Valevi 18 - BIBILLYA Mareiyo Meele a Iruva

Lakaneny na Utuusi Yelu

¹ Nndumi Iruva karera na Mose kammbia,

² Rera na vandu va Israeli kuvavie, “Yeny ni Nndumi Iruva, Iruva waany,”

³ Mulatane shaasa llya mwekee kulya Misri-fo, nta sha kulya kanaani, efo nshemufitaa-fo nta mulasore mavavaso awo-fo.

⁴ Mmbo musoraa ufundo lwakwa, neelatya mavavaso akwa. Yeny ni Nndumi Iruva, Iruva waany.

⁵ Mutire mavavasyo akwa neesora ufundo lwakwa, llyo nndu asora nakae na muu; yeny ni Nndumi Iruva.

⁶ Kulave nndu wa kwany asukwa nndu wa kyika yeto akwaani nawe yeny ni Nndumi Iruva.

⁷ Sony ta ndoo nta sony ta mau kulasukwe, mashika yeto m mau, kulansukwe-fo.

⁸ Sony ta nka wa ndoo kulasukwe, mashika yeto n ndoo.

⁹ Sony ta mfwamau, akee wa ndoo, ao wa mau, kwakooya aleonikya kwany ao kundo kungi, kulavasukwe-fo.

¹⁰ Sony ta mwana wa nsero wafo ao ta mwana wa mfu afo, kulasukwe, yewo ni yewe kumuni.

¹¹ Sony ta nfu wa nka wa ndoo, kulasukwe, alewonwa ni ndoo, yeto ni mfwamau, kulansukwe-fo.

¹² Sony ta nfu wa kyekuo, ni mfwamau, kulansukwe.

¹³ Kulasukwe sony ta mfwamaye wa mau, mashika yeto mmbo akwaani na mau.

¹⁴ Kulasukwe mfwamaaye wa ndoo, nta nka wakwe, we ni mfwamaye wa ndoo.

¹⁵ Kulasukwe varasinda wafo, we ni nka wa mwanaafo,

¹⁶ Kulasukwe nka wa mwanamau, mashika yeto m mwanamau.

¹⁷ Kulasukwe nka wa mfu wakwe, kularwaa mwana a nsero wakwe, ao mwana wa mfu wakwe, yewo mmbo kukwaani nawo, ni uravi den.

¹⁸ Nta kulaore nka na mwanawo, mmbo kushaatarikaa, kulasheevasukwa, kyeeri yeto wa kavii akee na muu.

¹⁹ Nta kulalale na nndu nka kyeeri kya utefusu lwakwe.

²⁰ Kulalale na nka wa uroo, kukwaaruveu.

²¹ Neewe kulasherwaa ufyari lwafo kwa Vamoleki naambo kularevese irina lya Iruva wafo, yeny ni Nndumi Iruva.

²² Kulalale nndu nndumi kumwaallwe sha nka; nkindo kiravi.

²³ Nta kulalale na ifisi, ni ikureveesa, nta nndu nka nalatani indo-fo, ni ukirinda.

²⁴ Mulakureveese na findo fya ngata yeyo, mashika vandu yewo nshewoombutaa vamurishe niindo veetanaa,

²⁵ na uruka lwawo lukalyamarika, neeny shavataiya kya uravi lwawo, nawo vakarisha-fo.

²⁶ Kyasian ringeny mavavaso akwa na ufundo lwakwa, nta mulatani uravi sheelo, yeni ao veny,

²⁷ mashika vandu yewo valetana utefusu elo, mmbo yewo valemusongotya, vakareveesa uruka.

²⁸ Naambo mulasheerishiswa efo urukeny elo mwiieraveswa, shaasa shiletanya yewo vengi

²⁹ Mashika nndu yeto ashetanau kimwi kya efyo mmbo asherawaa kwaasha na vandu vakwe.

³⁰ Kimmba niindo waraneny na ufundo lwakwa, naambo mulashetanau efyo fitefusu, filemusongoya, naambo mulakutefuse; yeny ni Nndumi Iruva, Iruva waany.