Varome 5 - BIBILLYA Mareiyo Meele a Iruva

Iirikkyo efo kwa Iruva

¹ Kwakooya lwammaa ilyimmyo usumanu kyimaruma kya iirikkyo, luve vafoo sau yoo kwa Iruva, kyeendwa ni Nndumi weeru Yesu Kristo.

² Mashika mmbwe yeto aleluniinga ifikkya isarya elyi na iirikkyo elyi lukee nalyo neefura nalyo lwiivikye nsia yaakana itumbe lya Iruva.

³ Nta nshi indo-da-fo, luvefura na ngatara-da, mashika ngatara mmbo teende usisiryo.

⁴ Na ishora lya ngatara ni yeende ukaari, na ukaari mmbo lweende ivika nsia.

⁵ Na ivika nsia llyivikaa nyinyira-fo. Mashika isarya lya Iruva lyammaa iletywa miriminy yeeru ni Mumuyo Mweele yeto lulensimbwa.

⁶ Mashika llya yese lwekee vafwafwa, fyeeri fikiinana lyo Kristo aleshelufiiya yese valyamari.

⁷ Kimmba kilavaa nndu nafwe kyimaruma kya nndu nsumanu, lyo kyishidimikaa nndu ikarya ifwa kyimaruma kya nndu nsha.

⁸ Kyaindi Iruva mmbo aora ukundi lwakwe we muni shaasa alukunndye. Mashika Kristo mmbo alefwa kyimaruma kyeru llya lwekee valyamari.

⁹ Naasa mmwasi ya efyo lukammaa yekennywa usumanu efo samuny yakwe, mmbo lushekiaa unyafi elo kyeendwa mmbwe.

¹⁰ Mashika kwakooya llya lwekee vakiduva mmbo lulesandwa na Iruva kyeendwa ni ufu lwa Mwana wakwe; llyo mmwasi lukammaa isandwa indo mmbo lusheekennywaa usumanu kyeendwa mmuu wakwe.

¹¹ Nta nshi indo-da-fo, mmbo luveetiri ifura lwiikee na Iruva kyeendwa ni Nndumi weeru Yesu Kristo, yeto luleona isandwa na Iruva kyimaruma kyakwe.

Adamu na Kristo

¹² Naasany, ulyamari mmbo luleendwa ulaniny ni nndu umwi, nalo lukaende ufu. Na ulyamari yelo lukasheya vandu woose mashika elyi woose valyamarye.

¹³ Mashika kulaore uvavaso lwensha ulyamari mmbo lweefo ulaniny, lyo ulyamari llulollywa kulaiyo ivavaso-fo.

¹⁴ Kyaindi lyo ufu mmbo lulekaa-u uka Adamu kufike Mose, nalo lukashillya naakwa ni valya valatannyi ulyamari luvakkye lulya lwa Adamu. Nalo lukashillya naakwa ni valya valatannyi ulyamari luvakkye lulya lwa Adamu, yeto akee kyaaso kya yeto asheshaa.

¹⁵ Lyo simbo yeyo nyileva sha urekwa elo-fo. Mashika kwakooya kyimaruma kya urekwa lwa nndu umwi veengyi mmbo valefwa. Isarya lya Iruva ni mmwasi na wiidimi lwa isarya lya nndu yeto umwi Yesu Kristo mmbo luleilannya kyimaruma kya vandu veengyi.

¹⁶ Nta kyeeso kya nndu yeto umwi nkiinani na wiidimi yelo-fo; mashika uvingo mmbo luleendwa ni nndu umwi nalo lukaende isisywa, kyaindi simbo ya isarya mmbo ilesha kyimaruma kya urekwa wiingyi, ikeende na yeekennywa usumanu.

¹⁷ Mashika kwakooya llya nndu umwi alelyamara ufu mmbo luleshillya kyeendo ni yeto umwi, ni mmwasiny deny kwa yewo vawaryaa wiingyi lwa isarya, na wiidimi lwa usumanu, nawo mmbo vasheshillyaa efo muuny kyeendwa ni yeto umwi we Yesu Kristo.

¹⁸ Naasany-da, kwakooya kyimaruma kya urekwa lumwi vandu woose mmbo valerumbuywa vasisyo, niindo-da kivekai kyimaruma kya usha lumwi luletanwa vandu woose mmbo valekennywa usumanu lurye muu.

¹⁹ Mashika kwakooya kyeendwa ni uravi lwa nndu umwi vandu veengyi mmbo valeallwa ulyamariny, naa indo-da, kimmba yeto umwi aleva mwiirikya, vandu veengyi mmbo valeekennywa usumanu.

²⁰ Kyaindi lyo uvavaso mmbo lulesha naambo urekwa llwa lung'ani deny; na kyeeri ulyamari luleilanya, na isarya mmbo lyileengera mmwasi.

²¹ Naambo, shaasa ulyamari luleshillya na ufu, kisorye indo na kya shia yeyo ya usumanu isarya lyishillye fika muu wa llung'anu kwi Yesu Kristo Nndumi weeru.