvavaso mmbo lukee weele na mavavaso akava meele, akaveva a usumanu na mesha.

¹³ A-kilya kyeekee kisha mmbo kileva ufu kwakwa? Oode, kyaindi ulyamari naambo lulollyo paa, mmbo lulesheengye ufu na shia yeyo shisha, naambo kyimaruma kya ivavaso ulyamari luvave deny.

Ngapanu nriminy wa nndu

¹⁴ Mashika lwiishi kimayeny kya uvavaso ni efo nriminy, kyaindi yeny mmbo nkee wa mwiiliny, mmbo shikee nkumbe ulyamariny.

¹⁵ Mashika nshiishi kindo nkeetana-fo, mashika kilya shikyikunndye nshikeekitana kuuta kilya shilakikunndye nkyo nkeekitana.

¹⁶ Lyo na shatana kilya shilakikunndye, mmbo shaveirikkya sheelyi mavavaso mmesha.

¹⁷ Naasany nshi yeny shimuni shatana indo-fo, ni ulyamari llwa lushikaaye.

¹⁸ Mashika shiishi kunu nnang'ani yakwa, yee kunu mwiiliny wakwa, nkwiifo mesha-fo, mashika ikunda shikunndye, lyo itana mesha nshaidima-fo.

¹⁹ Mashika kisha kilya shikunndye ikyitana nshikeekyitana-fo, kuuta ni kilya kyikasha shilakyikunndye, nkyo nkeetana.

²⁰ Naasany kwankooya kilya shilakyikundye nkyo shikeekyitana, naasa nshi yeny shimuni shikeekyitana-fo ni ulyamari llwa lushikaaye.

²¹ Naasany shalollya ngata yei, yeny shikundye itana kyisha, na kikasha mmbo kyiveiyoo.

²² Mashika lyo shikundye mavavaso a Iruva na nrima;

²³ Lyo kunu malungony akwa shalollya-fo ngata ingyi, ikeekapana fira na ngata ilya ya umanyo lwakwa, na ishikamara mfungwa wa ulyamari kyishuukya kunu mwiiliny wakwa.

²⁴ Oshiny lwakwa yeny shikee nndu nkiva. A mmbi asheshaauwaa yaa mwiiliny yeu wa ufu?

²⁵ Mmbo nkeyaana nnu Iruva kyimaruma kya Yesu Kristo Nndumi weeru. Nasaany, kimmba niindo, yeny shimuni na urango lwakwa mmbo sharunndya mavavaso a Iruva, lyo efo mwiiliny wakwa sharunndya finya ya ulyamari.