Valevi 8 - BIBILLYA Mareiyo Meele a Iruva

Aron na Vana Vakwe Vaatwa Mashoreny

¹ Nndumi Iruva karera na Mose kammbia,

² Ipoo Aron ando amwi na vasero vakwe na masara awo, na mafura alya a yaamba, na shau ya kiraso kya ulyamari, na suva ivii, nankusha wa mikate ilatiri ntarang'o;

³ kusangirye ironda lyoose yoo mwaangony wa yeemeny lyeekwanannya.

⁴ Naasa mose kavetana shaasa Nndumi Iruva ambavavasya, na ironda elyo lyikakuummbya yoo mwaangony wa yeema lyeekwaananya.

⁵ Mose kavia ironda elyo, kindo Nndumi Iruva aleluvavasya kitanwa nkyo ekyi.

⁶ Naasa Mose keende nang'u Aron, na vasero vakwe kaveelyisa na mura.

⁷ Naasa kavika Aron kansu ilya kamfingya na nkanda wa vayo, kavembika ikoti, neembika naifera, neemfingya nkanda eto wa ishopa naifera yeyo, kanfingya naifera, na nkanda yeto

⁸ Naasa kambikya mboloko ilya ya yoo mbafuny; kavikafo na Urimu na Thumimu efo kikushuny ekyo kya mbafuny.

⁹ Kammbika na kofia ilya nrwen, na yoo uwe ya kofia, taari ya mbee, kavikau kiparwe kya saabu, nkyo ureto weele, shaasa Nndumi Iruva alevavasya Mose.

¹⁰ Naasany Mose kaipoo mafura yoo meele a iletya, kaletya mafura ando yoo, na fyoose fiiyo, kafiilyisa.

¹¹ Numa kaletya mafura yoo uwe ya kitara kyeerasya ka-mfungare, na iletya kitara ekyo mafuraa na fiiya fya vayo fyoose, na birika na kirembo kya vayo naambo nafiilyise.

¹² Numa kaletya Aron mafura yoo nrony, kamwaamba mafura naambo namwiilyise.

¹³ Naasa Mose keende vasero va Aron, kavavika kansu, neevafingya mikanda, neevavika kofia; shaasa Nndumi Iruva alevavasya Mose.

¹⁴ Naasa keende shau ilya ya kiraso kya ulyamari, na Aron na vasero vakwe vakavika maako awo yoo nrony wa ng'umbe yeyo ya kiraso kya ulyamari.

¹⁵ Naasa kaishisha, na Mose kaipoo samu ya vayo, kaishoshotya na nni taari toose ta kitara kyeerasya, kaeremuta nayo kitara ekyo, numa kaletya samu yeyo yoo kwasi ya kitara, kakyeeremuta, naambo navike usandi kimaruma kya vayo.

¹⁶ Numa kaipoo mafura moose yoo ekee ndeuny na uvambu yelo lwa irima, na syo ta vayo ivii, na mafura a vayo, Mose kafikorya yoo uwe ya kitara ekyo.

¹⁷ Lyo ng'umbe yeyo na shony ya vayo na nyama ta vayo, na mura wa vayo, kafikorya na muro yoo poo, indo shaasa Nndumi Iruva alevavasya Mose.

¹⁸ Numa kaserisya-u suva ilya ya kiraso kyeekora na muro, na Aron na vasero vakwe vakaekera maako awo yoo nrwen wa suva illya.

¹⁹ Naasa kaishisha; na Mose kashoshotya samu ya vayo taari toose ta kitara.

²⁰ Numa kalengwa lengwa suva yeyo fyenga, na Mose kakora nrwe na fyenga efyo na mafura.

²¹ Kawuya kasandya maala na marende a vayo, Mose kakorya suva yeyo shoose yoouwe ya kitara, kyikava ni kiraso kyeekora na muro kive nrungo nsha, nkyo kiraso kyeeserisya Nndumi Iruva na muro, shaasa Nndumi Iruva alevavasya Mose,

²² Numa kawuya kaserisyau suva ya kavii, suva yeyo ya ivaeremuta, na Aron na vasero vakwe vakayeekerya maako yoo nron.

²³ Naasa kaishisha; Mose kaipoou samu ya vayo maata kaamba kuri ka Aron yoo mbai, na nni nnini wa woko usha, na nni nniini wa urende llwa woko usha.

²⁴ Numa keende vasero va Aron, Mose kaamba marwi awo a woko usha samu ilya, na mini miniini ya urende lwa woko usha, numa Mose kaamba samu yeyo efo mbai ya kitara ekyo koose.

²⁵ Kawuya keepoo mafura yoo na nkia utiri mafura, na mafura moose a ndeu, na uvambu lwa irima, na syo ivii, na mafura a vayo, na urende yelo usha;

²⁶ neefo kikapuny ekyo kyeekee mbee ya Nndumi Iruva, kootau nkate umwi ulatiri ntarang'u, na nkate umwi ukeensongosye na mafura, na kibereshu kimwi kisiise kafivika yoo mafureny, na uwe ya urende elo usha;

²⁷ naasa karambikya Aron efyo fyoose na vasero vakwe na ifiringisyau five kiraso kya Nndumi Iruva.

²⁸ Naasa Mose kafiarya lyingi, kafikorya yoo uwe ya kitara kyeekorya firaso, uwe ya kiraso ekyo kyeekorwaa, nafyo fyekee fyeeveelisa, ni nrungo nsha nnu; ni kiraso kyeserisyo Nndumi Iruva na muro.

²⁹ Naasa Mose kaipoo kifoya kaora wende lwa iniingya Nndumi Iruva Waavi elo lwa Suva ya kiraso kyeele llwa Mose shaasa Nndumi Iruva alevavasya.

³⁰ Naaasa Mose keepoou mafura alya a yaamba, na samu ilya yeekee alya uwe ya kitara, kaletya Aron, neefo masareny akwe na vasero vakwe na masara a vasero vakwe ando amwi nawe.

³¹ Naasa Mose kavia Aron na vasero vakwe, “Koryeny nyama yeyo yoo mwaangony wa yeema; mwiili yeu kweni, na mikate ilya ikee kulya kikapuny kilya kwa imwiilyisa, shaasa shilevavasya kyeyaamba. Ni Aron na vasero vakwe vasheilyaa.

³² Neekyo kisaau kya nyama yeyo na mikate yeyo mmbo kimamitwaa na muro.

³³ Ando a mikonu mfungare mulasheuka yoo mwaangony wa yeema elyo-fo, kutani mikonu yeyo ya yiilyiso lyany yasia, mashika niindo ashemutannyaa ando a mikonu mfungare.

³⁴ Niindo indo shaasa kyatanyika inu, niindo Nndumi Iruva alevavasya kitanyike, naambo kive usandi kwany,

³⁵ Yeni mmbo mukaa yoo mwangony wa yeema ando a mikonu mfungare, kio na nsanyiny, neeringau mbee ya Nndumi Iruva, naambo mulasheefwa, shamashika niindo shilevavasyo.”

³⁶ Kyasia Aron na vasero vakwe vakatana fyoose indo shaasa Nndumi Iruva alevavasya Mose.