Valevi 21 - BIBILLYA Mareiyo Meele a Iruva

Weele lwa Nkohani

¹ Naasa Nndumi Iruva kavia Mose, “Rera na vakohani, wo vana va Aron, kuvavie, Nndu nalakutefuse muni kimaruma kya ipaana nndu mfu,

² lyo nave nndu wakwe wa kufii, sha maye ao ndeye, na mwanaakwe, ao mfu wakwe ao mwanamaye,

³ ao mfwamaye, nalandeorwa.

⁴ Nalakutefuse naakwa ava nsongoru wa vandu vakwe.

⁵ Valavike nrwe iwoya nta valaute nguyo ngata-fo, nta valarashe miili yaawo-fo.

⁶ Nkuti vave veele kwa Iruva waawo, nta valatefuse irina lya Iruva, mashika mmbo vaserisaa firaso fya Nndumi Iruva na muro, shoonga ya Iruva waawo, na kimaruma kya vayo vave veele.

⁷ Valarwaa nka isonga, ao akee ntefusu, nta valarwaa nka akeenre ni mmi, mashika we nkohani ni mweele kwa Iruva vakwe.

⁸ Naasa kumwiilyise, mashika mbwe mwiserisya-u shoonga ya Iruva wafo, mmbo avaa mweele kwafo yewe, mashika ni yeny Nndumi Iruva shamwiilyisa yeni shikee mweele.”

⁹ Kwakooya mwana wa kyeny wa nkohani akutefusa kya usonga, mmbo atefusa ndeye, mmbo akorwaa na muro.

¹⁰ Neeto akee nkohani nniini kwa vanavamaye, akee mwambe mafura naambo araa masara yoo meele, nnyaraa fii takwe mwaala-fo, nta iraa masara a firami-fo mashika mmwaambe mafura;

¹¹ nalaange ando nndu mfu akai-fo, nta nalakutefuse kimaruma kya ndeye ao kya maye-fo;

¹² nta nalooke ando yoo kweele-fo, naambo nalatefuse ando yoo kweele a Iruva wakwe, mafura yoo a yiilyiswa lyakwe mmbo akee nawe, Yeny ni Nndumi Iruva.

¹³ Nawe mmbo ashoora mwana wa kyeny.

¹⁴ Nalaore nka wa ding'u-fo ao nka arewa ni mmi-fo, ao nka ntefusu, nta nka wa shia-fo, lyo noore mwana wa kyeny efo vanduny vakwe.

¹⁵ Nawe nalatefuse irika lya vandu vakwe, mashika ni yeny Nndumi Iruva shikemwilyisa.

¹⁶ Naasa Nndumi Iruva karera na Mose kammbia,

¹⁷ “Rera na Aron kummbie Nndu moose wa mmba yafo, efo kwawo, afikkye kyuungo kya mwiili wakwe nalasembeye-u-fo,

¹⁸ mfu miso, ao mbwa irumbukye,

¹⁹ ao nndu afirikye urende ao woko,

²⁰ ao akapye sombe, ao ngongo alwee iriso, ao atiri woye, ao nkape ndafu,

²¹ nndu moose wa mmba ya Aron afirikye nalasheserisa firaso fya Nndumi Iruva wafo, na muro-fo yeto atiri ufiri nasembeye iserisya-u shoonga ya Iruva-fo.

²² Mmbo alyaa shoonga ya Iruva wakwa kyuuka yoo kindony ekyo kikee kyeele nnu.

²³ Lyo nalaange kari-fo, nta nalasembeye yoo kitareny kyeerasya-fo, mashika elyi akee mfiri naambo nalatefuse ando akwa kweele; mashika yeny ni Nndumi Iruva yeu mwiivailyisa.

²⁴ Naasa Mose karera na Aron na vasero vakwe, na vana va Israeli woose.”