Valevi 24 - BIBILLYA Mareiyo Meele a Iruva

Ngata ya Ideesya Taa

¹ Naasa Nndumi Iruva karera na Mose, kammbia,

² Vavasya vana va Israeli vakweengye mafura a misenefu, mesha asongosye ave a taa, naambo yaake kyeeri kyoose.

³ Yoo poo ya kyiri eko kya ureeki, neefo mmba ya yeema elyo. Aron ayaate uka ngama fika nkwaany ni ivavasyo lya llung'anu marika any moose.

⁴ Nasongosye taa yeto nativike yoo ngony ta vayo, mbee ya Nndumi Iruva.

Nkate Waniinngywa Iruva

⁵ Ipoo nswa mmamiri, kukore mikate ikumi na ivii, fyengaa fivii fya ikumi fya kipapa,

⁶ vika ngyuramba ivii, mikate irindaru uramba lumwi, yoo uwe ya mesa ya Nndumi Iruva.

⁷ Wo uramba kuvikeu ubani luve kindo kyeekumbwa kya mikate yeyo, kive kiraso kya Nndumi Iruva kyeekora na muro.

⁸ Wo nkonu wa Sabato nkuti naale-u mikate yeyo ya Nndumi Iruva, nkimaruma kya vana va Israeli ya kyaasa kya llung'anu.

⁹ Nayo mmbo ivaa ya Aron na vasero vakwe; nawo vailyiiye yoo ando eele, ni elyi ikee myeele nnu ya firaso efyo fyeserisyo Nndumi Iruva na muro, lyive ivavaso lya llung'anu.

Kyaaso kya Ngapo Ilatiri Kidengo Nta Ikunndya

¹⁰ Naasa mwana wa nka mwiisraeli, maye va Kisraeli, avaangwa shelemethi ndeeye Mmisri, mwana yeto kakapana na Mwiisraeli umwi, yoo ulaleny,

¹¹ naasa mwana yeto wa nka mwiisraeli kaarara irina elyo, neelya mboo; nawo vakamweende kwa Mose. Nka yeto mmbo evangwaa shelomiti mfu wa Dibiri wa ufyari lwa Dani.

¹² Vakanraya mmba, naambo vavereye shaasa Nndumi Iruva ashambaa kyakwe.

¹³ Nndumi Iruva karera na Mose kammbia,

¹⁴ Somuta nndu yeto amina na poo ya ulale, na valya woose valeita ekyo alerera vaekere maako awo yoo nrony wakwe, naasa ironda lyoose lyimbwae na mawe.

¹⁵ Neewe rera na vana va Israeli kuvavie, nndu yeto asheararaa Iruva wakwe mmbo akurikaa ulyamari lwakwe muni.

¹⁶ Na yeto ashedengaa irina lya Nndumi Iruva nkuti nawaawa, ironda lyoose mmbo lyinkapaa na mawe, kava muny, ao muni poo, elyi aarara irina lya Nndumi Iruva nawaawa.

¹⁷ Na nndu akapa ungyi kutane afwa, nkuti da nawaawa,

¹⁸ na nndu akapa kindo kikafwa natae, kindo na kindo.

¹⁹ Na kwakooya nndu avika ungyi ivina, indo shaasa aletana nawe natannyo indo;

²⁰ kishavere kitawa nkishavere, iriso neeriso, iyoo neeyoo, indo shaasa aletannya yeto ungi nawe natanyo indo.

²¹ Na nndu kawaa kindo nkuti natae neeto awaa nndu e mmbo ashewaawa nawe.

²² Ivavaso mutiraa llyimwi nsi, kwa yeto akee muny, neeto muni kyeny, mashika yeny ni Nndumi Iruva, Iruva waany.

²³ Mose karera na vana va Israeli nawo vakasomuta yeto alelyisa mboo yoo poo ya ulale, vakankapa na mawe vakambwaa. Vana va Israeli vakatana shaasa Nndumi Iruva alevavasya Mose.