Varome 10 - BIBILLYA Mareiyo Meele a Iruva

¹ Vanavama vakwa, kindo shilanngye nnu deny nriminy wakwa, na kiterewo kyakwa shiterevaa Iruva kyimaruma kyawo, naambo vakooye ikirwa.

² Mashika lyo shiishi sheelyi vatiri usau kyimaruma kya Iruva, lyo nshi kya urango-fo.

³ Mashika lyo vekee indo valaishi usumanu lwa Iruva, lyo vekunndye yoora usumanu lwawo veni, mbalekunyisya efo usumanuny lwa Iruva-fo.

⁴ Mashika Kristo mmbwe aleinutya uvavaso, naambo wo nndu akusirya-u nakooye yeekennywa usumanu.

Ukiro kwa Woose

⁵ Na Mose nawe kareiya kya usumanu yelo lweendwa mavavaso, kaamba, Yeto mwiinutya efyo mmbo ashekaa na muu kyimaruma kya vayo.

⁶ Kyaindi usumanu lulya lwaendwa ni iirikyo, mmbo lwaamba indi, Lola kulasheamba nriminy wafo, Ni vi yeto ashesaamaa iruveeu? (Nkyo ni yoolota Kristo si),

⁷ ao, Ni vi yeto ashoolokaa nafike kwa vafu? (Nkyo ni isaamisa Kristo uwe, nooke kwa vafu).

⁸ Lyo mmbo aamba inda? Irero llya mmbo lyikee kufii neewe, yoo kaniny kyafo, neefo nriminy wafo; llyo irero llya lya iirikyo lukeelyivambisa.

⁹ Mashika kwairikya Yesu na kana kyafo sheelyi ni Nndumi, neekusirya-u efo nriminy wafo sheelyi Iruva alennruta kooka kwa vafu mmbo kushekoyaa ikirwa.

¹⁰ Mashika nndu mmbo eerikkya na nrima kutani awonisa usumanu, na iirikkya eereraa na kana kyakwe muni kutani awonisa ukiro.

¹¹ Mashika mareiyo aamba, “Yeto moose ashenkusiryaa nnyashesutwaa-fo.”

¹² Mashika nkwiyo kilakaniso nnang'ani ya Myuda na Mgriki-fo. Mashika we ni Nndumi wa woose, araiye simbo kwa woose yewo vemmbaanga.

¹³ Mashika, wo nndu yeto ashevangaa Nndumi mmbo ashekirwaa.

¹⁴ A mmbo vashevangaa inda yeto valamwiirikye? Na lyingyi, mmbo vashiriikyaa inda yeto valandemwiite? A mmbo vamwiitaa inda valatiri mwiwoongoya?

¹⁵ Na lyingyi mmbo vavambisaa inda irero, valanderumwa? Nshaasa-da kyikee kyireiye, Apaa shaasa marende awo asenyi yewo veevambisa Nrumi Shisha!

¹⁶ Kyaindi nshi woose valewarya Nrumi ilya ya Nsia-fo. Nshaasa Isaya aamba, A-Nndumi, ni-vi alewarya nrumi yeeru?

¹⁷ Kyasiany, kikusiryo kimayeny kya vayo ni iita, na iita mmbo lyishee na irero lya Kristo.

¹⁸ Indi mmbo shaamba, A wo mmbo kulaore valeita? Yee, valeita. Unyanga lwawo mmbo lulekwaana ulaniny koose, na marero awo fika fishingony fya ulana

¹⁹ Kyaindi mmbo shavesa, Vaisraeli wo valemanya-se? Mbele Mose mmbo aamba, “Mmbo vashelollyaa kififi kyeendwa ni vandu valakee vakwa, kyimaruma kya vandu valaishi shivaengye itafukwa.

²⁰ Na Isaya atiri ukaari uniini, nawe aamba indi, Mmbo shilelollyo ni yewo valekeeshiruuya shamanyika paa ni yewo valakeevesa mbony takwa.”

²¹ Lyo kwa Israeli kaamba, “Nkonu moose mmbo shileoroya vandu valashiirikyaa vakee filemi maako akwa.”