Valevi 19 - BIBILLYA Mareiyo Meele a Iruva

Weele na Usumanu

¹ Nndumi Iruva karera na Mose, kammbia,

² Rera na vandu woose va vana va Israeli, kuvavie indi, “Veny veele, mashika yeny Nndumi Iruva, Iruva waany, mmbo shikee mweele.

³ Wo nndu naindye maye, na ndeye, muringe mikonu ya sabato, yeny ni Nndumi Iruva, Iruva wafo.

⁴ Mulaindukye mafwanu, na mulaindukye mafwanu, mapashe nta mulasongosye maruva engi, yeny n Nndumi Iruva, Iruva waany.

⁵ Yeni kyeeri musheshishyaa Nndumi Iruva kiraso kya ufoo munserisye naambo mwiirikyo.

⁶ Ilyiwa nkonu yeto mweni mwaishisha, neelyi lya ndesi, na kwakooya kyasaau kindo fika nkonu wa kararu mmbo kikorwaa na muro.

⁷ Nkonu wa kararu kikalyiwau nta kindo ni uravi, nkivaafo.

⁸ Lyo nndu yeto ashelyaau mmbo akurikaa uravi lwakwe muni, mashika mmbo atefusa ekyo kyeekee kyeele kya Nndumi Iruva; nawe navikwa kwaasha na vandu vengi.

⁹ “Neelyi mushiilula fimu fya uruka lwany, kulailule kumaafo neefo mbai-fo, nta efyo fisaa-saafo kulavivefo fyoose-fo;

¹⁰ nta misaaro ya misabibu yafo kulaisanyirye-fo, nta ndunda ta misabibu yeto tileangarya si kulatisanyirye-fo, reny-fo kimaruma kya vakiva na veny, yeny ni Nndumi Iruva, Iruva waany.

¹¹ Mulaiye, nta mulalembe-fo, nta mulaviane wongo fo.

¹² Mulye mboo ya wongo na irina lyakwa kureveesa irina lya Iruva wafo. Yeny ni Nndumi Iruva.

¹³ Kulalamye uroo neensoka masaa akwefo, weesi lwa yeto akeerunda lulalale kwafo.

¹⁴ Kuladenge nndu mfu maarwi-fo, nta kulavikye nndu mfu miso nreiyo-fo, lyo indya Iruva wafo, yeny ni Nndumi Iruva.

¹⁵ “Mulatane filasumani mwaanduny-fo, kulakundye nndu nkiva, nta yiiryaa yeto atiri finya; rumbuya woose kikee kya usumanu.

¹⁶ Kularuerue efo neefo kwiivikyaa vengi ureree, nta kulariingye nndu nandewaawa, yeny ni Nndumi Iruva.

¹⁷ Kulasue nndu ungi kirika, nkuti kukyeemye mwanamau, na nta kulakurike ulyamari lwakwefo.

¹⁸ Kulatire kiduva nta ilyiiya vana va vana vafiyoo, lyo mmbo kushekunda vengyi shaasa kukundye kumuni; yeny ni Nndumi Iruva.

¹⁹ Ringeny mavavaso akwa. Kulare findo fyeevikya fifwarike nnu-fo; kulavaaye mbeu ta ngata ivii iremeny lyafo-fo, nta kularaa soori ya fitambaa fivii-fo.

²⁰ Na nndu moose yeto alalaa na kishinga, nakyo kitiri tindi, nta nalawouwe, nta nalalekwa, nkuti naorotwa, nnyawaawa-fo.

²¹ Na nndu yeto mmbo ashendee kiraso kyakwe kya urekwa kwa Nndumi Iruva, yoo mwaangony wa yeema lyeekwaanannya, suva ive kiraso kya urekwa.

²² “Na nkohani yeto mmbo avikaa usandi kimaruma kyakwe na suva yeyo ive kiraso kya urekwa kwa Nndumi Iruva, nawe llyo ashesarywa ulyamari yelo alelutana.

²³ Neeni kyeeri mushefikaa urukeny elo neeni mwammeevaya miri ya ngata shiingi ya shoonga, llyo mushaamba ndunda ta vayo nkimwi ira kularinwa ando a myaaka iraru, ndunda ta vayo tire tilalyiwa.

²⁴ Kyeendi mwaaka wa kaana ndunda ta vayo mmbo tivaa sheele, tiniingyo Nndumi Iruva ta kyaanu.

²⁵ Mwaaka wa kararu llyo mulyaa ndunda ta vayo musennywa. Yeny ni Nndumi Iruva.

²⁶ Mulalye kindo musande na samu-fo, nta mulakape kilwaa, nta yaawuyafo.

²⁷ Muloote mirwe kiringitya kyeeseta nta nguyo tany-fo.

²⁸ Mularashe sare elyi nndu afwa-fo, nta mulareiye miili yaany, yeny ni Nndumi Iruva.

²⁹ Kulasute mwana wafo wa kika numa nasheva isonga, na uruka lusora ngaa yeyo, na uruka lwiishwe uravi uniini.

³⁰ “Ringeny sabato takwa, indyeny ando akwa kweele, Yeny ni Nndumi Iruva.

³¹ Mulasore vasavi-fo, nta mulavaruuye-fo, mmbo vamutefusaa, yeny ni Nndumi Iruva.

³² Seiyeny nndu atiri myaasa, indeny nndu nkuu, kuveindya na Iruva wafo, yeny ni Nndumi Iruva.

³³ Kwakooya muny akaa neewe urukeny lwafo, kulasheentannya kikasha.

³⁴ Muny akaa kwany nave sha nndu awonikyeu, nkunde shaasa kukukandye, kimba neeni mwekee veny kulya Misri, yeny ni Nndumi Iruva, Iruva waany.

³⁵ Mulatane kindo kilakee kya usumanu mwiirumbwaa myaandu, nta mwiisheesaa, waasha lwa kindo nta meseny ya yeesa findo,

³⁶ Fyeeso fya usumanu, kipapa kya usumanu, fyeeso fya usumanu, mfyo mutiraa. Yeny ni Nndumi Iruva, Iruva waany, shilemuuta kulya Misri.

³⁷ Tireny mavavasyo akwa, na usumanu lwakwa, mutane indo. Yeny ni Nndumi Iruva.”