Valevi 4 - BIBILLYA Mareiyo Meele a Iruva

Firaso fya Itereva Ifwaayo

¹ Nndumi Iruva karera na Mose, kammbia,

² Kyasia rera na vana va Israeli kuvavie, “Kwakoyaa nndu moose atana ulyamari nalakusarye, kya kindo kyoose Iruva alevavasa kilatanwa, nawe kaimbwaa kindo kya ngata yeyo;

³ kwakooya nkohani akeemwaambe mafura atana ulyamari kutani eengye vandu urekwa; mmbo asheniingyaa kimaruma kya ulyamari lwakwe alelutana, neeserisya Nndumi Iruva ng'umbe ya shau shikoo ilatiri teve, kive ni kiraso kimaruma kya ulyamari.”

⁴ Nawe mmbo asheendee ng'umbe yeyo na yoo mwaangony wa yeema yoo mbee ya Nndumi Iruva nawe nashevika woko lwakwe yoo nrony wa ng'umbe yeyo, na yiishisha mbee ya Nndumi Iruva.

⁵ Numaany nkohani yeto akee mwaambe mafura naiboo-u samu ya ng'umbe yeyo neeyaata neefo yeemeny yeele;

⁶ numa nkohani naolote nni wakwe efo samuny neeshoshotya samu mbee ya Nndumi Iruva kamfungare, yoo yeema yeele lyikeeirumbwe kavii.

⁷ Numa ya vayo nkohani napusuye samu ndumba toose ta kitara kyeerasya ekyo kyeefumirya nrungo mbee ya Nndumi Iruva, yoo yeemeny yeele; numa ya vayo samu shoose ya ng'umbe yeyo nasheipusuya yoo si ya kitara kyeevika firaso fyeekora na muro, yoo mwaangony wa yeema elyo.

⁸ Numa ya vayo mafura moose yoo a ng'umbe yeyo ya kiraso kya ulyamari mmbo ashuuta-u, yoo asikye maala, na mangau moose,

⁹ na syo ta vayo ivii, na mangau yoo akwaambye-fo, akee kufii na kisi, ando amwi na syo yeto, yefyo fyoose nafyuute-fo,

¹⁰ indo-da shaasa ootwaa-fo kwa ng'umbe ya kiraso kya ufoo, naasa numa ya vayo nkohani nafirumate yoo uwe ya kitara ekyo kyeekorya firaso.

¹¹ Numa shonyi yeyo ya ng'umbe, na nyama ta vayo toose, ando amwi na nrwe wa vayo, ando amwi na marende a vayo, na maala a vayo, na mura wa vayo,

¹² mashika lyo ng'umbe yeyo mmbo asheisomutaa kiboo ya ulale fika ando esha, yoo ifu lyiingyoo, nasheikorya-u na muro wa ngwi; yoo ifu lyipusuyoo ng'u ashekoryaa na muro.

¹³ Na kwakooya ironda lyoose lya Israeli lyatana ulyamari lulakusarye, na kindo ekyo kilalollyo paa misony awo, kyeendi lyo mmbo valeimbwau kya efyo Nndumi Iruva alevavasa sheelyi valatani, nakyo kikavatefusany,

¹⁴ kyeeri ulyamari yelo valelutana lushemanyikaa, llyo ironda elyo lyishentaa shau shikoo ive kiraso kya yuutwa ulyamari neyeende yoo mbee ya yeema yeele.

¹⁵ Naasany vamiku va ironda elyo vaekere maako awo yoo nrony wa ng'umbe yeyo usanguny lwa Nndumi Iruva,

¹⁶ numa ng'umbe yeyo ishishwa mbee yaa Nndumi Iruva. Naasany nkohani akeemwaambe mafura neepo samu maata ya ng'umbe yeyo nayeende neefo yeemeny yeele;

¹⁷ numa nkohani noolote nni wakwe efo samuny neeishoshota ka mfungare usanguny lwa Nndumi Iruva, mbee ya yoo kukee kwaave.

