Varome 16 - BIBILLYA Mareiyo Meele a Iruva

Fiidikiro kwa Vandu vave na vave

¹ Mmbo shikeerambikya Fibi mwanamaye weeru kwany. We ni mwifurukannya siri ya Kenkrea.

² Shamutereva mbwaryeny kyimaruma kya Nndumi; shaasa kyikooye veele, mushemweekya kindo kyoose yekyo kishenting'aa, mashika naako niwe mmbo aleva mwiekkya vandu veengyi, kavesheekkya naako ni yeny.

³ Shiidikiryeny Priska na Akila. Yeva ni varundi va Kristo Yesu kimwi sha yeny.

⁴ Nawo mmbo vekudeesye naako ni irumbuwa nrwe kyimaruma kyakwa; nawo mmbo nkevaana, nta nshi yeny shimuni-da-fo, kyaindi ando amwi na Siri ta vandu va masanga moose. Shiidikiryeny na siri yeyo ya mmba kwawo.

⁵ Shiidikiryeny Epaineto, nkunde wakwa yeto alepooka tishi iirikya Kristo kulya Asia.

⁶ Shiidikiryeny na Miryamu yeto alekuvinisa nnu-dwa kyimaruma kyany.

⁷ Shiidikiryeny na Androniko na Yunia, wo ni vandu vakwa, valefingwa ando amwi neeny, vakavetira nnduma efo nnang'ani ya varumi; nawo mmbo valeshisongoya imanya Nndumi.

⁸ Shiidikiryeny na Ampliato, nkunde wakwa kyimaruma kya Nndumi.

⁹ Shiidikiryeny na Urbano, nndundi wa Kristo ando amwi neeny, na Stakisi, nkunde wakwa.

¹⁰ Shiidikiryeny na Apele, nawe akee mwirikye ni Kristo. Shiidikiryeny na vandu va mmba ya Aristabulo.

¹¹ Shiidikiryeny Herodiani, nndu wakwa. Shiidikiryeny na vandu va mmba ya Narkiso, nawo vakee na Nndumi.

¹² Shiidikiryeny na Trifaina na Trifosa, vasasari nnu efo kwa Nndumi. Shiidikiryeny na Persisi, nkunde alekutakura nnu kyimaruma kya Nndumi.

¹³ Shiidikiryeny na Rufo, nsauwe wa Nndumi, na maaye, kaveva na ma-da.

¹⁴ Shiidikiryeny na Asinkrito, Flegoni, Herme, Patroba, Herma, na vanavama yewo vakee nawo.

¹⁵ Shiidikiryeny Filologo na Yulia, Nerea na mfwamaye, na Olimpa, na veele woose yewo vakee ando amwi nawo.

¹⁶ Idikiraniny mwikumimindaa na ngata sheele. Siri toose ta Kristo nato tamwiidikira.

Marero eelakana nawo

¹⁷ Vanavama vakwa, shamwiikima, kwiiseny nnu na valya vatiri uriingyi na filya fyeende misindara nafyo fivikyani kiduva na ufundo lwany.

¹⁸ Mashika yewo vakee indo mmbakeerunndya Nndumi weeru Yesu Kristo-fo, nndeu tawo veni. Nawo mmbo vareraa marero mafoo vekukundisaa, ate mmbo vakeelemba mirima ya vandu vatele.

¹⁹ Mashika wiindi lwany mmbo lulemanyika ni vandu woose, nkyo kyimaruma shafura neeni. Lyo mmbo shikundye muve vaarya nnu mwitanaa findo fisha, muveva vatondo findony fikasha.

²⁰ Nawe Iruva mmbo ashekakashaa mmbishwa efo si ya marende any uviny.

²¹ Timoteo, ulya akee nndundi ando amwi neeny amwiidikira, na Lukio na Yason, na Sosipatro, vanavama.

²² Neeny Tertio, shareiya barrwa yei shamwiidikira shikee na Nndumi.

²³ Gayo yeto aleshiwarya na Siri shoose-da amwiidikira na irina lya Nndumi. Erasto, mwisalallya muri, nawe amwiidikira, na Kwarto, we mwanamaye weeru. [

²⁴ Isarya lya Nndumi weeru Yesu Kristo lyikae neeni moose Amen.]

Kiterewo kya yaarafuma

²⁵ Ulaaluny narumishwa yeto ashidimaa imutumarisa kiinani na ndera yakwa na kya elyi Yesu Kristo akee yongoywa kiinani na masukuyony a kyama kilya kyekee kyisikye uka kasha.

²⁶ Kyikashesukuwa kyeeri ekyi efo mareiyony a vakisuku, kyikashemanyika ni vandu va masanga moose, shaasa Iruva wa llung'anu alevavasya. Naambo vainndye Kyikusiryo ekyo.

²⁷ Ni we Iruva muni araiye urango. Nnduma mmbwakwe kyeendwa ni Yesu Kristo, llung'anu na llung'anu. Amen.