Valevi 27 - BIBILLYA Mareiyo Meele a Iruva

Uramba lwa Iinutya Kyaasa

¹ Naasa Nndumi Iruva karera na Mose kammbia,

² “Rera na vana va Israeli kuvavie, kyeeri nndu ashiinutyaa kyaasa kyakwe, vandu yewo mmbo vashesalaa mbee ya Nndumi Iruva shaasa kusheworaa yewe.”

³ Na yeekyena lyafo nlya womi, kupookya wa myaaka makumi avii kufike wa makumi arindaru; yeekyena lyafo lyive lya fesa makumi araanu, fesa ya ando eele.

⁴ Kwakooa ni nndu nka yeekyena lyafo lyive fesa makumi araru.

⁵ Na kwakooya ni myaaka iraanu kufike makumi avii, yeekyena lyafo lyive fesa makumi avii kwa nndu nndumi na fesa ikumi kwa nndu nka.

⁶ Na lyingi yeto wa mwiiri umwi fika myaaka iraanu, yeekyena lyive fesa isaanu kwa yeto wa kyuumi, na fesa isaru kwa yeto wa kika.

⁷ Kaamba mmwasi ya makumi arindaru, yeekyena ni fesa ikumi.

⁸ Kwakooya ni vakiduva wo veendwa kwa nkohani, nawe nambikye kyeeso kidu, kiinani na kyaasa kyakwe, niindo nkohani ashemweesyaa.

⁹ Na kwakooya ni kindo kyeevikya yekyo vandu vautaa kive kiraso kyeekora, wo kindo ekyo kisheutyoo Nndumi Iruva ni nndu moose mmbo kivaa kyeele.

¹⁰ We nalaalashwafo, yeto nsha neeto nkasha, ao nsha na nkasha-fo, llyo kindo kyeevikya na kindo, yee, lyo fyoose five fyeele.

¹¹ Na kwankooya nkindo kilakee kyeele, na kilautwaa kwa Nndumi Iruva, naasa kindo ekyo kyeendwa kwa nkohani;

¹² na nkohani namweesye wuuru, kyikava kisha ao kikasha, kyeeso ekyo nkohani ashambaa niindo kivaa.

¹³ Lyo kwakooya nndu akundye ikiviira naasa neengerye-u kyenga kya karaanu kya vayo.

¹⁴ Na kwakooya nndu aniingya mmba ive kiraso kyakwe kwa Nndumi Iruva, llyo nkohani ashevikaa kyeeso kya wuuru lwa vayo, ikava shisha ao shikasha, niindo kivaa.

¹⁵ Na nndu yeto aniingya mmba yakwe kwa Nndumi Iruva kwakooya akunda yiivira, neengera-u kyenga kya karaanu kya wuuru lwa vayo, llyo iveny yakwe.

¹⁶ Na kwakooya nndu aniingya Nndumi Iruva irema lyakwe, llyo yeekyena lya vayo lyishevaa sha lya findo filya firemwaau, kibaba kimwi kya nganu kyeekennyo fesa makumi araanu.

¹⁷ Kwakooya aniingya Nndumi Iruva nrema yakwe kupookya mwaaka wa yubile, lyikae indo shaasa yeekyena lya vayo lyikai.

¹⁸ Lyo kaniingya nrema yakwe yubile yimiira, llyo nkohani ashemweekennya fesa ya vayo kiinani na myaaka isaayeu kufikye mwaaka wa yubile, yeekyena lya vayo lyiveangwaa-u.

¹⁹ Na yeto aleniingya Nndumi Iruva nrema yakwe kwakooya akundye yiivira, llyo neengeryeu kyenga kya karaanu kya fesa ta vayo, kiirikyo indo.

²⁰ Lyo anra nalakunda ilyiviira, ao kwakooya akumbya nndu ungyi nrema yeyo, llyikivaa iviira-fo;

²¹ nrema yeyo mmbo ivaa sheele kwa Nndumi Iruva elyi yammira mwaaka wa yubile, kwankooya ni shiniingye kwa Nndumi Iruva deny, mmbo ivaa ya nkohani.

²² Na kwakooya aniingya Nndumi Iruva nrema aleyuura, lyikee lyakwe uka elyo;

²³ llyo nkohani ashemweekenyaa yeekyena lyakwe tana kwafika mwaaka wa yubile, na nkonu yeto asheniingya yeekyena lya vayo, kive nkindo kyeele kwa Nndumi Iruva.

²⁴ Mwaaka wa yubile nrema yeyo mmbo iwuiya muni yeto alelyikumba.

²⁵ Na yeekyena lyafo lyive lya fesa ya ando kweele, shaasa fyeeso fikai.

²⁶ Kindo kiwonikye kya mbee, mmbo kyikee kyeele kya Nndumi Iruva, kulave nndu akivika kyeele lyingi-fo; kwakooya nng'umbe ao mburu, ao suva, yekyo nkya Nndumi Iruva.

²⁷ Na kwakooya nkya kindo kitefusu, llyo ashekiviraa shaasa yeekyena lyakwe lyikai, neengerye-u kyenga kya karaanu kya wuuru lwa vayo, ao kikanra kilaviirwa, kikumbwa wuuru lwa vayo.

²⁸ Kindo kikee kivike kwa Nndumi Iruva kilakumbwa nta kilaaviirwafo, kwakooya ni nndu, ao kindo, ao irema, wo kindo kikee kyuute kwa Nndumi Iruva mmbo kikee kyeele deny kwa Nndumi Iruva.

²⁹ Naakwa nndu akee mwaate mashoreny a Nndumi nnyavirwaa-fo nkuti nawaawa.

³⁰ Kyenga kya ikumi kya fimu, mbeu ya uruka, ao ndunda mfya Nndumi Iruva, mmbo fikee fyeele.

³¹ Na kwakooya nndu akunda iviirau kindo kyengeny yekyo kya ikumi, mmbo asheengeryau kyenga kya karaanu kya vayo.

³² Na kyenga kya karaanu kya ng'umbe na moonri, findo fyoose fishiiswaa, kyenga kya karaanu kya ng'umbe na moonri, findo fyoose fishiiswaa, kyenga kya ikumi mfya Nndumi Iruva.

³³ Kilaveswa vai nkisha ao kikasha-fo, nta kilaala shwa-fo kwakooya kyaalashwa, naasany, fyoose fii fivii fivikwa fyeele; filaviirwa-fo.

³⁴ Yaa nng'u mavavasyo, Nndumi Iruva alevavasya Mose kimaruma kya vana va Israeli alya ifumbuny lya Sinai.