Valevi 22 - BIBILLYA Mareiyo Meele a Iruva

Weele lwa Firaso

¹ Naasa Nndumi Iruva, karera na Mose, kammbia,

² Rera na Aron na vasero vakwe, naambo vakee kwaasha na findo fyeele fya vana va Israeli efyo valeshiilyisia yeny, nta valatefuse irina lyakwa yeele; yeny ni Nndumi Iruva.

³ Varie, Nndu moose wa irina lyany na fyeeri fyakwe yeto asheshaa kufii na findo efyo fyeele, efyo vana va Israeli valevikya Nndumi Iruva, nawe ekee ntefusu, nndu yeto mmbo asheumbutyoo kwaasha nare nalashe mbee yakwa; Yeny ni Nndumi Iruva.

⁴ Nndu moose wa mmba ya Aron atirwa niivave, ao ashuukwaa ni usa, we nalalye findo fyeele-fo, kutani yoo asheeremukaa. Na nndu yeto ashepaanaa kindo kitefuusu kimaruma kya nndu mfu, ao nndu ashukwaa usa,

⁵ ao nndu kapaana kindo kyikurufwaa si, ekyo kyitefusaa nndu.

⁶ Nndu yeto apaana indo kya ngata yeyo kuti nave ntefusu fika nkwaany, nawe nalalye findo fitefusu-fo, kulaore ankusangya.

⁷ Kukammiila llyo, needime ilya findo fyeele, mashika mfyo shoonga yakwe.

⁸ Nyama yafwa, ao kindo kyaratuwa niifisi, nalalye-fo, naambo nalasheekutefusa, yeny ni Nndumi Iruva.

⁹ Niindony, naaranyi uvavaso lwakwa, naambo valasheepoo-fo ulyamari, vafiiye-fo, vafitefuse, yeny ni Nndumi Iruva mwivailyisa.

¹⁰ Nndu nalakee wa mmba ya nkohani nalaniingwa shoonga eto sheele-fo, nta muny wa nkohani.

¹¹ Lyo nkohani kanra nndu na fesa, we nalye findo efyo, neewo valewonikya kwakwe, wo valye findo efyo.

¹² N mfu wa nkohani ariwa ni nndu muny nalalyeu yoo firasony fyeele-fo.

¹³ Kyeendi kwankooya mfu wa nkohani ni nka wa ding'u, ao akee nre ni mmi, nalatiri mwana kawuya ishekaa kwa ndeye sheelyo mbee, we ashidimaa ilya shoonga ya ndeye, sheelyo mbee, lyo muny nalalye-fo.

¹⁴ Lyo kwakooya nndu alya shoonga sheele nalakusarye, lyo asheengeryaa kyenga kya karaanu uwe ya vayo, narambikye nkohani kindo ekyo kyeele.

¹⁵ Nta valatefuse findo fyeele fya vana va Israeli-fo, efyo veserisya Nndumi Iruva-fo;

¹⁶ indo vashemwaamba uravi yelo lweende urekwa, mashika elyi valya findo fyeele;mashika ni yeny Nndumi Iruva mumwiilyisa.

¹⁷ Naasa Nndumi Iruva karera na Mose kammbia,

¹⁸ rera na Aron na vasero vakwe, ando amwi na vana va Israeli woose, kuvavie, Nndu moose wa mmba ya Israeli ao muny akee kunu Israeli, aniingya kiraso kyakwe, kwakooya ni kyaasa kyakwe, ao kiraso kyakwe kya pya, efyo vakundye yuutya Nndumi Iruva, five firaso fyeekora na muro;

¹⁹ naambo mukooye yiirikyo mmbwe, mmbo musheende kindo kisha kya kyuumi muuta efo ng'umbeny, ao suva, ao mburu.

²⁰ Kindo kyoose kifirikye kilautwa-fo, mashika nkishiirikyo-fo.

²¹ Na nndu moose yeto asheutyaa Nndumi Iruva kiraso kya ufoo, naambo nainutye kyaasa, ao kiraso kya nrima, efo ng'umbeny ao moonriny noote kindo kisha, nawoni iwarywa, kulakaefo kindo kitefusu-fo.

²² Kindo kifiiye miso ao kifiri, ao amfikya ifwa, atiri usa, kilwee fishevere, mulaniingye Nndumi Iruva-fo, nta mulaserisye Nndumi Iruva na muro efo kitareny kyeerasya-fo.

²³ Ng'umbe ao mburu itiri kilungo kifiri, nkutiri muumu weeningya kive kiraso kya yuuta kyaasa kya nriminy-fo.

²⁴ Kindo ekyo kikee kyikabe ao kiwondore ao imanywa, kilautwa kwa Nndumi Iruva-fo,

²⁵ nta mulaserisye Nndumi Iruva findo fya ngata-fo, ao kindo kyooka kwa muny-fo, mashika uravi lwawo mmbo luvakaye, mmbo vakee vafiri, mmbashiirikyo kyeendo ni yeni-fo

²⁶ Naasa Nndumi Iruva karera na Mose, kammbia,

²⁷ Ng'umbe ao yoonri, ao mburu yafewa, mmbo ikaa na maye mikonu mfungare, na nkonu wa nyanya iworya ive kiraso kyaniingyo kwa Nndumi Iruva na shia ya muro.

²⁸ Na kwankooya n ng'umbe, ao yoonri, shisha fyoose fii fivii ekyo kyafyaa na mwana wa vayo.

²⁹ Na kyeeri ekyo musheshishyaa Nndumi Iruva kiraso kya kyaanu, shisheya naambo muwaryo,

³⁰ ilyiwa nkonu yeto mweni, mulasaare kindo kufike ngama-fo, yeny ni Nndumi Iruva.

³¹ Naasa tireny mavavasyo akwa, mutane indo, yeny ni Nndumi Iruva.

³² Nta mulatefuse irina lyakwa yeele-fo; lyo yeny mmbo ashevikwaa mweele ni vana va Israeli, ni yeny Nndumi Iruva mwiivalyisa,

³³ shilemuuta kulya Misri, naambo shive Iruva waany, yeny ni Nndumi Iruva.