Varome 14 - BIBILLYA Mareiyo Meele a Iruva

Kulautye vengyi uvingo

¹ Yeto akee mfwafwa wa kikusiryo mmbwaryeny kwany, lyo mulamuutye uvingo-fo.

² Nndu wa kyikusiryo mmbo akulyiiya shoonga toose, lyo yeto mfwafwa kyikusiryony mmbo alya nyany sheni.

³ Mwiilya shoonga toose nalamini yeto ara nalalya-fo, mashika woose mmba Iruva.

⁴ A-yewe ni-vi ndesa kutani kwautya ungyi uvingo? Ni nndumi yeto wakwe muni amwiirikyaa ao nallemi. Ni yoo kwa nndumi yeto wakwe kweni asalalaa ao nawe.

⁵ Nndu ungyi mmbo alollya mikonu myoose nshi kyimwi-fo, na ungyi kalollya mikonu myoose nkyimwi nsi. Nshaasa wo nndu alollya we muni.

⁶ Yeto alollya nkonu mmbee ntorya mmwasi, ni Nndumi amwiidimisya indo, neeto mwiilya shoonga ni Nndumi da ansimba indo. Na lyingyi-se yeto ara nalalya kindo kive, ni efo kwa Nndumi avekai, kavemwaana.

⁷ Mashika nkwiifo nta nndu umwi aidima ikaau na muu we muni-fo, nta yeto mwiifwa nnyafwa kyuuka nawe muni-fo.

⁸ Mashika kwakooya lwiiyo na muu mmbo lweekyo ni Nndumi, na lukafwa mmbo lwafwa lukee na Nndumi. Kyasiany lukakaa na muu ao lukafwa mmbo lukee va Nndumi.

⁹ Ekyo nkyo kileengye Kristo kafwa numa kawuya iruka naambo nashillye yewo vakee na muu kiwo neewo vafiiye.

¹⁰ A nkyiki elyi kwautya mwanamau uvingo? Ao kwammina? Lyo lumanyi sheelyi yese loose mmbo lushesalalaa mbee ya kitima kya ushilyi kya Iruva.

¹¹ Kimmba kyikee kyireiye indi, Yeny Nndumi shiiyo, woose mmbo vasheshifiiryaa ndi. Na vandu woose vasheshaambaa paa.

¹² Niindo kyikai, wo umwi weeru mmbo asheutaa yeekyena lyakwe muni yoo mbee ya Iruva.

Yeengye vengyi misindara

¹³ Naasany lulakiengere ikurera kyikasha-fo, kyeendi ng'waana lurummbwe indi, kulave nndu avika kindo kyeengye mwanamaye nsindara ao kyentuula.

¹⁴ Shiishi deny nesununndywa nnu na irina lya Nndumi Yesu, sheelyi nkwiifo kindo kyikee kyitefusu uka efo kyiparikye-fo. Kyaindi yeto muni alollya kindo nkyitefusu, kwakwe we muni mmbo kyivaa kyitefusu.

¹⁵ Na nndu wafo kwakooya asherovywaa nriminy kyeendwa nshoonga, yewe mmbo kwamaangwa efo ikundeny lyafo. Kyeendwa nshoonga yafo kulasherovya nndu ulya Kristo alefwa kyimaruma kyakwe.

¹⁶ Naasany, mikaaye yaany misha ilashesendwa na ukasha-fo.

¹⁷ Mashika umangyi lwa Iruva nshi ilya na ina-fo, ni usumanu, ufoo na ifura nnang'ani ya Mumuyo Mweele.

¹⁸ Mashika yeto arundya Kristo nisha efo findony efyo mmbo asennya Iruva, naakwa ni vandu vakamwirikya.

¹⁹ Naasa kwakooya niindo, lusore ngata ya ufoo na yeyo yekaarisana.

²⁰ Lola kulashelyamara ishora lya Iruva kweengywa nshoonga. Yee, fyoose mfisha; kyaindi nkyikasha kwakooya nndu alya shoonga keengye vengyi nsindara.

²¹ Nkyeni deny shire shilalya nyama ao ina wari ao itana kindo kingyi kyoose kwakooya nndu ungyi asheutaa-u nsindara.

²² Kyikusiryo kyilya kukee nakyo kyitire kwikee na Iruva. Ngoma nndu yeto nalalollyaa nyinyira we muni kya findo filya we muni afiirikye.

²³ Lyo mwiilya na nyinyira, mmbo ambutywa uvingo kyeamba anrenga, mashika elyi alya nalatiri iirikyo. Na wo kindo nndu atana kyilaryani na kyikusiryo ni ulyamari.