Valevi 7 - BIBILLYA Mareiyo Meele a Iruva

Firaso fya Itaa Sye

¹ Kya ivavasyo lya kiraso kya urekwa ni indi, mmbo ikee sheele deny.

² Mmbo vashishyaa kiraso kya urekwa alya kweni vashishya kiraso kyeemamitwa; na samu ya vayo ifwallywa kitara kyeerasya taari toose.

³ Yoo kirasony ekyo mmbo asheserisyaau mafura moose; nkia wa vayo utiri mafura, na mafura yoo a ingau,

⁴ na syo ta vayo ivii, na mafura yoo awarani nato, akee kufii na kisi kya vayo, na uvambu elo lwa irima;

⁵ llyo nkohani ashefimamityaa yoo uwe ya kitara kyeerasya, kive ni kiraso kwa Nndumi Iruva kya muro, nkyo kiraso kya urekwa.

⁶ Wo nndu nndumi wa efo kwa makohani mmbo ashelyaa-u yoo nyameny yeyo, ishelyiyo yoo ando eele, kimmba ikee sheele deny.

⁷ Shaasa kiraso kya ulyamari kikai, na shaasa kiraso kya urekwa kikai, ivavasyo lya vayo llyo yeni, nkohani navike nayo usandi, mmbwe asherunda nayo.

⁸ Lyingi nkohani yeto asheserisaa kiraso ekyo kyeemamita kya nndu moose, nkohani mmbo asheipoo shonyi ya kindo ekyo kya kiraso kyeemamitwa na muro yekyo aserisyaa-u.

⁹ Na wo kiraso kya nswa kilekoryo irikony, neefyo filekoryo nunguny ao kikaangony, fyoose mmbo fishevaa fya kuhani yeto alefiserisya-u.

¹⁰ Na wo kiraso kya nswa, kwakooya ukee nndeesye na mafura, ao kwakooya ukeeangara, vana woose va Aron mmbo vasheulyaa, waavi lwiinani woose.

Firaso fya Wiitanu

¹¹ Ivavaso lya kiraso kya ufoo, kyeeserisya Nndumi Iruva, nkyo ekyi,

¹² Kwakooya nndu aniingya kyaanu llyo asheserisaa ando amwi na kiraso ekyo kya kyaanu kya mikate itiri ntarang'u, ikeeshideesye na mafura na mikate itiri ntarang'u ikemyaambe mafura na mikate ya nswa mmamiri isinaa mafura.

¹³ Mmbo ashendee firaso fyakwe, ando amwi na mikate itiri ntarang'u, ando amwi na kiraso kya ufoo, kive kya kyaanu.

¹⁴ Nang'u mmbo asheseerisaa-u kimwi kwa wo kindo kyeendwa-u kive kiraso kwa Nndumi Iruva; kishevaa kya nkohani yeto asheletyaa samu yeyo ya kiraso kya ufoo.

¹⁵ Na nyama yeyo ya firaso fyakwe fya ufoo fileshishwa fya kyaanu mmbo ilyiwaa nkonu yeto mweni wa firaso ilerewa fika ngama-fo.

¹⁶ Lyo kwankooya nkiraso kya kyaasa, ao kiraso kya pya, mmbo ishelyiwaa nkonu yeto-da yaniingyo, na elyi lya ndesi ekyo kikoywaa kilesaau kivelyia;

¹⁷ lyo ekyo kilesaau, kya nyama eto ta kiraso kufike nkonu wa kararu mmbo kikorwaa na muro.

¹⁸ Na lyingi nyama ya kiraso ekyo kya ufoo kwakooya yalyiwa kumfika nkonu wa kararu, nnyishiirikywa-fo, nta nnyisheekenywa yeto mwiiserisyau-fo, ni ya utefusu, neeto mwiilya mmbo ashiiboou uravi lwakwe.

