Valevi 15 - BIBILLYA Mareiyo Meele a Iruva

Utefusu

¹ Naasa Nndumi Iruva karera na Mose na Aron, kavavia,

² Kyasia reren na vana va Israeli, muvavie, kyeeri nndu moose akooya eeshukwaa ni usa, mmbo avaa ntefusu kimaruma kya maashi yoo.

³ Na utefusu lwakwe kimaruma kya usa yelo, kwakooya mwiili wakwe ukeepusuka usa, ao kwakooya usa lukeesaa mwiiliny, lyo mmbo akee ntefusu,

⁴ Kitara ekyo akelaaya mmbo kikee kitefusu, na kindo ekyo akyillya mmbo kikee kitefusu.

⁵ Nndu yeto apaanaa kitara kya nndu yeto mmbo asangyaa soori takwe neesamba mwiili mureny, naveva ntefusu fika nkwaany.

⁶ Na nndu akaya kitara kyankaywa ni nndu akeyuukwa ni usa, nasangye soori takwe, neesamba, nave ntefsu fika nkwaany.

⁷ Na nndu kapaana mwiili wa nndu mwiukwa ni usa nkuti nasangye soori takwe, nasambe, nave ntefusu fika nkwaany.

⁸ Na kwakooya nndu mwiukwa ni usa afisha nndu nsha maare llyo nasangye soori takwe, nasambe, nave ntefusu fika nkwaany.

⁹ Na ando koose akaa nndu akeeyukwa ni usa ni ntefusu.

¹⁰ Na nndu moose yeto apaana kindo kyekee kwasi yakwe mmbo avaa ntefusu fikaa nkwaany, na nndu eepoo findo efyo mmbo asangyaa soori takwe, neekusangya mureny, nave ntefusu fika nkwaany.

¹¹ Na nndu moose apaanwaa ni nndu mwiukwa ni usa, kulore asangya maako akwe mureny, mmbo asangyaa soori takwe, neekusangya mureny, nave ntefusu fika nkwaany.

¹² Na kiiya kya uteeri apaana yeto mwiukwa ni usa, mmbo kifishwa-fishwa, na kiiya kya kiri kisangyo mureny,

¹³ Neeto akeeyuukwa ni usa kammaa yiilyiswa, mmbo asheekenaa mikonu mfungare ya yiilyiswa lyakwe, nasangye soori takwe, nendesamba mureny, nakooye yiilyiswa.

¹⁴ Na nkonu wa nyanya naonise mbeta ivii, ao mabore avii a mbuku, neende nato mbee ya Nndumi Iruva, yoo yeminy lyekwanannya, narambikye nkohani ndeye yeto;

¹⁵ na nkohani natiserisyeu, imwi ive kiraso kya ulyamari, na ya kavii ni kiraso kyekora na muro, nawe nkohani navike usandi kwa Nndumi Iruva kimaruma kya usa lwakwe.

¹⁶ Na kwakooya nndu ookwa ni usa lwakwe, llyo nakusangye mureny, nave ntefusu fika nkwaany,

¹⁷ Na soori ao shony yapaana usa, mmbo isangyoo na mura, iveva shitefusu fika nkwaany.

¹⁸ Na nndu nndumi kalala na nka kammamya woose vevavii nkuti vakusangye, mmbavaa vatefusu fika nkwaany.

¹⁹ Kwakooya nndu nka akee mikonuny yakwe, mmbo akaa ekee kwaasha ando a mikonu mfungare, na nndu moose ambaana mmbo ava ntefusu fika nkwaany.

²⁰ Na kindo kyoose akilaaya kyeeri ekyo kyeekaa kwaasha nikitefusu, neekyo akikaya kiwo kiveva kitefusu.

²¹ Nndu moose kapaana kitara kya nka yeto mmbo asangyaa soori takwe, navesamba, nave ntefusu fika nkwaany.

²² Na nndu moose apaana kyindo kyoose ankaya nnyasangya soori takwe, nawe muni

²³ Kwakooya nkitara, ao kindo kyingi akaya nka yeto, kankipaana mmbo avaa ntefusu fika nkwaany.

²⁴ Na nndu alala na nndu nka na utefusu lukankooya, mmbo avaa ntefusu ando a mikonu mfungare, na wo kitara alaaya kive kitefusu.

²⁵ Na kwakooya nndu nka ookwa ni samu ando a mikonu miingi, mmwasi ya mikonu yakwe, mikonu yeyo ya samu ya utefusu lwakwe, mmbo ashevaa sha mikonu ilya yeekaa kwaasha, we ni ntefusu.

²⁶ Wo kitara ekyo akilaaya kyeeri ekyo kya yuukwa nsamu, mmbo kivaa sha kitara kilya kyeevikwa kwaasha, na wo kindo alaayaa nkitefusu, sha utefusu lwa ikaa kwasha lyakwe.

²⁷ Na nndu moose yeto apaanaa findo filya mmbo avaa ntefusu, nawe nasangye soori takwe, nakusangye mureny, naveva ntefusu fika nkwaany.

²⁸ Naakwa nka yeto ammilyiswa kimaruma kya samu yakwe, lyo neekene mikonu mfungare, nakwilyiseny.

²⁹ Nkonu wa nyanya naonise mbeta ivii, ao mawore avii a mbuku neengye nkohani, yoo moongony wa yeema.

³⁰ Nkuhani naserise imwi ive kiraso kya ulyamari, na yaa kavii ive kiraso kyekora na muro, nawe nkohani navike usandi kwakwe mbee ya Nndumi Iruva kimaruma kya samu ya utefusu lwakwe.

³¹ Nindo mushevikaa vana va Israeli kwaasha kya utefusu lwawo; naambo valasheefwa na utefusu, kwakooya vatefusa mmba yakwa yeyo ikee kwawo.

³² Yelyo llyo ivavaso lya yeto ashukwaa ni usa na lya yeto ashukwaa mmaashi akamwaallwa nravi;

³³ na lya nka yeto akeembike kwaasha, na lya nndu ashukwaa ni usia, kava nndu nndumi ao nka, yeto alalaa na nka akee ntefusu.