Valevi 26 - BIBILLYA Mareiyo Meele a Iruva

Mbora elyi Nndu Aindya Nndumi

¹ Mulasongosye ifwanu lya ngata shose, nta mulasaleese ifwanu lyeepasha, nta ngo shaasha, nta mulasaleese iwe lyeepasha urukeny lwany lyive lya yiindya, mashika yeny ni Nndumi Iruva, Iruva waany.

² Indyeny sabato takwa, muvetiiya ando akee kweele wiindi, yeny ni Nndumi Iruva.

³ Mukansora mavavaso akwa indo;

⁴ llyo nshemwengyee mmbwa fyeeri fya vayo, na uruka luwone shoonga ya vayo na miri ivike ndunda shiingyi.

⁵ Na yuulula fimu fya mbeu kutane kwafika kyeeri kya yuulula ndunda ta misabibu, na yuulula sabibu lyishefikya kya ivaaya mbeu, mulye shoonga yaany neewuura, neekaa na unabwe.

⁶ Neeny shimuni nge ufoo urukeny, mulale kulaifoo nndu ashemweeresee, neeny shimaafo mafisi manyaasi urukeny kwany, nta fira nnyishemusheyaafo.

⁷ Mmbo musheumbutaa vakiduva vany, vawaawa na usu.

⁸ Vandu vany varaanu nsi voombute vandu, iyana, na vandu vany woombute vandu fiku ikumi, na vakiduva vany vatuulwa noosu.

⁹ Neeny nshemuvikya miso akwa mufumbuke, neekarisa kyaasa kyakwa neeni.

¹⁰ Neeni mmbo mushelya filya mwensuruma kasha, neefyo fya kasha muutefo feseiye fiiya

¹¹ Neeny mmbo nshekaa neeni, nta nrima wakwa mbushesukyoo nnyeni-fo.

¹² Shikae neeni, shive Iruva waany, neeni muve vandu vakwa.

¹³ Yeny ni Nndumi Iruva, Iruva vaany, shilemweende shimuuta Misri, mulasheeva mashinga awo; neeny shafisha mise ilya yeemufingye, shamurwaa shieny ya usumanu.

Ngapo Elyi Nndu ara Iindya Nndumi

¹⁴ Lyo mwanra mulashaaranya nta ilatya mavavasyo yaa moose,

¹⁵ mukallema mavavasyo akwa, na mirima yaany ikusakyo mirumbuye yakwa, mukavefisha na kyaasa kyakwa;

¹⁶ neeny mmbo nshemutaiyaa kindo eki, nshivavasyaa fimuting'aa fimusheye, ndwari shuumu, miso any ature finya na mirima irovyo, kive kya ruu mashika mmbo fishelyiwa ni nkiduva waany,

¹⁷ Neeny shilole kwaasha na yoo mukai, mukabwa ni vakiduva vany, newo vamusuuye vamushillye murishe ing'ana kulaiyo nndu akeemuumbuta.

¹⁸ Naasa mukammengera ilema ishyaarannya, llyo nshemukapaa kamfungare kyeendo ni ulyamari lwany.

¹⁹ Neeny nshe nrovyo kya wiidimi lwany; neeny nsheumisa ngina yaany pony sha minya na sumbai ya vayo yuume sha minya ya arera,

²⁰ finya yaany ive ruu, ni elyi uruka lwany lulashendee shoonga, nta miri ya vayo nnyivikaa ndunda-fo.

²¹ Kwakooya mwakukikisa neeny mukara mulashaarannya, mmbo nshemwengyee ngapo ka-mfungare, shaasa ngyulyamari tany tifye.

²² Shimweengye mafisi amusoke vana vany, neemamita findo fyany fyeevikya, neemwaangura yeekyena lyany, na muu wany uve wa ukiva.

²³ Neeni kwakooya mulakundye ivikwa vaiya kya efyo fyoose, kyeendi mukaengera ikukikisa neeny tupu, llyo neeny nsheengeraa ikukyikyisa neeni;

²⁴ shimukape, yee, yeny sho, ka-mfungare kya ngyulyamari tany.