¹⁹ Na kwakooya nyama yapaana kindo kitefusu ilalyiwa-fo, mmbo ikorwaa na muro. Na nyama yeyo ingi, wo nndu mweremutu ashiidimaa yiilya;

²⁰ lyo nndu ashelyaa nyama ya kiraso kya ufoo, tikee ta Nndumi Iruva, nndu akee ntefusu kalya nyama yeyo narauwa na vandu vengyi deny.

²¹ Na kwakooya nndu ungi, ao kya kindo kitefusu, ao findo fingi fyoose firavi, numa nndu yeto kalya nyama ya kiraso kya ufoo, kya Nndumi Iruva, nndu yeto narauwa na vandu vakwe.

²² Nndumi Iruva karera na Mose kammbia,

²³ Rera na vana va Israeli kuvavie, “Mulalye mafura, a ng'umbe nta a suva-fo, nta a mburu-fo.”

²⁴ Na mafura a kindo kyafwa kyeni, na mafura a kindo kileratuwa ni ifisi, mutiri mumu weerunda nangu mashora engi, lyo malaalye tara-fo.

²⁵ Mashika nndu yeto ashelyaa mafura yoo, akee ni mafura a findo efyo vandu vaserisya Nndumi Iruva na muro, nndu mwiilya mafura sha yoo mmbo asherauwaa na vandu vakwe.

²⁶ Nta mulasheena samu-fo, nta ya ndeye, nta ya kindo kyingyi kya mmba.

²⁷ Nndu mwiina samu narauwa na vandu vakwe.

²⁸ Nndumi Iruva karera na Mose kammbia,

²⁹ Rera na vana va Israeli kuvavie, “Yeto asheserisyaa Nndumi Iruva firaso fyakwe, yuuka efo kirasony ekyo kyakwe kya ufoo;

³⁰ maako akwe muni nng'u amweengyee kiraso ekyo kyeeserisya na muro, mafura a vayo ando amwi na kidari nafyeende naambo kidari ekyo kisisikyony kive kiraso kyeesisika mbee ya Nndumi Iruva.

³¹ Nkohani mmbo ashekoryaa mafura yoo uwe ya kitara kyeerasya; lyo kidari ekyo mmbo kishevaa kya Aron na vana vakwe.

³² Urende elo usha mmbo muningaa nkohani luve kiraso kyaipowa yoo firasony fyany fya ufoo.

³³ Efo vaserony va Aron yeto asheserisyaau samu yeyo ya firaso fya ufoo, na mafura a vayo, we mmbo asheniingwaa urende elo usha luve waavi lwakwe.

³⁴ Mashika, kitara ekyo kyeerinyiswa, na urende elo lweepoiyou, mmbo shasoka vana va Israeli, fyuuka efo firasony fwawo fya ufoo, neeny shafiniingya Nkohani Aron na vasero vakwe, luve ni usumanu lwawo llung'ani luuka kwa vana va Israeli.”

³⁵ Yelu llo waavi lwa Aron, na waavi lwa vasero vakwe, elyi valeambwa mafura, kimaruma kya firaso efo fiserisyoo Nndumi Iruva na muro, bookya nkonu ulya valevikwa varundye Nndumi Iruva efo ishoreny lya ukohani;

³⁶ ni waavi Nndumi Iruva alevavasya vana va Israeli vavaniingye, nkonu ulya valeambwa mafura. Ni usumanu lwawo llung'anu lwa marika awo moose.

³⁷ Ivavaso lya kiraso kyeekora na muro llyo elyi; na kiraso kya nswa, na lya kiraso kya ulyamari, na lya kiraso kya urekwa, na kya yiilyiswa, na kya firaso fya ufoo;

³⁸ mfyo Nndumi Iruva alevavasya Mose alya ifumbuny lya Sinai, nkonu ulya alevavasya vana va Israeli vautye Nndumi Iruva firaso fyawo, vekee kulya kasa ka Sinai.