¹⁸ Na samu ingi naivike efo ndumbeny iinya ta kitara kyeerasya kikee mbee ya Nndumi Iruva, ekyo kikee yeemeny yeele, numa samu shoose naipusuye yoo si ya kitara kyeele ekyo kya firaso fyeekora, kikee yoo mwaangony wa yeema yeele.

¹⁹ Numa naipoo mafura a vayo moose naakorye yoo uwe ya kitara kyeerasya.

²⁰ Niindo ashetanaa kya ng'umbe yeyo, shaasa aletana kya ng'umbe ilya ya kiraso kya ulyamari, natane indo kya yei; nawe nkohani ashevavikyaa usandi nawo vasaryo.

²¹ Numa nasomute ng'umbe yeyo kipoo ya ulale, na yiikora na muro indo-da shaasa alekora ng'umbe ilya ya mbee; nkyo kiraso kya yuutwa ulyamari lwa vandu.

²² Elyi nshilyi antana ulyamari, katana kindo nalakusarye kya efyo Nndumi Iruva, wafo alevavasya filatanwa, nawe kawonisa uvingo;

²³ kamaa yoorwa ulyamari lwakwe atannyi, mmbo ashendee mburu ive kiraso kyakwe, mburu shisha ya kyuumi;

²⁴ naasa navike woko lwakwe yoo nrony wa mburu, neeishishya yoo vashishyaa firaso efyo fyeerumata na muro, mbee ya Nndumi Iruva; nkiraso kya ulyamari.

²⁵ Naasany nkohani naipoo samu ya kiraso ekyo kya ulyamari, nashoshotye efo mbai ya kitara kya firaso fyeekora na muro, na samu yeyo ingi naipusuye yoo kwasi ya kitara ekyo kyeekora firaso.

²⁶ Na mafura a vayo moose mmbo asheakoryaa yoo kitareny ekyo shaasa llya alekora mafura alya a firaso filya fya yeende ufoo; nawe nkohani nammbikye usandi kimaruma kya ulyamari lwakwe, nawe nasarywa.

²⁷ Na kwakooya nndu moose wa kunu urukeny atana ulyamari nalakusarye, kyayiimbwa kindo kyoose kya efyo Nndumi Iruva alevavasa filatanwa; nawe kaona utefusu;

²⁸ kwakooya amanyisyo ulyamari lwakwe alelutana, llyo ashendee mburu ya savana shisha, ive kiraso kya ulyamari lwakwe alelutana.

²⁹ Nawe mmbo ashevikaa woko lwakwe yoo nrony wa kiraso ekyo kya ulyamari, na ishishya kiraso ekyo yoo ando eekorya firaso.

³⁰ Naasa nkohani mmbo ashiipoo samu ya vayo na nni wakwe, neivika efo mbai ya kitara kyeerasya, na samu ya vayo shoose mmbo asheiletyaa yoo kwasi ya kitara kyeerasya.

³¹ Numa noote-fo mafura moose indo shaasa aleuta-fo mafura a firaso filya fya yeende ufoo, naasa nkohani naarumatye yoo kitareny kyeerasya, uve nrungo nsha usennyi Nndumi Iruva; na nkohani mmbo ashevikaa usandi kimaruma kya vayo, nawe mmbo asarywa.

³² Nawe kameende ngurana ikee kiraso kya ulyamari, mmbo ashendee ilatiri teve,

³³ Nawe navike woko lwakwe yoo nrony wa kiraso kya ulyamari, naasa naishishe ive kiraso kya ulyamari, yoo firaso fyeekora na muro fishishywaa.

³⁴ Naasany nkohani naipoo samu ya kiraso ekyo kyeekora na muro na nni wake a aivike efo mbai ya kitara kyeerasya, numa samu shoose naipusuye efo mbai ya kitara ekyo kyeerasya;

³⁵ numa nootefo mafura a vayo moose, shaasa mafura alya a ngurana aleutwa-fo alya kirasony kya ufoo;numa nkohani naakorye yoo kitareny, shaasa firaso fya Nndumi Iruva fitanyoo eto teenserisya na muro; na nkohani mmbo ashembikyaa usandi kimaruma kya ulyamari elo alelutana, nawe mmbo ashesarwa.