Varome 3 - BIBILLYA Mareiyo Meele a Iruva

¹ A Myuda nkyi kya mmwasi atiri? A irinwa mmbo lyisheekyaa-kyi?

² Mmbo lyisheekyaa deny taari toose. Mbele kimmba vakee varambikye fyaasa fya Iruva,

³ A ni indaany, kwankooya vengyi valakusirye-u? A ira lyawo valakusirya-u mmbo lyisheallwa usha lwa Iruva luve ruu?

⁴ Oode! Iruva mbwelollyo mmbwa dede na nndu ni llembi, shaasa kyikee kyireiye indi: “Naambo kulolyo yewe ni wa dede elyi kwarera, kweende ivinga elyi kwaanga ando afo a yaanduya.”

⁵ Kyaindi kwakooya uravi lweru mmbo lwaringisya usumanu lwa Iruva, mmbo lushaambaa-u-ki ndesa? A Iruva mmbo akee nravi elyi aora unyafi? (A shirere ki-nndu.)

⁶ Nta-fo. Kukooye niindo Iruva mmbo eeshidimaa inda yaanduya ulana?

⁷ Lyo kwakooya dede ya Iruva yeengera yoora paa itumbe lyakwe, kyeendwa ni wongo lwakwa, nkikyi elyi shekeengera yuutyo uvingo sheelyi nkee llyamari?

⁸ Nkyokyi kyishimaa lulaambe (lulefingyo wongo, na vengyi vakakaarisa sheelyi luleamba indo), Ndeny lutani makasha, naambo mesha asorye, nawo yaanduyo lyawo lyitire usumanu.

Nkwiifo Nndu Akee Nsumanu-fo

⁹ A ni indaany? Yese Vayuda lukee kyeni ngota vengyi? Oode, nta kinnywa-fo. Mashika lwammaa yuutya Vayuda na Vagriki uvingo sheelyi mmbo vakee valammyi ni ulyamari.

¹⁰ Shaasa kyikee kyireiye, “Nkwiifo atiri usumanu nta umwi-fo.

¹¹ Nkwiifo eeshi-fo, nkwiifo mwiruuya Iruva-fo.

¹² Woose mmbo vaevekkye, vakapwaa woose deny. Nkwiifo mwitana mesha-fo, oode, nta umwi-fo.

¹³ Uroo lwawo ni kifu kirwe, na ngyulumi tawo mmbo tilerera fya ntambo. Uroi lwa shoka mmbo lukee efo kaniny kyawo.

¹⁴ Kana kyawo mmbo keeshwe fidengo na kivawo.

¹⁵ Marende awo mmbo arishyaa indepuswa samu.

¹⁶ Ikasheesa na nyinyira fikakaa efo shieny tawo.

¹⁷ Nta shia ya usumanu mbaleimanya-fo.

¹⁸ Iindya Iruva llyikee efo misony awo-fo.”

¹⁹ Naasany lwiishi sheelyi findo fyoose firerwaa mmavavaso mmbo fyarerya kwa yewo vakee si ya mavavaso, naambo vamalalyiswa, na ulana loose lukae-si ya uvingo lwa Iruva.

²⁰ Mashika nkwiifo nta nndu umwi atiri mwiili asheekennywa usumanu mmashora a mavavaso-fo. Mashika imanya ulyamari mmbo lyeendwaa mmavavaso.

Iruva alwiirikya kyeendwa nkikusiryo

²¹ Lyoony ulaalu, usumanu lwa Iruva lwankoora paa kulaiyo mavavaso, mmbo lukeekureekkyo ni mavavaso na vakisuku.

²² Ni usumanu lwa Iruva lweendwa nkikusiryo kya Yesu Kristo kwa woose yewo vairikya. Lyo nkwiyoo kilakaniso-fo.

²³ Mashika woose mmbo vatannyi ulyamari, na yaanguywa ni itumbe lya Iruva.

²⁴ Mmbo vashekennywaa usumanu ruu kyeendwa ni isarya lyakwe, kwa shia ya iwowowa ni Kristo Yesu.

²⁵ Mmbwe Iruva alemmbika nave nsandi kyeendwa nkikusiryo efo samuny yakwe, naambo noore usumanu lwakwe, kyimaruma kya ilekeya efo usisiryony lwa Iruva ngyulyamari toose tilensongwa itanwa.

²⁶ Naambo noore usumanu lwakwe kyeeri ekyi, naveva mmbwe muni usumanu na mwiekennya usumanu yeto moose airikye Yesu.

²⁷ A nkwi ikurosa lyafo lyikai? Akalyo lyanrayrwa poo. Ni ivavaso lya ngata-kyi? Kwa ivavaso lya mitannyi? Oode, nkwa ivavaso lya kikusiryo.

²⁸ Naasany mmbo lwalollya sheelyi nndu wa vandu mmbo asheekennywa usumanu kyuuka na kikusiryo kulaiyo mashora a mavavaso.

²⁹ Ao le, Iruva mmbo akee Iruva wa Vayuda veni? Nshi akee Iruva wa Vamasanga woose? Yee ni Iruva wa masanga woose.

³⁰ Lyo dede kwankooya Iruva ni umwi, nawe nasheekennya yewo vakee varini usumanu, naakwa ni valya valakee varini mmbo asheveekennyaa usumanu na shia yeyo sheni.

³¹ A-le ndesa, mmbo luminaa mavavaso kyimaruma kya kikusiryo ekyo? Oode, ando a vayo indo mmbo lwakaarisa mavavaso.