Valevi 6 - BIBILLYA Mareiyo Meele a Iruva

¹ Nndumi Iruva karera na Mose kammbia,

² Kwakooya nndu moose atana ulyamari, karengye Nndumi Iruva, kalemba urooye efo findony fya yaalaashiana, ao yiirikyana, ao kya illemba, ao kya ifota eto ungyi;

³ ao kakooya kindo kilereka na yaamba wongo, neelya mboo, kimwi kya efyo nndu ashetanaau kava mmbo arengaany;

⁴ llyoony elyi antana ulyamari, karenga mmbo asheviiraa ekyo alekiwonisa na ulembi, ao kilya aleonisa neelammya, ao kilya akee mwaarye, ao kilya kyeerekye kakikooya we,

⁵ ao kindo kyoose akilyiyyaa mboo ya wongo;mmbo ashekiviraa kyoose songosiny, neengeryeu na kyenga kya karaanu uwe ya vayo, naviirye yeto muni nkonu yeto mweni asheutyoo uvingo kyeyaamba mmbo arengye.

⁶ Numa llyo neendeny kiraso kya ulyamari kwa Nndumi Iruva, ni suva ya irondeny lyakwe, ilatiri teve, shaasa akee mmbavasye ive nkyo kiraso kya ulyamari, naniingye nkohani;

⁷ llyo nkohani ashevikaa usandi kimaruma kyakwe mbee ya Nndumi Iruva, nawe nafwaayo kya ekyo kyoose atana kikee ulyamari.

Kiraso kya Imamita na Muro

⁸ Nndumi Iruva karera na Mose kammbia,

⁹ “Kyasia vavasya Aron na vana vakwe kuvavie, ivavaaso lya kiraso kyeekora na muro mmbo lyikee indi; kiraso ekyo kyeemamita ivikwa yoo murony uwe ya kitara kyeerasya ando a kio kyoose kifike ngama, na muro yeto yoo kitareny ukee wiishaakaa ulashefwa.

¹⁰ Na nkohani narae soori yakwe shyooke, na suruvale shyooke narae mwiiliny wakwe, nawe nasheraa ifu elyo lya findo fyemamitwa yoo kitareny, naasa nalyivike yoo mbai ya kitara ekyo kyeerasya.

¹¹ Kamma naute-fo masara yoo akwe naraa soori tingi, naipoony ifu llya nalyisomute fika poo ya ulale ando esha.

¹² “Na muro yeto ukee yoo uwe ya kitara kyeerasya mmbo asheuraau wishaakaa kyeeri kyoose ulasheerumika, nawe mmbo emamitaa ngwi na muro wo nkonu ngama, nawe naaleu firaso fyemamita uwe ya vayo, nawe asherumataa mafura a firaso fya ufoo yoo uwe ya vayo.

¹³ Kyeeri kyoose niifufura muro eto ulasheerumika.

Kiraso kya Fimu

¹⁴ “Na ivavaso lya kiraso kya nswa llyo elyi; vana va Aron mmbo vasheiserisyaa Nndumi Iruva yoo kitareny kyeerasya.

¹⁵ Nawe nauteu ng'unde imwi ya nswa eto, nswa eto mmamiri va kiraso ekyo kya nswa, na mafura yoo a vayo, na ubani elo loose lukee yoo uwe ya nswa kivaro kya numa naumamitye yoo uwe ya kitara kyeerasya uve nrungo nsha, kive kyeekumbwa kwa Nndumi Iruva.

¹⁶ Na nswa yeto wasaau ni Aron na vana vakwe vaulyaa; ulyiiyo ando yoo eele ulakeembike ntarang'o, efo kiri ka yeema elyo yeele nng'u vashenlyiiyaa.

¹⁷ Ulavikwa ntarang'u-fo. Mmbo shavaniinga uve waavi lwawo luuka efo firasony efyo fyeeserisya Nndumi Iruva na muro, nkindo kyeele deny, sha kiraso ekyo kya ulyamari, na kiraso ekyo kya urekwa.

¹⁸ Mwana moose wa womi wa vana va Aron nkuti nalyeu, luve ni waavi lwawo llung'anu wo irika lyany, efo firasony fya Nndumi Iruva aserisyo na muro, nndu moose yeto ashefipaanaa mmbo avaa mweele.

¹⁹ “Nndumi Iruva karera na Mose kammbia,

²⁰ ‘Firaso fya Aron na vana vakwe efyo vashengyee Nndumi Iruva nkonu yeto asheambwaa mafura, nng'u yaa; ni kyenga kya ikumi kya efa ya nswa mmamiri kive kiraso kya nswa kyeeri kyoose, kyenga ngama, kyenga kyingi nkwaany.

²¹ Udeesyo kikaangony ando amwi na mafura, ukammevira-vira kuwaate mmba; kusheserisa kiraso ekyo kya nswa fibwarwe fikee fikaange, uve nrungo nsha kwa Nndumi Iruva.

²² Na nkohani yeto akemwaambe mafura ando akwe na vana vakwe mmbo asheiserisyaau; imamitwa kwa Nndumi Iruva deny lyive ivavaso lya llung'anu.

²³ Lyingi wo kiraso kya nswa kya nkohani mmbo kimamitwaa na muro deny, kilalyiwa-fo.’”

Firaso fya Yuuta Ulyamari

²⁴ Nndumi Iruva karera na Mose kammbia.

²⁵ Enderera na Aron na vasero vakwe, kuvavie, Ivavaso elyo lya kiraso ekyo kya ulyamari llyo elyi, yoo kiraso ekyo kyeemamitwa kisheshishyoo ng'u na kiraso kya ulyamari kisheshishyoo, yoo mbee ya Nndumi Iruva, kikee kyeele deny.

²⁶ Nkuhani yeto asheiserisyaau mmbwe yeto asheilyaa; ilyiiyo ando yoo kweele, efo kari ka yeema lyeekwaanannya.

²⁷ Wo kindo ekyo kibaanaa nyama yeyo ya kiraso ekyo mmbo kivaa kyeele, na kwakooya samu ya vayo yapusukya soori shoose, soori yeyo mmbo isangywaa, yoo ando eele.

²⁸ Llyo kiiya ekyo kya uteeri kilekoryo nyama yeyo mmbo kifishwaa, na kwakooya yakoryo kiiyeny kya minya, mmbo kisingwaa kiile neesangyo na mura.

²⁹ Wo nndu ndumi wa efo kwa vakohani mmbo ashelyaa nyama yeyo, mmbo ikee sheele.

³⁰ Llyo kiraso kya ulyamari nkishelyiwaa-fo ekyo samu ya vayo ileenda neefo yeemeny yeele, naambo ivike usandi yoo ando kweele; mmbo ikorwaa na muro.