²⁵ Shivemweengye fira, kimutaiye elyi mwafisha kyaasa, mushekuumbya efo miriny yaany, sheende nafo ndwari shuumu, muvevikwa maakony a vakiduva vany.

²⁶ Kyeeri nshemusokaa shoonga yeyo mwiivikye nsia, vaka ikumi vashekoryaa mikate irikony lyimwi, numa vamweesye na fyeeso, ilya mulye, lyo mulawuura nta-fo.

²⁷ Numa yeefyo mukanra mulashaaranya mweengera ikukikisa neeny;

²⁸ llyo neeny nshemooraa unyafi lwakwa, shimukape kamfungare kya makasha any.

²⁹ Neeni mmbo mushelyaa vana vany nyama.

³⁰ Neeny nshelyamara ando any, a miindye, na mafwanu any a nkyeere shiwunduye si, na minying'a yaany shiituule uwe ya minying'a ya mafwanu yoo, na ngoo yakwa imuswe deny.

³¹ Na miri yaany nsheyallwaa irama na ando kwany kweele shaalwe ukiva, nta nshisenywaa ni nrungo wa firaso fyany-fo.

³² Na uruka elo lusherewaa ruu, na vakiduva vany yewo vasheikaa mmbo vashefulukyoo kya vayo.

³³ Neeny shimurarate efo masangeny na usu lumulatye yoo numa yaany, uruka lwany luve lwa ukiva,

³⁴ neeni elyi mushekaa efo ngyurukeny ta vandu vengyi, llyo uruka lushetiraa ufoo, neefura na sabato tawo.

³⁵ Kyeeri kya ukiva llyo kivaa sha kiimuyo, ekyo nkeifo kyeeri kya sabato fo, kyeeri mwekee urukeny lwany.

³⁶ Neewo maata vashesaau, mmbo nsheveengye weerei nrimeny, veekumbwaa vakiduva vawo, na naakwa ni imburu lyivivitwaa ni uraato lyisheveeresee, varishe, sha nndu akeerisha usu, vawe si ruu kulaiyo mwiivaarishisa.

³⁷ Vashekuwoyaa wo veni na veni, sheelyi vakee fireny, nta kulaiyo nndu akeevarishisa, nta mmushetiraa finya yeesalala na vakiduva vany-fo.

³⁸ Neeni mushearumyaa mbee ya vandu va masanga engi, ina uruka lwa vakiduva vany lushemumira.

³⁹ Na vandu va uruka lwany mmbo vashefirikaa kyeendwa ni uravi lwany, efo urukeny lwa vakiduva, vavefirika kyeendwa ni uravi lwa ndeye vawo,

⁴⁰ nawo vashelolyaa uravi lwawo na lwa vandeye vawo valwiirikye, vavemanya nkimaruma kya elyi valeshikukikisya,

⁴¹ neeny sheengera ivakukikisya, shavavika maakony a vakiduva vawo, kyeendiny, yoo ng'u kwakooya ulaalu mirima yaawo ikunyisa, na yiirikya kya ngapo yeyo ya uravi lwawo;

⁴² llyo nshekumbwaa kyaasa shilevikya Yakobo, na Isaki na Abrahamu, shivekumbwa na uruka lwawo.

⁴³ Na uruka nalo mmbo lusherewaa nalo lushefura na sabato tawo; vavelollya uravi lwawo; yee mashika llya valelema mavavasyo akwa, na mirima yaawo ikasua.

⁴⁴ Ando amwi neefyo fyoose, elyi vashekaa urukeny lwa vakiduva vawo, nshisheveraa sakyeny-fo, nta nshishevasuaa shivarumate deny-fo, nta ifisha kyaasa kyakwa-fo, mashika yeny ni Nndumi Iruva, Iruva waawo;

⁴⁵ nkimaruma kyawo nshekumbwaa kyaasa kyakwa na vande vawo valya shilevauta kulya urukeny lwa Misri, na vandu va masanga vakalollya, naambo shive Iruva waawo; yeny ni Nndumi Iruva.

⁴⁶ Yaa nng'u mavavaso na mirumbuye Nndumi Iruva alevikya vana va Israeli, alya Sinai, ifumbuny, eevavasyaa Mose.